Wb/nia/Moze IV/17

I. Famufu gali andrö

1 Ba humede Yehowa khö Moze, imane: 2 Ŵa'ö khö Geleazari, ono Ga'aroni ere andrö, yamuhalö gali andrö ba gakhozila andrö, ba yamufazawili galitö ba zaröu ma'ifu; 3 amonita sa'ae gali zebua horö andrö, me no mate ira; niböbözi, ni'anifi'ö ba nibe'e uli naha wame'e sumange. Noa sa la'ohe föna Yehowa, ba amonita sa'ae. Ba hana na tandra sa'ae ba Ndraono Gizeraeli.

4 Ba ihalö gali töla andrö Eleazari, gali ba wanunu samohua andrö, ni'ohe zakhozi andrö ba laböbözi, la'anifi'ö, uli naha wame'e sumange, 5 tandra ba Ndraono Gizeraeli, fa samösa böi möi, si tenga nga'ötö Ga'aroni, ba wanunu samohua föna Yehowa, fa böi göna ia zi no göna Gora andrö ba awönia andrö, nifa'ombakha'ögö Yehowa khönia khö Moze.

II. Ifuli kumökö-kökö zato. Fotu ba fangatulö

6 Ba mahemolu ö, ba kumökö-kökö Ndraono Gizeraeli sato fefu khö ndra Moze A'aroni, lamane: No mibunu niha tana khö Yehowa. 7 Ba me aekhu zato udu ndra Moze A'aroni, ba lafaigi nose wama'ele'ö da'ö; ba no ibalugö ia lawuo andrö, ba to'ele lakhömi Yehowa.

8 Ba möi ba golayama nose wama'ele'ö ndra Moze A'aroni.

9 Ba humede Yehowa khö Moze, imane: 10 Miheta ami ba zato andrö, ena'ö use'egö ira, ahou zamö'i!

11 Ba lafalögu tou ira ba danö.

Ba imane Moze khö Ga'aroni: Halö gali ba wanunu samohua, lau yaŵa galitö ba naha wame'e sumange, ba be'e zamohua ba ta'i-ta'i ohe ba hunö zato, ba wamaigi fameta salara; noa sa mofönu sibai Yehowa, ba no ibörögö famakao.

12 Ba ihalö gali A'aroni, si mane niŵa'ö Moze, fagohi ia, isaŵa hunö zato; noa sa ibörögö famakao ba khöra; ba itunu zamohua fameta zala zato. 13 Ba me so ia ba da'ö, ba gotaluara zi mate zauri, ba döhö wamakao andrö.

14 Ba fa'ato zi no tekiko ba wamakao andrö, ba no 14.700; lö lai zi tekiko mege börö Gora andrö. 15 Ba ifuli ia A'aroni khö Moze, ba golayama nose wama'ele'ö, ba no döhö wamakao andrö.

III. Molewiö zi'o Ga'aroni ba mobowo

16 Ba humede Yehowa khö Moze, imane: 17 Hede ba Ndraono Gizeraeli, ŵa'ö khöra, ndramu'ohe khöu zi'o, sambua mado, ba sara zi'o, si'o zalaŵara, dozi mado, 12 zi'o fefu. Ba töi zamösana, ba sura ba zi'onia, 18 ba töi Ga'aroni, ba ba zi'o mado Lewi ösura; samösa högö mado, ba sara zi'o. 19 Ba ötou'ö tou ba nose wama'ele'ö, föna dawöla zura goroisa, ba ni'oro'oroma'ögu ya'odo khöu. 20 Ba si'o nituyugu, ba molewiö dania, ena'ö ufadöhö wekökö-kökö Ndraono Gizeraeli khömi, fa böi [sa'ae] abua khögu.

21 Ba me no i'ombakha'ö da'ö ba Ndraono Gizeraeli Moze ba labe'e khönia zi'ora salaŵara fefu, dozi mado, samösa högö, ba sara zi'o, 12 zi'o fefu; ba lafao ba zi'ora andrö zi'o Ga'aroni.

22 Ba itou'ö tou zio andrö Moze, föna Yehowa, ba nose goroisa.

23 Ba mahemolu ö, me möi ba nose goroisa Moze, ba no auri zi'o Ga'aroni, si'o mado Lewi andrö, no molewi'ö ba mobowo sa'ae ba mowua, bua manalu si no o'öli.

24 Ba i'ohe baero ni'amoni'ö zi'o andrö fefu Moze, i'oroma'ö ba Ndraono Gizeraeli fefu, ba lafaigi, ba ihalö zi'onia zamösana.

25 Ba imane Yehowa khö Moze: Fuli be'e tou zi'o Ga'aroni andrö föna zura goroisa, ena'ö te'irö'ö ia tandra-tandra ba zabe'e tandro, ba ena'ö döhö wekökö-kököra andrö, fa böi [sa'ae] abua khögu; fa böi mate ira.

26 Ba i'o'ö Moze niŵa'ö Yehowa khönia; si manö wolaunia.

27 Ba lamane Iraono Gizeraeli khö Moze: Hiza, si mate ndra'aga, si tekiko ndra'aga, dozi ndra'aga, ba si tekiko! 28 Ha niha zi hatö'ö ya'ia ba nose Yehowa andrö, ba si mate; hadia sa, öhori manö ndra'aga?

Famotokhi ba gahe

Fabaliŵa lala

Olayama Moze IV: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö