Wb/nia/Moze IV/22
I. Lö i'o'ö Bileamo andrö, me ifakaoni'ö ia Balaki
[edit | edit source]1 Aefa da'ö, ba latohugö wofanö Iraono Gizeraeli ba molombase dania ba zalo'o, ba danö Ndraono Moabi, yefo Yoridano, ba gamaudu Yerikho.
2 Ba i'ila Balaki, ono Zifori andrö, fefu nilau Ndraono Gizeraeli ba Ndraono Gamori. 3 Ba ata'u sibai Ndraono Mo'abi Ndraono Gizeraeli; ato sibai sa ira, ba humokha mbu Ndraono Moabi Ndraono Gizeraeli andrö.
4 Ba lamane Iraono Moabi ba zalaŵa Ndraono Midiano: Ba ni'ilada ma'ökhö, ba la'a manö fefu zi tefasui ya'ita niha sato sibai andrö, si mane sawi si matua, na la'a ndru'u ba mbenua.
Ba razo Ndraono Mo'abi, me luo da'ö, ba ya'ia Mbalaki andrö, ono Zifori.
5 Ba ifatenge zinenge khö Mbileamo, ono Mbeori, ba Wetori, ba mbewe Oiferati, ba danö niwara, ba wogaoni ya'ia, imane khönia: So niha, saheta ba danö Miserayi; no lahawui danö, ha wa'ebolo, ba iada'e, ba molombase ba gamaudugu.[1] 6 Ba aine ba elifi khögu niha andrö, me tebai ulaŵa; ma atö u'ila dania u'alani ira ba utimba ba danögu. U'ila sa: nifahowu'ömö, ba dörö-dörö nifahowu'ö ba ni'elifimö, ba dörö-dörö ni'elifi!
7 Ba mangefa zatua Ndraono Moabi ba satua Ndraono Midiano, la'ohe luo waetasa, ba larugi Mbileamo, ba lafa'ema khönia niŵa'ö Mbalaki.
8 Ba imane khöra: Miförö, ba uŵa'ö li khömi, balazi hadia niŵa'ö Yehowa khögu.
Ba la'iagö khö Mbileamo, satua Ndraono Moabi andrö.
9 Ba möi Lowalangi khö Mbileamo, imane khönia: Ha niha domeu andrö?
10 Ba itema li Lowalangi Bileamo, imane: Balaki andrö, ono Zifori, razo Ndraono Moabi, no ifatenge zinenge khögu, imane: 11 Hiza niha, saheta ba danö Miserayi, no lahawui danö ha wa'ebolo, ba aine, ba elifi ira khögu ma ato abe'e ndra'o usuwö ira ba utimba.
12 Ba imane Lowalangi khö Mbileamo: Lö tola möi'ö awöra, lö tola ö'elifi niha andrö, me no nifahowu'ö.
13 Ba me moluo ba iŵa'ö li Bileamo ba zatua andrö khö Mbalaki, imane: Mifuli manö ami ba khömi; lö'ö sa itehe khögu Yehowa, möido awömi.
14 Ba lafazaŵa ira satua Ndraono Moabi ba larugi Mbalaki ba lamane: Lö edöna Mbileamo möi awöma.
II. Ifuli ifatenge zinenge khö Mbileamo Balaki. Möi ia ba iba'a lala galidenia mala'ika
[edit | edit source]15 Ba ifuli ifatenge zinenge Balaki, sato ba salaŵa, sebua moroi ba da'ö no mege. 16 Ba me larugi Mbileamo da'ö, ba lamane khönia: Da'ö niŵa'ö Mbalaki, ono Zifori: Böi ŵa'ö lö möi'ö khögu! 17 Ebua sibai luou ube'e, ba fefu hadia ia niŵa'öu khögu, ba u'o'ö; ba ae elifi khögu niha andrö!
18 Ba imane Bileamo ba mbanua Mbalaki andrö: Ba he afönu nomonia firö ba ana'a ibe'e khögu Balaki, ba tebai sa atö ufadaö niŵa'ö Lowalangigu Yehowa, he ba huhuo side-ide, ba he ba huhuo sebua. 19 Ba miförö göi ba da'e, bongi, ena'ö urongo, hadia niŵa'ö Yehowa iada'e.
20 Ba ba zi bongi, ba möi Lowalangi khö Mbileamo, imane khönia: Na ba wogaoni ya'ugö möi niha andrö, ba faoso, ba ae awöra, ba böi lau zi tenga niŵa'ögu khöu.
21 Ba ihulö wongi ifosela galidenia Bileamo, möi ia awö zalaŵa draono Moabi andrö.
22 Ba mofönu Lowalangi, börö we'amöinia andrö; ba iagö lalania mala'ika Yehowa ba wanenaŵa ya'ia; no fakudo ia ba hulu galidenia ba fao khönia zawuyunia, darua. 23 Ba me i'ila kalidenia, no so ba lala mala'ika Yehowa ba sara wöda ba dangania, si no isöbi, ba ihole'ö ia ba zinga lala, itörö mbenua.
Ba ibözi galide Bileamo, ena'ö ifuli itörö lala.
24 Ba i'agö zise-ise lala mala'ika Yehowa, ba gotalua kabu nagu, ba zi so öli, faoma fatambai. 25 Ba me i'ila mala'ika Yehowa kalide, ba ifadege ia ba göli, ilazi gahe Mbileamo ba göli; ba ifuli ibözi ia. 26 Ba ifuli mowaö-waö mala'ika Yehowa ba i'agö zise-ise sibai, si lö lala wangohole'ö, he ba gambölö ba he ba gabera.
27 Ba me i'ila mala'ika Yehowa kalide, ba ibalöduhini tou danö, barö Mbileamo.
Ba mofönu Mbileamö, ihare'ö khönia mbözi-bözi.
28 Ba ifehede galide Yehowa; ba imane khö Mbileamo: Hadia horögu khöu, wa öbözi-bözido, no medölu sa'ae?[2]
29 Imane Bileamo khö galide: Me no ö'o'aya ndra'odo! Ena'ö na so khögu zi'öli, ba noa sa'ae ubunu'ö!
30 Ba imane kalide khö Mbileamo: Hadia, tenga sa kalideu ndra'o, si fakudo ndra'ugö ba hulu, sagötö fa'ara, irege ma'ökhö andre? Hadia, no irai amuatagu, ulau khöu zi manö?
Ba imane: Lö'ö!
31 Ba ibokai hörö Mbileamo Yehowa, ba i'ila mala'ika Yehowa, si so ba lala, sara wöda nidöni ba dangania. Ba ifaondrö ia, ba ifalögu tou ia ba danö.
32 Ba imane khönia mala'ika Yehowa: Hana wa öbözi-bözi galide andrö khöu, no medölu sa'ae? Ya'odo a'i zomba'a lala khöu, me no lala si lö sökhi wamaigigu. 33 Ba kalide andrö, ba no i'ilado, ba no medölu ihole'ö ia khögu; na lö ihole'ö ia mena'ö, ba mege sa'ae ubunu ndra'ugö, ba ya'ia, ba u'orifi mena'ö.
34 Ba imane Bileamo khö mala'ika Yehowa andrö: Horögu da'ö, lö'ö sa u'ila, wa ya'ugö zomba'a lala khögu; ba na fatuwu khöu, ba ufulido.
35 Ba itema li Mbileamo mala'ika Yehowa, imane. Ae manö awö niha andrö; ba böi ŵa'ö hadia zi tenga niŵa'ögu khöu! Ba fao Mbileamo ba zalaŵa andrö khö Mbalaki.
III. Irugi Mbalaki Bileamo
[edit | edit source]36 Ba me irongo Balaki, no so ba lala Mbileamo, ba ifaondragö ia, irege Iri Moabi ba mbewe Garono, ba wondrege nola danö. 37 Ba imane Balaki khö Mbileamo: Hadia, tenga no mato mendrua ufatenge zinenge khöu, ba wogaoni ya'ugö? Hadia mbörö, wa lö möi'ö khögu? Hadia, tebai ufosumange ndra'ugö!
38 Ba imane Bileamo khö Mbalaki: Ba no sodo ae. Ba hadia, tola maö uŵa'ö hadia ia? Taroma li nibe'e Lowalangi ba mbewegu, da'ö niŵa'ögu dania!
39 Ba fao Mbileamo khö Mbalaki, ba larugi Giriati Khusoti. 40 Ba ibe'e sumange Lowalangi zawi ba biri-biri Balaki, ba ifa'ohe'ö [wöfö] ö Mbileamo ba ö zalaŵa andrö, awönia fao.
41 Ba mahemolu ö, ba ihulö wongi Balaki wolohe Bileamo, ifasao miyaŵa ba Mbamoti Mba'ali; ba da'ö oroma khönia Ndraono Gizeraeli ösa.
Famotokhi ba gahe
[edit | edit source]Fabaliŵa lala
[edit source]Olayama Moze IV: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö