Wb/nia/Moze IV/6
I. Amakhoita ba ni'amoni'ö khö Lowalangi
[edit | edit source]1 Ba humede Yehowa khö Moze, imane: 2 Hede ba Ndraono Gizeraeli, ömane khöra:
Na so ndra matua, ba ma ira alawe, sedöna mamabu'u ya'ia khö Lowalangi, na i'amoni'ö ia khö Yehowa, 3 ba lö tola ibadu nagu ba hadia ia nibadu si mabu niha; ba he na no mubali'ö nirö aisö (zuka) ba lö tola ibadu; fefu hadia ia, na ösi mbua nagu mböröta, ba lö tola ibadu, ba bua nagu, he sauri, ba he ni'oköli'ö, ba lö tola i'a.[1] 4 Götö ni'amoni'ö ia, ba lö töla i'a hadia ia nihalö ba nagu, he hunö, ba he uli.
5 Götö wa'ara, nifabu'unia ya'ia ni'amoni'ö ba lö tola itörö högönia fanöŵö. Irege no numalö götö nifabu'unia ya'ia, ba ni'amoni'ö ia laŵa'ö; bunia, ba ifotuwu.[2]
6 Götö wa'ara nifabu'unia ya'ia khö Yehowa, ba lö tola möi ia ba zi mate. 7 Na mate namania, ba ma inania, ba ma talifusönia matua, ba ma talifusönia alawe, ba lö tola ihalö fa'ara'iönia, me no tohare khönia we'amoni'ö andrö khö Lowalanginia. 8 Götö we'amoni'ö andrö khönia, ba ni'amoni'ö khö Yehowa ia.
9 Ba na so zi mate, si lö mudöna-döna, ba zi so ia, na ra'iö ba zi manö högönia andrö, si no mu'amoni'ö, ibe'e, ba itöwö mbunia; na luo si fitu itöwö. 10 Ba na luo si ŵalu, ba dombua i'ohe fune ba ma ono marafadi, dombua, i'ohe khö gere, ba zinga mbawandruhö nose wama'ele'ö.[3]
11 Ba ibe'e sumange fameta horö zi sambua ere, ba sumange nitunu zi sambua, ifaigi khönia wangatulö ba da'ö, me no mosala ia ba zi mate andrö; ba na luo da'ö, ba ifuli ni'amoni'ö högönia iŵa'ö, 12 ba ifuli i'amoni'ö ia khö Yehowa fa'ara nifabu'unia [föna], ba ono mbiri-biri si döfi fa'ebua i'ohe sumange ogauta; ba tobali si lö mu'erai zi no numalö irege da'ö, me no ra'iö we'amoni'ö andrö khönia.
13 Ba da'ö gamakhoita ba ni'amoni'ö khö Lowalangi: na no ahöwö götö we'amoni'ö andrö, nifabu'unia, ba la'ohe ia ba zinga mbawandruhö nose wama'ele'ö.
14 Ba sumange nibe'enia khö Yehowa, ba ono mbiri-biri si lö si sala, si döfi fa'ebua, sumange nitunu, ba ono mbiri-biri si alawe, si lö si sala, si döfi fa'ebua, sumange fameta horö, ba biri-biri si matua, si lö si sala, sumange fangorifi. 15 Ba baero ö, ba samba kude kue si lö mu'aisöni, hamo si sökhi, nifaruka fanikha ba kue sanifi, nigule'ö fanikha, ba sumange ni'a andrö ba sumange nibadu, si faböbö ba da'ö.
16 Ba i'ohe föna Yehowa ere, ba i'asiwai khönia zumange fameta horö ba sumange nitunu. 17 Ba biri-biri si matua andrö, ba i'asiwai sumange Yehowa, sumange fangorifi, awö gude andrö, si so si lö mu'aisöni; ba he sumange ni'a ba sumange nibadu andrö, ba i'asiwai khönia ere.
18 Ba yamutöwö sa'ae mbunia, ba högönia ni'amoni'ö, niha andrö, ni'amoni'ö khö Lowalangi, ba da'ö, föna mbawandruhö nose wama'ele'ö, ba yamuhalö mbunia andrö, ni'amoni'ö, yamutibo'ö ba galitö zumange andrö, ba galitö zumange fangorifi andrö.[4]
19 Aefa da'ö, ba ihalö ere da'io mbiri-biri si matua andrö, si no murino, ba sagörö kue si lö mu'aisöni ba gude no mege ba sagörö kue sanifi, si lö mu'aisöni, ba ibe'e ba danga ni'amoni'ö andrö, na no itöwö mbunia andrö, ni'amoni'ö. 20 Ba ihahae ere föna Yehowa nihahae; tana khö gere ia, ame'ela ni'amoni'ö, lö lai nosu andrö, nihahae ba faha andrö, fegero andrö. Awena tola ibadu nagu niha ni'amoni'ö andrö.[5]
21 Da'ö gamakhoita ba ni'amoni'ö andrö, si no mamabu'u ya'ia — hadia gömönia ba Lowalangi, ba we'amoni'ö ya'ia andrö, lö lai zi tola ibe'e na [baero ö]. Ömö ba gamabu'ula li andrö, me ifabu'u ia, ba itörö, dali gamakhoita andrö, ba we'amoni'ö andrö khönia.
II. Famahowu'ö gere niha sato
[edit | edit source]22 Ba humede Yehowa khö Moze, imane: 23 Hede khö ndra A'aroni iraononia, ömane: Na mifahowu'ö Ndraono Gizeraeli, ba mimane khöra:
24 Yamufahowu'ö ndra'ugö Yehowa, yamurorogö ndra'ugö![6] 25 Yamufohaga mbawania khöu Yehowa, yamu'ebua'ö dödönia khöu! 26 Yamufalemba hörönia khöu Yehowa, yamube'e wa'ohahau dödö khöu!
27 Ndramube'e tohare ba Ndraono Gizeraeli döigu, ba ya'odo zamahowu'ö ya'ira.
Famotokhi ba gahe
[edit | edit source]Fabaliŵa lala
[edit source]Olayama Moze IV: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö