Wb/nia/Moze IV/34

I. Ola danö Gana'ana

1 Ba humede Yehowa khö Moze, imane: 2 Be'e li ba Ndraono Gizeraeli, ömane khöra: Na mirugi danö Gana'ana andrö, ba tanömi dania da'ö, si möi khömi ba ba nga'ötömi mitou: tanö Gana'ana andrö, ma'asagörö.

3 Ola tanö raya, ba i'otarai danö si mate Sini mibe'e, sangehene tanö Ndraono Gedomo; böröta nola raya tanö ba gatumbukha luo, ba balö zilua'asi nasio. 4 Ba itörö raya Akerabi olami andrö, isaŵa misa Zini, ba tetohugö, irugi mbalönia, raya Gadesi Mbarenea. Ba numalö ba Hasara Adara, ba misa ba Asemona. 5 Ba moroi ba Asemona, ba ituturu mbombo Miserayi andrö, irege ba mbewe nasi aetu.

6 Ba ola tanö ba gaekhula luo khömi, ba asi sebua andrö; da'ö nolami tanö ba gaekhula.

7 Ba olami tanö yöu, ba i'otarai nasi sebua, numalö ba hili Hori mibe'e ia; 8 ba i'otarai hili Hori, ba mirugi lala ba Hamata, ba balö nola, ba Sedadi. 9 Ba itörö Ziferono, ba irugi Hasara Enana, balönia. Da'ö nolami tanö yöu.

10 Ba ola tanö ba gatumbukha luo nibe'emi, ba i'otarai Hasara Enana ba isaŵa Zefama. 11 Ba i'otarai Zefama, ba numalö mitou ba Haribela, tanö ba gatumbukha, i'otarai Ga'ini; ba numalö mitou na ba ihene mboto hili andrö, tanö ba gatumbukha i'otarai mbaŵa Kinereti. 12 Ba numalö mitou ba mbewe Yoridano nola, irugi zilua'asi nasio, balönia. Da'ö nola danömi, fasui.

13 Ba ibe'e li ba Ndraono Gizeraeli Moze, imane: Da'ö danö andrö, nifosasi khömi, tana khömi, balazi dahö-dahö, niŵa'ö Yehowa, nibe'e ba zi siŵa mado a matonga andrö. 14 Ba mado Rubeno andrö, fatalifusöta andrö khöra, ba mado Gado, fatalifusöta andrö khöra, ba si matonga mado Manase, ba no latema dana khöra. 15 Si dombua mado a motonga, ba yefo Yoridano tanö ba gatumbukha, ba gamaudu Yerikho no latema dana khöra.

II. He wisa wamaosa tanö

16 Ba humede Yehowa khö Moze, imane: 17 Da'ö döi zamaosa tanö khömi: Eleazari ere andrö ba Yosua, ono Nuni. 18 Ba samö-samösa zambu-sambua mado miŵa'ö awöra, salaŵa, ba wamaosa tanö andrö. 19 Ba da'ö döi da'ö: Ba mado Yuda, ba Kalebi andrö, ono Yefune. 20 Ba ba mado Zimeoni, ba Samueli, ono Gamihudi. 21 Ba ba mado Mbeniyami, ba Elidado, ono Giselono. 22 Ba salaŵa ba mado Dano, ba Buki, ono Yogelisi. 23 Ba ba ndraono Yosefo andrö: salaŵa ba mado Manase, ba Hanieli, ono Gefodi. 24 Ba salaŵa ba mado Geferayi, ba Kemueli, ono Zifetano. 25 Ba salaŵa ba mado Zebuloni, ba Elisafa, ono Waranakhi. 26 Ba salaŵa ba mado Isasari, ba Falatieli, ono Gasana. 27 Ba salaŵa ba mado Gaseri, ba Ahihudi, ono Zelomi. 28 Ba salaŵa ba mado Nafetali, ba Fedaheli, ono Gamihudi.

29 Da'ö ira, ba niŵa'ö Yehowa famaosa ba Ndraono Gizeraeli tana khöra ba danö Gana'ana andrö.

Fabaliŵa lala

Olayama Moze IV: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö