Wb/nia/Moze IV/32

I. La'andrö khöra danö yefo Yoridano mado Rubeno ba mado Gado. Fanimba Moze

1 Ba ba mado Rubeno ba ba mado Gado, ba no oya sibai gurifö, no fahöna. Ba me no lafaigi danö Ya'ezeri andrö ba tanö Gileadi, ba la'ila, sökhi sibai tanö zoya urifö danö andrö.

2 Ba so ira, mado Gado ba mado Rubeno, lamane khö ndra Moze Eleazari ere ba ba zatua mbanua: 3 Ataroto andrö ba Dibona ba Ya'ezeri ba Nimera ba Eleale ba Sebama ba Nebo ba Beono, 4 tanö andrö, nitolo Yehowa Iraono Gizeraeli, ba wame'e barö mbawara, ba no sökhi sibai tanö zoya urifö, ba no soya urifö zawuyumö andre. 5 Ba lamane na: Na no ato falukha ndra'aga wa'ebua dödöu, ba he wisa na tetehe ba zawuyumö andre danö da'ö, khöra ba ba nga'ötöra mitou; böi fa'ötö ba Yoridano ndra'aga!

6 Ba imane Moze ba mado Gado andrö ba ba mado Rubeno: Hana, si möi manuwö dalifusömi, ba si iagö da'e ami? 7 Hana wa mibe'e ata'u dalifusömi, we'amöi miyefo ba danö andrö, nibe'e Yehowa khöra? 8 Si manö sibai wolau ndra amami mege, me ufatenge ira no, i'otarai Gadesi Mbarenea, ba wamaigi tanö andrö. 9 Me no larugi ndraso Esikoli, ba lafeta'u Ndraono Gizeraeli, tobali lö edöna möi ira ba danö andrö, nibe'e Yehowa khöra. 10 Ba me luo da'ö, ba mofönu Yehowa, ba fahölu ia, imane: 11 Niha andrö, si otarai danö Miserayi, si no dua wulu fakhe ba si a'a moroi andrö, ba böi yala'ila danö andrö, nifabu'ugu khö ndra Aberahamo, Iza'aki, Yakobo, fahölusa, me no lö ni'oigöra tödöra wolo'ö khögu, 12 baero Galebi andrö, ono Yefune, ma'uwu Geni andrö, ba Yosua, ono Nuni, me no ya'ira zolo'ö sibai khögu. 13 Ba mofönu Yehowa ba Ndraono Gizeraeli; ba ifangörö-ngörö ira ba danö si mate, öfa wulu fakhe wa'ara, erege no ahori mate zi sagötö niha andrö, si no mosala khö Yehowa.

14 Ba iada'e, ba no maoso ami, fangali ndra namami, madou zamazökhi horö, ba wondrou'ö na fönu Yehowa andrö ba Ndraono Gizeraeli, si no to'ua abölö-bölö. 15 Ba na mi'erogö ia, ba iradö na ira ba danö si mate, ba mibe'e tekiko ira fefu.

16 Ba la'ondrasi ia, ba lamane: Damafazökhi kandra mbiri-biri ba da'e, nahia guriföma andrö, ba mataru'ö mbanua nahia [wo'omoma ba nahia], ndraono suwuyu khöma; 17 ba ya'aga, ba ma'aro'ö ndra'aga, ba föna Ndraono Gizeraeli soga, irege no ma'ohe ira ba nahara; ba ba mbanua saro la'iagö [fo'omoma ba] iraono sawuyu khöma, börö niha ba danö andrö, [si fa'emali khöda]. 18 Lö mangawuliga ba nahiama, irege no möi ba Ndraono Gizeraeli fefu dana khöra andrö, tanö. 19 Lö'ö sa manema ndra'aga tana khöma, awöra, yefo Yoridano, no tana khöma danö tanö ba gatumbukha luo, i'otarai Yoridano.

II. Na latolo ua nawöra, ba latehe khöra ba ba zi matonga mado Manase danö andrö. Lahalö khöra

20 Ba imane khöra Moze: Na mimanö, na mi'aro'ö ami, föna Yehowa, ba wanuwö, 21 ba na mi'ötö Yoridano, föna Yehowa, dozi ami, si no mangaro, irege no itimba fönania zi fa'udu khönia, ba na awena dania mifuli ami, 22 na no ibe'e barö mbawania danö Yehowa, ba aefa ami ba khö Yehowa ba ba Ndraono Gizeraeli, ba tana khömi dania danö andre, dali zomasi Yehowa. 23 Ba na tenga si manö wolaumi, ba mosala ami ba da'ö khö Yehowa, ba mi'ila dania hadia zi göna ami, ba lalömi andrö. 24 Mitaru'ö khömi mbanua, nahia [wo'omomi ba nahia] ndraono sawuyu khömi, ba mifazökhi kandra mbiri-birimi ba mi'o'ö niŵa'ögu khömi.

25 Ba latema li Moze mado Gado ba mado Rubeno, lamane: La'o'ö niŵa'öu sawuyumö, ya'ugö Tua! 26 Iraono sawuyu khöma ba fo'omoma, ba uriföma, numalö uriföma sonora fefu, ba hana na toröi furi ba da'e, ba mbanua Gileadi andre. 27 Ba ya'aga sawuyumö andre, ba ma'ötö Yoridano föna Yehowa, ba wanuwö, ha wa'ato ndra'aga, si no mangarö, si mane niŵa'öu, ya'ugö Tua.

28 Ba ibe'e li Moze khö Geleazari ere ba khö Yosua, ono Nuni ba ba zatua mado Ndraono Gizeraeli, ba khöra andrö; imane khöra Moze: 29 Na no möi miyefo Yoridano mado Gado ba mado Rubeno, awömi, föna Yehowa, ba wanuwö, ha wa'ato ira, si no mangaro, ba na no mube'e barö mbawami danö, ba mibe'e khöra danö Gileadi, tana khöra ba ba nga'ötöra mitou. 30 Ba na lö fao ira khömi miyefo, si no mangaro ba wanuwö, ba ba danö Gana'ana tefataro ira, ba ngaimi.

31 Ba lamane mado Gado ba mado Rubeno: Hadia niŵa'ö Yehowa ba khöma, ya'aga, sawuyumö andre, ba ma'o'ö. 32 Mangaro ndra'aga ba möiga miyefo ba danö Gana'ana, föna Yehowa, ena'ö lö tebulö khöma dana khöma ba zi tambai Yoridano.

33 Ba ibe'e khöra Moze — ba mado Gado ba ba mado Rubeno ba ba zi matonga mado Manase, ono Yosefo — ibe'e khöra, ba amatöröŵa Zihona andrö, razo Ndraono Gamori, awö gamatöröŵa Ogi andrö, razo Mbazana, tanö andrö, fabaya banua ba danö, awö mbenuara, banua ba danö misa.

34 Ba mado Gado andrö, ba lafuli lataru'ö Dibona ba Ataroto ba Aroeri, 35 ba Ateroti Zofana ba Ya'ezeri ba Yogebeha, 36 ba Beti Nimera ba Beti Harana, banua saro, awö kandra mbiri-biri.

37 Ba mado Rubeno, ba lafuli lataru'ö Hesibona ba Eleale ba Kiriata'i, 38 ba Nebo ba Ba'ali Meono, nifalalini töi, ba Sibema; ba banua andrö nifulira fanaru'ö, ba lafotöi si bohou.

39 Ba iraono Makhiro andrö, ono Manase, ba ba Gileadi möi, ba lahalö khöra, latimba Ndraono Gamori, banua si tohöna andrö. 40 Ba itehe khö Makhiro, ono Manase, Gileadi andrö Mose, ba ibali'ö banuania.

41 Ba Ya'iro andrö, ono Makhiro, ba möi mu'okhögö halama soya khöra, ba ibe'e töinia halama soya khö Ya'iro. 42 Ba Noba andrö, ba möi mu'okhögö Genata, fabaya halama soya khöra, ba töinia Noba andrö ibe'e töi.

Famotokhi ba gahe

Fabaliŵa lala

Olayama Moze IV: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö