Wb/nia/Moze IV/11
I. Te'otu'ö alitö wekökö-kökö zato[edit | edit source]
1 Ba latahigö Yehowa niha sato, wa hulö nifakao ira, lafarongogö khö Yehowa.
Ba me irongo Yehowa ba mofönu ia; ba ifatörö khöra galitö Yehowa, si manga golombaseŵa ösa.[1]
2 Ba la'angaröfi li Moze sato; ba mangandrö Moze khö Yehowa, ba mate galitö andrö.
3 Andrö wa labe'e töi naha andrö Dabera (anunua) me no itörö ira alitö andrö, khö Yehowa, ba da'ö.
II. Folu'a-lu'a zato ba fa'anuzu dödöra "mana" andrö[edit | edit source]
4 Ba tesao wangisö ba niha bö'ö andrö, si no fao khöra; ba ifuli labörötaigö göi Iraono Gizeraeli mangarö-ngarö, lamane: Ha niha zame'e khöma diwo?[2] 5 Itörö tödöma gi'a andrö, ni'ama mege ba danö Miserayi, si lö böli, ba la'izu andrö, ba baŵa limi ba kalamboza ba baŵa ba dasu.[3] 6 Ba iya'e, ba si mate olofo ndra'aga, me lö hadia ia; lö hadia ia ma'ila, ha "mana" andrö.
7 Ba "mana" andrö, ba no hulö mbua gatumba ba si mane mutiara wamaigida.[4] 8 Ba latöröi danö wangozaragö ya'ia ba lakisa, ba so göi, ba latutu; awena dania larino ba mbowoa, ba labali'ö kue sanifi; ba hulö kue nisala ba wanikha wa'ami.[5] 9 Ba na aekhu namo ba golombaseŵa ba zi bongi, ba aekhu göi yaŵa "mana" andrö.
III. Mangarö-ngarö Moze ba wa'abe'e halöŵönia, ba hadia niŵa'ö Lowalangi[edit | edit source]
10 Ba me irongo Moze mangarö-ngarö zamösana ba mbawandruhö nosenia, niha sato, samba-samba omo, ba mofönu sibai Yehowa ba anuzu sibai dödö Moze göi.
11 Ba imane Moze khö Yehowa: Hana wa öfakao genoniu, ba hana wa lö'ö sa'ae ba dödöu ya'odo, wa öbe'e manö ba hulugu zi sambua soi andre? 12 Hadia, ya'odo mege zanabina si sambua soi andre ba ya'odo zadono ya'ia, wa öŵa'ö khögu iada'e: Hagi ia, si mane sangai ono ba ndraono si lö aefa na ba mbagi zusu, ba ohe ba danö andrö, nifabu'ugu khö ndra tuara fahölusa? 13 Heza uhalö ndriwo, ba wame'e ba zi sambua soi andre? Mangarö-ngarö ira khögu, lamane: Faigi khöma ndriwo, öma! 14 Tebai u'ohe noro andrö, si so ba hulugu, ba zi sambua soi andre, tebai, na ha ya'odo; no tenga inötö norogu. 15 Na ölau khögu da'ö, ba si sökhinia, na ödölö wamunu ya'o, na so atö ba dödöu ndra'odo, fa böi sa'ae ufaigi-faigi wamakaogu andrö.
16 Ba imane Yehowa khö Moze: Kaoni khögu niha, 70, satua Ndraono Gizeraeli, ni'ilau wa no salaŵa ira ba mbanuara ba samaigi-maigi sato; ba nose wama'ele'ö ohe ira, ena'ö la'iagö ngaimö ba da'ö.[6] 17 Ba möido tou dania fahuhuo khöu ba da'ö, ba uhalö ma'ifu Geheha andrö, si no ahono khöu, ba ufa'ema khöra, ena'ö latolo'ö wolohe noro andrö ba niha andre, fa böi ha ya'ugö zi onoro ya'ia.
18 Ba ba niha sato, ba ömane: Mifaigi, fa lö fa'ara'iömi mahemolu, so gömi diwo donia; noa sa mangarö-ngarö ami, nirongo Yehowa, me mimane: Ha niha zame'e khöma diwo, öma? Noa sa ohahau dödöma ba danö Miserayi mege! Ba so dania khömi ndriwo ibe'e Yehowa, ena'ö lö ambö ömi.[7] 19 Tenga ha ma'ökhö ba tenga ha dua ngaluo, ba tenga ha lima ba tenga ha fulu ba tenga ha dua wulu ngaluo mi'amanga'ö, 20 alo'o sara waŵa wa'ara dania, irege tebai sa'ae mi'ago hua, irege ogoro ami; noa sa lö ba dödömi Yehowa, si soso ba khömi, ba no mangarö-ngarö ami ba no mimane: Hadia atö, wa aheta mege ita ba danö Miserayi?[8]
21 Ba imane Moze: Önö ngaotu ngahönö zabölö niha andrö, si so ndra'o, ba öfabu'u, wanguma'ö: Modiwo ira ube'e, ba tobali alo'o sara waŵa wa'ara la'amanga'ö? 22 Hadia, tola tetaba öra mbiri-biri ba sawi, balazi abönö öra?
23 Ba imane Yehowa khö Moze: Hadia, no ambö wa'abölö Yehowa? Awena dania ö'ila, na itörö nifabu'ugu khöu, ba na lö'ö.[9]
IV. Satua mbanua andrö si fitu ngafulu[edit | edit source]
24 Ba möi baero Moze mangombakha ba niha sato niŵa'ö Yehowa. Ba ikaoni zi fitu ngafulu, salaŵa mbanua, baero nose ifa'aso, fasui.
25 Ba möi tou Yehowa ba lawuo andrö, fahuhuo khönia. Ba ihalö ma'ifu Geheha andrö, si no ahono khönia ba ifa'ema ba zi fitu ngafulu niha andrö, salaŵa andrö. Ba me manandrösa khöra Geheha ba mama'ele'ö ira, ba dania, ba lö'ö sa'ae.[10]
26 Ba darua zi no toröi furi, ba golombaseŵa; Eledado döi zi samösa ba Medado zi samösa. Ba ba khöra göi möi Geheha, noa sa awö nitanö ba zura ira, ba lö si möi ira ba nose, ba tobali ba golombaseŵa mama'ele'ö ira.
27 Ba fagohi nono matua samösa, isaŵa Moze, imane khönia: Mama'ele'ö ba golombaseŵa ndra Eledado Medado!
28 Ba imane Yosua andrö, ono Nuni, si no ngoni-ngoni Moze, i'otarai iraono ia: He Tuagu, Moze, tenaŵa ira!
29 Ba imane khönia Moze: Hadia, ya'ugö zame'e lala khögu? Ena'ö na sama'ele'ö manö mbanua Yehowa fefu, ena'ö ifa'ema khöra Gehehania Yehowa!
30 Ba ifuli ia ba golombaseŵa Moze, awö zatua Ndraono Gizeraeli andrö.
V. Siate, fotu wolu'a-lu'a andrö[edit | edit source]
31 Ba tesao nangi nifatörö Yehowa, sangoloi'ö siate moroi ba mbewe nasi, ifatörö ba golombaseŵa; ma'ökhö fofanö tanö andre ba ma'ökhö fofanö tanö sa, ba zi tefasui olombaseŵa, dua hela wa'awe'e-we'e aefa ba danö.[11]
32 Ba maoso ira, ma'ö-ma'ökhö ba sara wongi ba ma'ö-ma'ökhö mahemolu la'ozaragö ziate; si lö oya-oya mangozaragö, ba no mato 14 ngaso'e, ba labologö ba zi tefasui olombaseŵa [ba wangoköli'ö].
33 Ba me la'aga-aga na ndriwo andrö, me lö sahori na, ba tesao wönu Yehowa khöra, ba ifatörö khöra wamakiko sabölö-bölö.[12]
34 Andrö wa labe'e töi naha andrö Kiberoti hata'awa (lewatö zolu'a-lu'a) me ba da'ö lako'o niha solu'a-lu'a andrö. 35 Ba i'otarai Kiberoti hata'awa, ba lasaŵa Haseroti, ba tebato ira ba Haseroti andrö.
Famotokhi ba gahe[edit | edit source]
Fabaliŵa lala[edit source]
Olayama Moze IV: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö