Wb/nia/Moze IV/9

I. He wisa wolau owasa fasa

1 Ba humede Yehowa khö Moze, ba danö si mate, ba gahe hili Zina'i, me döfi si dua, aefa aheta ira ba danö Miserayi, me baŵa si föföna, imane:

2 Böi zi lö lalau gowasa fasa Iraono Gizeraeli, na baŵania. 3 Ba zi meweleöfa ba baŵa da'e lalau, na bongibongi, ba ginötönia; mi'o'ö nifakhoi fefu, awö nihonogöi ba khönia, wolau ya'ia. 4 Ba iŵa'ö Moze ba Ndraono Gizeraeli, lalau wasa andrö.

5 Ba lalau wasa ba mbaŵa si föföna andrö, ba zi meweleöfa, me bongi-bongi, ba danö si mate, ba gahe hili Zina'i; la'o'ö sibai niŵa'ö Yehowa khö Moze; si manö wolau Ndraono Gizeraeli.

II. He wisa zi tebai fao

6 Ba so niha si no ra'iö ba zi mate, ba tobali tebai lalau wasa, me luo da'ö. Ba möi ira khö ndra Moze A'aroni, me luo da'ö, 7 lamane khönia: No ra'iö ndra'aga ba zi mate, ba hana wa te'ambösi ndra'aga, me tebai ba ginötönia mabe'e zumange andrö khö Yehowa, awö Ndraono Gizeraeli bö'ö?

8 Ba imane khöra Moze: Mibase'ö, da'ufondrondrongo ua, hadia niŵa'ö Yehowa ba khömi andrö.

9 Ba humede Yehowa khö Moze, imane: 10Ŵa'ö ba Ndraono Gizeraeli: Na so, ha niha ia, ba khömi, ba ma ba nga'ötömi dania, zi no ra'iö ba zi mate, ba ma si no mofanö mukoli, ba ilau zui wasa khö Yehowa. 11 Ba mbaŵa si dua, ba zi meweleöfa, na bongi-bongi, lalau, lafo'awö roti si lö mu'aisöni ba gule-gule safeto, wemanga ya'ia. 12 Lö tola lasaigö hadia ia, irege mahemolu, ba sara töla lö tola lafatö khönia; la'o'ö fefu nifakhoi ba wolau fasa andrö, wolau ya'ia.

13 Ba si lö fa'ara'iö ba si tenga si möi mukoli, ba na lö ilau wasa, ba nise'e ia a niwara, me no lö nibe'enia sumange andrö khö Yehowa, me inötönia, no tohare khönia horö ibe'e niha si manö.

14 Ba na so ba khömi niha bö'ö, ba na ilau wasa khö Yehowa, ba dali khönia nifakhoi andrö, awö nihonogöi ba wolau fasa andrö. Ha sara gamakhoita khömi fefu, he ba niha bö'ö, ba he ba niha ba danö.

III. Boto lawuo andrö yaŵa nose

15 Ba me luo tefa'anö nose andrö, ba ibalugö lawuo nose — ose nahia zura goroisa — ba na bongi, ba yaŵa nose so ia, hulö haga galitö. 16 Ba si manö-manö dania: ibalugö ia lawuo, ba ba zi bongi, ba hulö haga galitö, irugi moluo.

17 Ba ero na ifazaŵa ia lawuo, na iheta ia ba nose, ba lafazaŵa göi ira Iraono Gizeraeli, ba ba zadada lawuo andrö, ba da'ö molombase Ndraono Gizeraeli.

18 Dali goroisa Yehowa ba wamazaŵa Ndraono Gizeraeli ya'ira ba dali goroisa Yehowa ba wolombasera, fatua ahono yaŵa nose lawuo, ba lö labulö'ö ira ba golombaseŵa. 19 Ba na iradö ia yaŵa nose lawuo, ba la'o'ö nilau Yehowa Iraono Gizeraeli, lö lafazaŵa ira.

20 Ba so göi, ba ha mato tölu bongi lawuo yaŵa nose; dali goroisa Yehowa ba wolombasera ba dali goroisa Yehowa ba wamazaŵara ya'ira. 21 Ba so göi, ba sara wongi lawuo, ba na ifazaŵa ia na moluo, ba lafazaŵa göi ira. Ba so zui, ba sara luo sara mbongi ia, ba na ifazaŵa ia lawuo, ba lafazaŵa göi ira. 22 Ba so, ba dua wongi ia ba ma sara waŵa, ba ma ara moroi andrö, na iradö ia yaŵa nose lawuo, na ahono ia yaŵania, ba lö labulö'ö ira ba golombaseŵa Iraono Gizeraeli, lö lafazaŵa ira. Ba na isaŵa yaŵa lawuo, ba lafazaŵa göi ira. 23 Dali goroisa Yehowa, ero na molombase ira, ba dali goroisa Yehowa, ero na lafazaŵa ira, la'o'ö nifakhoi Yehowa, dali goroisa Yehowa khö Moze.

Famotokhi ba gahe

Fabaliŵa lala

Olayama Moze IV: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö