Wb/nia/Moze II/37

I. Famazökhi tawöla gamabu'ula li andrö

1 Ba ifazökhi dawöla andrö Besale'eli, bana geunia; 2 hela a matonga wa'anau ba sahela a matonga wa'ebolo ba sahela a matonga wa'alaŵa.

2 Ba ifo'uli si ndruhu mbalaki, tanö bakha ba tanö baero, ba ifosinga ana'a, fasui. 3 Ba öfa ifahele khönia tumbo ni'ogaolo, ba gahenia si öfa, dombu-dombua fatambai.

4 Ba ifazökhi hea-hea, bana, ba ifo'uli ana'a; 5 ba hea-hea andrö, ba ifatörö ba dumbo no mege, fatambai dawöla, ba wamahea tawöla.

6 Ba ifazökhi lagö-lagö, si ndruhu mbalaki, 2 hela a matonga wa'anau ba sahela a matonga wa'ebolo. 7 Ba ifazökhi göi gerubi, dombua, ana'a; niböbözi wamazökhi ya'ia, ba faföfö lagö-lagö andrö ibe'e, 8 sambua-sambua faföfö, ba dete lagö-lagö ibe'e gerubi andrö, faoma faföfö. 9 Ba kerubi andrö, ba samologö miyaŵa afira, wamalugö lagö-lagö afira, faoma la'otahögö nawöra; lagö-lagö andrö la'otahögö kerubi andrö.

II. Meza andrö ba fakake andrö khönia

10 Ba ifazökhi meza andrö, bana geunia, 2 hela wa'anau ba sahela wa'ebolo ba sahela a matonga wa'alaŵa. 11 Ba ifo'uli si ndruhu mbalaki ba ifosinga ana'a, fasui. 12 Ba ifolambe-lambe na göi, lalu'a wa'ebolo fasui; ba lambe-lambe andrö, ba ifosinga zui ana'a, fasui.

13 Ba öfa ifahele khönia tumbo ni'ogaolo, ana'a, ba ba watalingania ifakhai dumbo andrö, ba gahenia si öfa. 14 Si fadege ba lambe-lambe no mege dumbo andrö, ba nifatörö hea-hea, ba wamahea meza andrö. 15 Ba hea-hea andrö, ba bana ibe'e, ba ifo'uli ana'a, ba wamahea meza andrö.

16 Ba ifazökhi wakake andrö ba meza, mako andrö khönia ba figa ba mako ba wamadu ba kundri, fame'e zumange nibadu andrö, si ndruhu mbalaki manö, fefu.

III. Naha wandru

17 Ba ifazökhi naha wandru andrö, si ndruhu mbalaki. Niböbözi wamazökhi naha wandru andrö ahenia ba tölania; ba tebe'e ni'obene mbunga andrö — ulu'ulu sawena aboto — 18 Ba önö zi otarai ngainia daha, tölu-tölu fatambai naha wandru. 19 Ba sara daha, ba tölu ni'obene mbunga, si hulö mbene mbowo kanari, sambu-sambua mbene, sawena aboto. Si manö ba ndraha andrö fefu, si önö, si otarai naha wandru andrö.

20 Ba ba döla naha wandru, ba 4 ni'obene mbunga, si hulö mbene mbowo kanari, si so ulu'ulu ba bowo, 21 sambu-sambua mbene tou zi medölu wa dua khönia, — daha si önö andrö, si otarai ia. 22 Bene andrö khönia ba daha andrö, ba ha sara, niböbözi fefu, ha sandroro, si ndruhu mbalaki.

23 Ba fitu ifazökhi fandru khönia, fabaya guti andrö ba sife andrö khönia, si ndruhu mbalaki. 24 Otu a dua wulu balaki i'oguna'ö si ndruhu mbalaki, wamazökhi ya'ia, fabaya gama-gamania no mege.

IV. Naha wanunu kumöyö ba fanikha famayoini ba hadia nitunu, samohua

25 Ba ifazökhi naha wanunu kumöyö andrö, bana geunia, sahela wa'anau ba sehela wa'ebolo, si öfa sagi, ba 2 hela wa'alaŵa, ba si fadoro khönia dandrunia andrö. 26 Ba ifo'uli si ndruhu mbalaki mezania awö ngainia, fasui, ba tandrunia, ba ifosinga ana'a, fasui.

27 Ba tou zinga andrö, ba ifotumbo ni'ogaolo, dombua, ba watalingania si dombua, ba faoma fatambai zi manö, ba nifatörö hea-hea andrö, ba wamahea ya'ia ba da'ö. 28 Ba hea-hea andrö, ba bana ibe'e ba ifo'uli ana'a.

29 Ba ifazökhi wanikha famayoini andrö ni'amoni'ö, awö nitunu andrö samohua, si lö si fabaya, nifolau zamaruka dalu-dalu nigule'ö.

Famotokhi ba gahe

Fabaliŵa lala

Olayama Moze II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö