Wb/nia/Moze IV/10

From Wikimedia Incubator
< Wb‎ | nia‎ | Moze IV
Wb > nia > Moze IV > 10

I. Torofe ba wame'e tandra[edit | edit source]

1 Ba humede Yehowa khö Moze, imane:

2 Fazökhi khöu dorofe, dombua, niböbözi, wamazökhiu ya'ia, soguna ba wame'e tandra ba zato, na lafazaŵa ira ba golombaseŵa. 3 Na telau, ba sowulo khöu zato fefu föna nose wama'ele'ö. 4 Ba na ha sambua telau, ba salaŵa andrö — högö Ndraono Gizeraeli — zowulo khöu. 5 Ba na milau, fangekhugö niha, ba si so ba golombaseŵa tanö ba gatumbukha luo zamazaŵa ya'ira. 6 Ba na milau zamuza tö, fangekhugö niha, ba si so ba golombaseŵa tanö miraya zamazaŵa ya'ira; nilau fangekhugö niha, na lafazaŵa ira ena'ö. 7 Ba na ba wangowulo sato, ba milau manö, si tenga fangekhugö niha.

8 Ba iraono Ga'aroni, ere andrö zolau torofe andrö; ba folau ya'ia, ba huku khömi dania, si lö tebulö, götö-götö wa'ara.

9 Ba na lasuwö ami ba danömi emalimi, samakao ya'ami, ba na milau dorofe andrö, ba itörö tödö Yehowa, Lowalangimi, ami, ba te'efa'ö ami ba danga nemalimi andrö.

10 Ba he göi na baŵa wa'omuso dödö khömi, ba gowasa andrö khömi ba ba wasulöna, ba milau dorofe andrö, na mibe'e zumange nitunu ba sumange fangorifi; ena'ö itörö tödö Lowalangi ami ibe'e; Yehowa ndra'odo, Lowalangimi.

II. Aheta ira ba gahe hili Zina'i ba he wisa wofanöra[edit | edit source]

11 Ba ba ndröfi si dua, me baŵa si dua, ba zi mendröfa gofayaö, ba isaŵa yaŵa lawuo andrö, moroi ba nose zura goroisa. 12 Ba lafazaŵa ira Iraono Gizeraeli, moniza-nizara, laheta ira ba danö si mate, ba gahe hili Zina'i, ba ba danö si mate Farana adada lawuo. 13 Böröta wamazaŵara ya'ira da'ö, dali ni'oroi'ö Lowalangi khö Moze.

14 Si föföna aheta, ba mandrera ba golombaseŵa Ndraono Yuda samba-sambawa; ba högö ngawawa andrö khöra, ba Nahaso andrö, ono Gaminadabi. 15 Ba solohe ngawawa mado ndraono Izasari, ba Natana'eli andrö, ono Zuara, 16 ba solohe ngawawa mado ndraono Zebuloni, ba Eliabi andrö, ono Helono. 17 Ba na no mududugö nose, ba lafazaŵa ira iraono Gereso ba iraono Merari, sangosa'ö ose.

18 Aefa da'ö, ba aheta mandrera ba golombaseŵa mado Rubeno, samba-sambawa; ba solohe ngawawa andrö, si faböbö ba da'ö, ba Elisuri andrö, ono Zedeuri. 19 Ba solohe ngawawa mado ndraono Zimeoni, ba Selumieli andrö, ono Zuri-Sadai'i. 20 Ba solohe ngawawa mado ndraono Gado, ba Eliasafi andrö, ono Degueli. 21 Aefa da'ö, ba lafazaŵa ira nga'ötö Gahati, sangosa'ö ni'amoni'ö andrö; ba irege so ira, ba no mufa'anö nose.

22 Ba awena aheta mandrera ba golombaseŵa ndraono Geferayi samba-sambawa: ba solohe ngawawa si faböbö ba da'ö, ba Elisama andrö, ono Gamihudi. 23 Ba solohe ngawawa mado ndraono Manase, ba Gamelieli andrö, ono Wedasuri. 24 Ba solohe ngawawa mado ndraono Mbeniyami, ba Abidano andrö, ono Gideono.

25 Ba aefa da'ö ba aheta mandrera ba golombaseŵa ndraono Dano, angohorita golombaseŵa fefu, samba-sambawa; ba solohe ngawawa, si faböbö ba da'ö, ba Ahiezeri andrö, ono Ami-Sada'i. 26 Ba solohe ngawawa mado ndraono Gaseri, ba Fagieli andrö, ono Okherana. 27 Ba solohe ngawawa mado ndraono Nafetali, ba Ahira andrö, ono Genani.

28 Da'ö wamöfö'ö, na moniza-nizara Ndraono Gizeraeli wamazaŵa ya'ira, samba-sambawa.

III. Ifasao ira Hobaba andrö[edit | edit source]

29 Ba me mofanö ira, ba imane Moze khö la'onia Hobaba, ono Regueli, Iraono Midiano andrö: Hiza, mofanö sa'ae ndra'aga, masaŵa danö nifabu'u Yehowa, wanguma'ö: ube'e khömi; ae awöma, ba lö ma'ambösi mböli gölöu; noa sa ifabu'u zi sökhi sibai ba Ndraono Gizeraeli Yehowa!

30 Ba imane: Lö omasido möido awömi; ufulido ba khöma, ba niwama.

31 Ba i'andrö [khönia Moze], imane: Böi erogö ndra'aga; noa sa sangila ndra'ugö, heza mabe'e nahama wolombase, ba danö si mate, ba akha sangombakha lala khöma ndra'ugö. 32 Na möi'ö awöma ba na falukhaga dania zi sökhi sibai andrö fefu, nibe'e Yehowa khöma, ba lö ma'ambösi mböli gölöu.

33 Ba laheta ira ba gahe hili Yehowa, mofanö ira, tölu ngaluo, ba sowaö-waö fönara dawöla andrö, nahia zura goroisa Yehowa, zi tölu ngaluo fofanö andrö, ba wangalui naha wolombase khöra. 34 Ba lawuo andrö khö Yehowa, ba yaŵara so na ma'ökhö, na laheta ira ba golombaseŵa.

IV. Fangandrö Moze na mofanö ba na tebato[edit | edit source]

35 Ba na mofanö dawöla, ba imane Moze: Faoso Yehowa! ena'ö muzaewe zi fa'udu khöu, ba ena'ö moloi fönau zi fatiu tödö khöu![1] 36 Ba na irugi golombaseŵa, ba imane: Fuli'ö Yehowa ba zi mewulu ngahönö wa hönö andrö Iraono Gizeraeli!

Famotokhi ba gahe[edit | edit source]

  1. Sin 68:2

Fabaliŵa lala[edit source]

Olayama Moze IV: 123456789101112131415161718192021222324252627282930313233343536

Amabu'ulali Siföföna: Moze IMoze IIMoze IIIMoze IVMoze VYosuaSanguhukuRutiSamueli ISamueli IIRazo IRazo IINga'ötö INga'ötö IIEseraNehemiaEsiteraYobiSinunöAmaedola ZelomoSangombakhaSinunö SebuaYesayaYeremiaNgenu-Ngenu YeremiaHezekieliDanieliHoseaYoeliAmosiObadiaYonaMikhaNakhumiHabakukiSefaniaHagaiSakhariaMaleakhi

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö