Wb/nia/Mataio/8
I. Ifadöhö mbou auri Yesu[edit | edit source]
1 Ba ato zolo'ö ya'ia,[1] me möi ia mitou, moroi ba hili.
2 Ba hiza zobou auri[2], si möi khönia, mangalulu khönia, imane: He Tua, ö'ila öfadöhö wökhögu, na edöna ndra'ugö.
3 Ba i'oro'ö dangania, ibabaya, imane: Edöna ndra'o, yadöhö! Ba i'anema'ö döhö mbou aurinia. 4 Ba imane khönia Yesu: Faigi, fa böi ö'ombakha'ö ba niha, ba ae oroma'ö ndra'ugö khö gere ba be'e game'ela andrö, niŵa'ö Moze, ba wamaduhu'ö khöra.[3]
II. Ifadöhö wökhö zawuyu gumandra ba Gafanauma[edit | edit source]
5 Ba me möi ia miyomo ba Gafanauma[4] ba i'ondrasi ia kumandra, mangandrö khönia, imane: 6 He Tua, so yomo zawuyugu, tou ba zalo manö, no mate dambai, a'oi so wa'afökhö.
7 Imane khönia: Möido mufadöhö wökhönia.
8 Ba itema linia kumandra andrö, imane: He Tua, ambö ndra'o möi'ö ba nomogu,[5] ba hede manö, ha sambua li, ba döhö wökhö zawuyugu.[6]
9 Ya'odo sa göi, ba no niha si so barö mbawa zalaŵa, ba so barö mbawagu zaradadu, ba na uŵa'ö ba zi samösa: Ae'e, ba mofanö ia, ba ba zi samösa: Aine, ba so ia; ba na uŵa'ö khö zawuyugu: Halöŵöu da'ö, ba ihalö.
10 Ba me irongo da'ö Yesu, ba ahöli-höli dödönia, ba imane ba zolo'ö ya'ia: Si ndruhu niŵa'ögu khömi, ba Ndraono Gizeraeli na i, ba lö nisöndragu famati si manö. 11 Ba uŵa'ö khömi, ato dania zi otarai danö ba gatumbukha, awö zi otarai danö ba gaekhula ba manga ira, awö ndra Aberahamo, Iza'aki, Yakobo ba mbanua zorugo andrö,[7] 12 ba nitibo'ö baero nono mbanua andrö ba zogömi-gömi, baero sibai, ba fege-ege dania ba da'ö, ba fatangisa mboha.[8]
13 Ba imane Yesu khö gumandra andrö: Fuli'ö, ya'itörö zi faduhu dödöu. Ba ba da'ö sibai döhö wökhö zawuyu no mege.[9]
III. Ifadöhö wökhö matua Wetero[edit | edit source]
14 Ba me möi yomo Yesu ba nomo Wetero,[10] ba i'ila matuania ira alawe, tou ba zalo, akhömö.[11] 15 Ba ira'u danga ba döhö wa'akhömö, maoso ia mangai gö Yesu.
16 Ba me bongi, ba ato la'ohe khönia sobekhu; ba ifofanö mbekhu linia ba dozi sofökhö, ba ifadöhö wökhö. 17 Ena'ö itörö niŵa'ö Yesaya, sama'ele'ö andrö, me imane: No iheta wa'atebaida ba no yaia zolu'i fökhöda[12]
IV. Ifahaö ira ba wolo'ö ya'ia[edit | edit source]
18 Ba me i'ila Yesu, ato niha, sowulo khönia, ba iŵa'ö la'ötö mbaŵa.[13]
19 Ba i'ondrasi ia sangila amakhoita, samösa, imane khönia: He samahaö, u'o'ö ndra'ugö, gofu heza möi'ö.[14]
20 Ba imane khönia Yesu: So dögi narö hili ba zigölu[15] ba so gazuni ba wofo ba dalu mbanua, ba khö Nono Niha, ba lö naha wemörö.[16]
21 Ba imane khönia nifahaö bö'ö: He Tua, tehe khögu, ena'ö möido ua mogo'o amagu.
22 Ba imane khönia: O'ö ndra'o ba ndramuko'o zi mate khöra niha si mate.[17]
V. Itenaŵa mbade[edit | edit source]
23 Ba me möi ia baowo,[18] ba la'o'ö ia nifahaönia. 24 Ba hiza, ilabu bade sabe'e ba mbaŵa andrö, tobali tehawu dulu nowo, ba ya'ia, ba no mörö.
25 Ba la'ondrasi ia, lasusugi, lamane: Tolo Tua, tekiko ita!
26 Ba imane khöra: Ha lö ata'u ami, sambö famati![19] Awena maoso ia, itenaŵa nangi, awö ndrulu, ba tobali ahono sibai.[20]
27 Ba ahöli-höli dödö niha, lamane: Ha niha da'ö, me lafondro-ndrongo göi linia angi ba dulu?
VI. Ifadöhö wökhö zobekhu[edit | edit source]
28 Ba me irugi si yefo,[21] danö mbanua Gadara, ba falukha ia niha sobekhu, darua, la'otarai lewatö, no owöhö sibai, tebai itörö lala andrö niha bö'ö labe'e.
29 Ba hiza, mu'ao ira, lamane: Hadia niŵa'öu khöma, Ono Lowalangi? Hadia, ba wamakao ya'aga möi'ö ba da'e, ba tenga inötö na?[22]
30 Ba so ba da'ö, saröu khöra, mbawi, sambawa sebua, nikubaloi. 31 Ba la'andrö khönia bekhu andrö, lamane: Na öfofanö ndra'aga, ba fatengega ba mbawi si sambawa andrö.
32 Ba imane khöra: Mi'ae'e.
Ba laröi niha andrö, lasaŵa mbawi. Ba hiza, fagohi ira ba zanaere, latibo'ö ira ba mbaŵa, sambawa manö, ba alömö.
33 Ba moloi gubalo, lasaŵa mbanua, ba la'ombakha'ö da'ö fefu, ba hadia ia ba zobekhu andrö.
34 Ba hiza, möi ira baero, samba banua manö, ba wamaondragö Yesu, ba me la'ila ia, ba la'andrö khönia, ena'ö iheta ia ba danöra andrö.
Famotokhi ba gahe[edit | edit source]
- ↑ Ayati 1–4: Mar 1:40–45; Luk 5:12–15
- ↑ Sobou auri no sambua wökhö nifobörö bakteri sotöi Mycobacterium leprae samofökhö uli ba uo nifotöi saraf. Ibunu raso bakteri andre, irege lö taraso afökhö guli heŵa'ae ibörögö obou irugi atoru manö ia. Ba ginötö Yesu ata'u sibai niha wökhö andre. Andrö latibo'ö baero mbanua niha si göna sobou auri.
- ↑ Luk 17:14; MozIII 14:2 b.t.
- ↑ Ayati 5–13: Luk 7:1–10
- ↑ Ambö ndra'o: tenga da'a zi so ba teks asli ba li Yunani. Ba da'ö tesura οὐκ ἱκανὸς (ouk hikanos) eluahania tenga sinangea. Andrö famo'eluaha satulönia: He Tua, tenga sinangea ndra'o na möi'ö ba nomogu. Ba hiza hede manö sambua li, ba döhö wökhö zawuyugu.
- ↑ Sin 107:20
- ↑ Luk 13:29
- ↑ Faigi 23:13; 25:30
- ↑ Faigi 9:22,29; 15:28
- ↑ Ayati 14–17: Mar 1:29–34; Luk 4:38–40
- ↑ KorI 9:5
- ↑ Yes 53:4; FetI 2:24
- ↑ Luk 8:22
- ↑ Luk 9:57 b.t.
- ↑ Sigölu: tenga da'a zi so ba teks asli Yunani. Ba da'ö tesura ἀλώπεκες (alōpekes), aurifö ba gatua si hulö asu (li Indonesia rubah). Satulönia asu gatua tenga sigölu.
- ↑ KorII 8:9
- ↑ Efes 2:1 b.t.
- ↑ Ayati 23–27: Mar 4:35–41; Luk 8:23–25
- ↑ Ha lö atau'u ami: ba teks asli Yunani tesura hana wa ata'u sibai ami
- ↑ Faigi 14:31; Sin 107:29
- ↑ Ayati 28–34: Mar 5:1–20; Luk 8:26–39
- ↑ Mar 1:24; Luk 4:41
Fabaliŵa lala[edit source]
Sura Mataio: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö