Wb/nia/Moze IV/4

Halöŵö ndraono Gahati

I. 1 Ba humede Yehowa khö ndra Moze A'aroni, imane: 2 Mi'ofaya ba Nono Lewi ha wa'ato ndraono Gahati, sawu-sawu, ba sambu-sambua watalifusöta, 3 i'otarai zi 30 fakhe ba si a'a moroi andrö, irugi zi 50 fakhe, dozi si möi ngoni-ngoni, sangai halöŵö ba nose wama'ele'ö. 4 Ba da'ö halöŵö ndraono Gahati andrö ba nose wama'ele'ö: famaigi ni'amoni'ö sibai andrö.

5 Ba na mifazaŵa ami ba zolombase ami, ba möi si bakha ndra A'aroni iraononia, lahalö tou mba'a-ba'a andrö ba labe'e balu-balu dawöla zura goroisa. 6 Ba labe'e na dufo uli guaza mina ba ba dete da'ö labologö lembe sadölö ungu sowu waru-waru, ba labe'e hea-hea andrö. 7 Ba meza roti nifaigi-faigi andrö, ba labalugö lembe ungu sowu waru-waru ba labe'e yaŵa mako ba figa ba mako wamadu andrö, awö gundri, soguna ba zumange nibadu, ba yaso göi yaŵa roti andrö, ni'ali-ali. 8 Ba da'ö fefu, ba nibalugö lembe kirimisi, ba balu-balu da'ö, ba tufa uli guaza mina; awena dania labe'e hea-heania. 9 Ba lahalö na lembe ungu sowu waru-waru, ba labe'e balu-balu naha wandru andrö, fabaya fandru ba guti wandru ba gali andrö, awö naha wanikha khönia fefu, soguna ba wangehao ya'ia. 10 Ba la'olohuni ia — fabaya fakakenia fefu — lohu-lohu uli guaza mina, ba labe'e ba hea-hea. 11 Ba naha wame'e sumange andrö ana'a, ba labalugö lembe ungu sowu waru-waru, ba latötöwui tufo uli guaza mina, ba labe'e hea-heania. 12 Ba lahalö fefu wakake soguna ba halöŵö andrö, nifakefake ba wangai-ngai halöŵö andrö ba ni'amoni'ö, ba la'olohuni lembe ungu sowu waru-waru; ba latötöwui tufo uli guaza mina, ba labe'e ba hea-hea. 13 Ba lahaogö naha wame'e sumange, laheta nawu, ba labe'e balu-balunia lembe ungu soyo. 14 Ba ba dete da'ö labe'e wakake andrö, fefu, nifakefake ba wangai-ngai halöŵö ba khönia, gali andrö ba garafu ba sundru-sundru ba figa, fefu wakake ba naha wame'e sumange; ba latötöwui ia tufo uli guaza mina, ba labe'e hea-heania.

15 Ba na no mo'ahonoa khö Ga'aroni ba ba ndraononia wangolohuni ngawalö andrö fefu, ni'amoni'ö fefu, na lafazaŵa ira sato, ba ndra mufa'aso ira iraono Gahati andrö, ba wamahea; ba lö tola lababaya ni'amoni'ö andrö, fa böi mate ira. 16 Ba ba danga Geleazari, ono Ga'aroni ere, ba tebe'e wanikha wandru ba samohua andrö nitunutunu ba sumange ni'a andrö, sero ma'ökhö ba fanikha famayoini andrö, fabaya famaigi ose ma'afefu, awö nösinia fefu, hadia ia ngawalö ni'amoni'ö ba fakake andrö khönia.

17 Ba humede Yehowa khö ndra Moze A'aroni, imane: 18 Böi mibe'e nihori nga'ötö Gahati andrö, ba Nono Lewi. 19 Mimane wamaigi, ya'ira, ena'ö auri ira ba ni'amoni'ö sibai andrö — Möi bakha ndra A'aroni iraononia ba lafataro ba halöŵönia zamösana, hadia nihalö ba hadia ni'ohe. 20 Ba böi möi ira bakha, ba wamaigi ni'amoni'ö andrö, he ha mamö'i hörö wa'ara, fa böi mate ira.

Halöŵö ndraono Gereso

II. 21 Ba humede Yehowa khö Moze, imane: 22 Ofaya göi wa'ato ndraono Gereso, sambu-sambua watalifusöta ba sawu-sawu, 23 i'otarai zi 30 fakhe ba si a'a moroi andrö, irege zi 50 fakhe ö'ofaya, dozi si möi ba halöŵö andrö, ba wangai-ngai hadia ia ba nose wama'ele'ö.

24 Ba da'ö halöŵö nga'ötö Gereso andrö — nihalöra ba ni'ohera: 25 Ni'ohera, ba kulambu nose andrö ba ose wama'ele'ö, sagönia andrö, awö dufo uli guaza mina, balu-balunia ba ba'a-ba'a mbawandruhö nose wama'ele'ö. 26 Ba ba'a-ba'a ba golayama ba ba'a-ba'a mbawa göli ba golayama, samasui ose, awö naha wame'e sumange, fabaya sinali andrö khönia ba fakake fefu, si faböbö ba da'ö nihalöra, ba fefu hadia ia halöŵö ba da'ö, ba halöŵöra da'ö. 27 Dali niŵa'ö ndra A'aroni iraononia khöra ba halöŵöra andrö, ba ni'ohera andrö fefu ba ba nihalö-halöra fefu; ba fefu hadia ia norora, ba mituturu khöra, mitötöi döi.

28 Da'ö halöŵö nga'ötö ndraono Gereso andrö, ba nose wama'ele'ö; ba mandrura ba halöŵöra, ba Itamari, ono Ga'aroni ere andrö.

Halöŵö ndraono Merari

III. 29 Ba iraono Merari, ba ö'ofaya göi, sawu-sawu ba sambu-sambua watalifusöta, 30 i'otarai zi 30 fakhe ba si a'a moroi andrö, irege zi 50 fakhe, ö'ofaya, dozi si möi ba halöwö andrö, sangai-ngai nihalö-halö andrö ba nose wame'ele'ö.

31 Ba da'ö ni'ohera, da'ö fefu nibe'e ba dangara, föfö nose wama'ele'ö: Fafa [döla-döla] nose ba lazi ba taru nahe, fabaya ahe; 32 ba taru nahe ba golayama fasui, fabaya ahe ba taru-taru ba sinali, awö wakakenia fefu, awö nihalö-halö ba da'ö, fefu; ba fakake andrö, norora, ba mituturu khöra, mitötöi döi.

33 Da'ö halöŵö nga'ötö ndraono Merari andrö, nihalö-halöra ba nose wama'ele'ö, barö mbawa Gitamari andrö, ono Ga'aroni ere.

Fangofaya Ono Lewi, si tola mangai halöŵö

IV. 34 Ba la'ofaya ndraono Gahati ira Moze A'aroni ba satua mbanua, sawu-sawu ba sambu-sambua watalifusöta, 35 i'otarai zi 30 fakhe ba si a'a moroi andrö, irege zi 50 fakhe, dozi si möi ba halöŵö andrö, ba nihalö-halö ba nose wama'ele'ö. 36 Ba fa'ato ni'ofaya andrö, sawu-sawu, ba no 2.750. 37 Da'ö ni'ofaya nga'ötö Gahati, dozi si so halöŵö ba nose wama'ele'ö, ni'ofaya ndra Moze A'aroni, dali ni'oroi'ö Yehowa khö Moze.

38 Ba ba ni'ofaya iraono Gereso, sawu-sawu ba sambu-sambua watalifusöta, 39 i'otarai zi 30 fakhe ba si a'a moroi andrö, irege zi 50 fakhe, dozi si möi ba halöŵö andrö, ba nihalö-halö ba nose wama'ele'ö, ba fa'ato ni'ofaya, 40 sawu-sawu ba sambu-sambua watalifusota, ba no 2.630. 41 Da'ö ni'ofaya nga'ötö ndraono Gereso, dozi si so halöŵö ba nose wama'ele'ö, ni'ofaya ndra Moze A'aroni, dali goroisa Yehowa. 42 Ba ba ni'ofaya nga'ötö ndraono Merari, sawu-sawu ba sambu-sambua watalifusöta, 43 i'otarai zi 30 fakhe ba si a'a moroi andrö, irege zi 50 fakhe, dozi si möi ba halöŵö andrö, ba nihalö-halö ba nose wama'ele'ö, 44 ba fa'atö ni'ofaya andrö, sawu-sawu, ba no 3.200.

45 Da'ö ni'ofaya andrö, nga'ötö ndraono Merari, ni'ofaya ndra Moze A'aroni, dali ni'oroi'ö Yehowa khö Moze. 46 Ba ba ni'ofaya andrö fefu, ni'ofaya ndra Moze A'aroni ba satua Ndraono Gizeraeli, Ono Lewi sawu-sawu ba sambu-sambua watalifusöta, 47 i'otarai zi 30 fakhe ba si a'a moroi andrö, irege zi 50 fakhe, si möi ba wangai halöŵö andrö, ba nose wama'ele'ö ba ba halöŵö fonoro andrö, 48 fa'ato ni'ofaya andrö khöra, ba no 8.580.

49 Ba lafataro ba halöŵönia zamösana — Moze zamaigi — dali goroisa Yehowa, hadia halöŵöra, hadia norora, ni'ofayania andrö, dali niŵa'ö Yehowa khö Moze.

Famotokhi ba gahe

Fabaliŵa lala

Olayama Moze IV: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö