Wb/nia/Moze IV/13

I. Tefatenge zamauze tanö Gana'ana

1 Ba humede Yehowa khö Moze, imane: 2 Fatenge niha, ena'ö lafauzei danö Gana'ana andrö, nibe'egu ba Ndraono Gizeraeli dania; samösa zambua mado mifatenge, ha sambalö salaŵara.

3 Ba ifatenge Moze, moroi ba danö si mate Farana, dali goroisa Yehowa, ha sambalö si no salaŵa ba Ndraono Gizeraeli. 4 Ba da'e döira: Mado Rubeno, ba Samua, ono Zakuri; 5 ba mado Zimeoni, ba Safata, ono Hori; 6 ba mado Yuda, ba Kalebi, ono Yefune; ba mado Izasari, 7 ba Igeala, ono Yosefo; ba mado Geferayi, 8 ba Hosea, ono Nuni; 9 ba mado Mbeniyami ba Falati, ono Rafu, 10 ba mado Zebuloni, ba Gadieli, ono Zodi; ba mado Yosefo, 11 mado Manase andrö, ba Gadi, ono Zusi; ba mado Dano, ba Amieli, 12 ono Gamali; ba mado Gaseri, 13 ba Seturo, ono Mikha'eli; 14 ba mado Nafetali, ba Nahebi, ono Wofisi; 15 ba mado Gado, ba Göeli, ono Makhi.

16 Da'ö döi niha andrö nifatenge Moze, ba wamauze tanö. Ba töi Hosea andrö, ono Nuni, ba Yosua ibe'e Moze.

17 Ba ifatenge ira Moze ba wamauze tanö Gana'ana andrö. Ba imane khöra: Mi'ae miyaŵa ba da'ö ba danö tanö raya, misösö hili andrö; 18 mifaigi he wisa danö andrö, ba na sabölö niha andrö, si so ba danö, ba na samomo, ba na sambö fa'ato, ba na si no ato; 19 he wisa gamuata danö andrö, ba zi so ira, na si sökhi, ba na si lö sökhi, ba he wisa mbanua, nahiara andrö, na ba danö manö so ira, ba na ba mbanua saro; 20 ba he wisa nowi göi, na satabö sinanö, ba na safuo; na so döla geu, ba na lö'ö. Ba mi'abe'e'ö sa'ae dödömi ba mi'ohe ba da'e ösa mbua danö! Ba no baŵa mbua nagu sahulö.

21 Ba möi ira misi yaŵa, lafauzei danö, i'otarai danö si mate Sini andrö, irugi Rehobi, irege wabaliŵa lala ba Hamata.

II. Möi ira

22 Möi ira misi yaŵa ba danö tanö raya ba larugi Heberona, banua ndra Ahima, Sezai, Talamai, nga'ötö Genaki andrö. Ba Heberona andrö, ba mewitu fakhe föna wanaru'ö Soana ba danö Miserayi tetaru'ö mege.

23 Ba me larugi ndraso Esikoli andrö, ba lataba zara ndraha nagu, fabaya bua, sangamohi, ba darua zamabea, ba lahalö göi mbua dalimo ösa ba bua ara ösa. 24 Ba andrö wa labe'e töi ndraso andrö ndraso Esikoli, ba mbua nagu andrö, nitaba Ndraono Gizeraeli ba da'ö.

III. Abu dödö zato, ba irara Kalebi

25 Ba me no irugi 40 wongi, me no lafauzei danö, ba lafuli ira. 26 Mowaö-waö ira, ba larugi ndra Moze A'aroni ba Iraono Gizeraeli fefu, sato, ba danö si mate Farana, ba Gadesi; ba la'ombakha'ö khöra ba ba zato fefu lua-lua, ba la'oroma'ö khöra mbua danö andrö.

27 Ba ladunö-dunö khö Moze, lamane: No marugi danö andrö, nifatengeu ya'aga. Si ndruhu sa, si falawu susu ba ŵe ŵani, ba ya'e mbua danö; 28 ba si ndruhu göi niha andrö, si so ba danö, ba no sabölö, ba banua, ba saro ba sebua sibai, ba noa göi ma'ila ba da'ö nga'ötö Genaki andrö. 29 Ba danö tanö raya, ba Iraono Gamaleki; ba ba hili, ba Iraono Kheti, ba Iraono Yebusi ba Iraono Gamori; ba Dawa Gana'ana zi hene asi ba fatambai Yoridano.

30 Ba Kalebi zondrara tödö zato ba khö Moze, imane: Möi zui ita misi yaŵa, tahalö khöda danö; tenga safökhö sibai wolaŵa ya'ira!

31 Ba lamane awönia si fao khönia mege misi yaŵa: Tebai tasuwö niha andrö, no sabölö abe'e ira! 32 Ba si lö sökhi la'ombakha'ö ba Ndraono Gizeraeli, ba danö andrö, nifauzeira, lamane: Tanö andrö nitöröima, ba wamauze ya'ia, ba i'aga-aga niha si so ba khönia, ba niha andrö fefu, ni'ilama ba da'ö, ba no si tenga inötö fa'ebua. 33 Ba no ma'ila göi ba da'ö niha andrö sebua sibai, nga'ötö Genaki andrö, awö zebua sibai andrö, ba amaedola lareŵe ndra'aga fönara, wamaigima, ba si manö göi wamaigira.

Famotokhi ba gahe

Fabaliŵa lala

Olayama Moze IV: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö