Wb/nia/Mataio/4
I. Itandraigö Yesu afökha[edit | edit source]
1 Aefa da'ö,[1] ba i'ohe ba danö si mate Yesu Eheha, ena'ö itandraigö ia Afökha.[2] 2 Ba me lö si manga ia, öfa wulu wongi wa'ara, ba olofo ia, me aefa da'ö.
3 Ba möi khönia zanandraigö andrö, imane khönia: Na ono Lowalangi ndra'ugö, ba ŵa'ö, ena'ö tobali roti gara andre.
4 Ba itema linia, imane: "Tenga ha ba gönia auri niha, ba ngawalö li fefu, si otarai mbawa Lowalangi, auri ia". [3]
5 Ba i'ohe ia ba mbanua ni'amoni'ö andrö Afökha, ba mbumbu gosali ifa'aso. 6 Ba imane khönia: Na ono Lowalangi ndra'ugö, ba tibo'ögö tou, noa sa so ba zura: "Iŵa'ö ba mala'ika andrö khönia dania, ba khömö andrö, ba lataya tangara ndra'ugö, fa lö manendre gaheu ba gara."[4]
7 Imane khönia Yesu: So göi ba zura: "Böi tandraigö Zo'aya, Lowalangiu." [5]
8 Ba i'ohe zui ia Afökha, ifasao ba hili salaŵa sibai, i'oroma'ö khönia mbanua ba guli danö fefu, awö lakhöminia, 9 ba imane khönia: Ahori ube'e khöu da'ö, na ötuhi danö, ba wangalulu khögu.
10 Ba imane khönia Yesu: Beta'ögö Satana! Noa sa so ba zura: "khö Zo'aya, Lowalangiu, mangalulu ndra'ugö ba ha ya'ia öfosumange". [6]
11 Awena iröi ia Afökha, ba hiza, ba la ondrasi ia mala'ika, möi ira ngoni-ngoninia.[7]
II. Möi ba Galilaia Yesu[edit | edit source]
12 Ba me irongo Yesu,[8] no tekuru Yohane, ba ifuli ia ba Galilaia.[9]
13 Ba iheta ia ba Nazareta, möi ia fatewu ba Gafanauma, ba zinga mbaŵa nidanö andrö, ba danö mado Nafetali, ba ngai mado Zebuloni.[10] 14 Ena'ö itörö niŵa'o Yesaya, sama'ele'ö andrö, me imane: 15 "Tanö Ndraono Zebuloni ba tanö Ndraono Nafetali, tanö ba zinga mbaŵa, yefo Yoridano. Galilaia niha baero andrö, niha andrö, 16 sidadao ba zogömi-gömi, ba no la'ila haga sebua, ba no tumbu haga ba zidadao ba danö wa'amate ba ba lumö wa'amate."[11]
17 I'otarai da'ö, ba ibörötaigö mangombakha Yesu, imane: Mifalalini gera-erami, noa sa'ae ahatö mbanua zorugo andrö![12]
III. Ikaoni nifahaönia si föföna andrö[edit | edit source]
18 Ba me mowaö-waö ia ba zinga mbaŵa Galilaia andrö,[13] ba i'ila niha, si fatalifusö, Simoni, nifotöi Fetero ba Andrea talifusönia, lalau giri ba mbaŵa, me no tuka giri ira.[14]
19 Ba imane khöra: Mi'o'ö ndra'o, ba ubali'ö sama'u'u niha ami.
20 Ba i'anema'ö laröi giri, ba la'o'ö ia. [15]
21 Ba me mofanö ia ba da'ö, ba i'ila danö bö'ö, darua zui, si fatalifusö göi, Yakobo, ono Zebedaio ba Yohane, talifusönia, no so ba dundraha, awö namara Sebedaio, mamönö kirira. Ba humede ia khöra.
22 Ba la'anema'ö laröi dundraha, awö namara, ba la'o'ö ia.
IV. Mamahaö ia ba mamadöhö fökhö[edit | edit source]
23 Ba itöröi danö Galilaia ma'afefu, mamahaö ia ba zekola khöra ba manuriagö turia somuso dödö, turia mbanua Lowalangi andrö, ba ifadöhö ngawalö wökhö fefu, awö ngawalö wa'atebai, ba niha. [16]
24 Ba humöngö duriania ba danö Ziria ma'asagörö. Ba la'ohe khönia fefu zofökhö, hadia ia ngawalö wökhö, ma hadia ia zafökhö khöra, awö zobekhu, awö zaniri, awö zi no mate dambai, ba ifadöhö.[17]
25 Ba ato zolo'ö ya'ia banua Galilaia, ba si fulu banua, ba banua Yeruzalema, ba banua Yudaia, ba banua yefo Yoridano andrö.[18]
Famotokhi ba gahe[edit | edit source]
- ↑ Ayati 1–11: Mar 1:12,13; Luk 4:1–13
- ↑ Heb 4:15; MozI 3
- ↑ MozV 8:3
- ↑ Sin 91:11 b.t.
- ↑ MozV 6:16
- ↑ MozV 6:13; Fam 22:8,9
- ↑ Heb 1:14
- ↑ Ayati 12–17: Mar 1:14,15; Luk 4:14,15
- ↑ Faigi 14:3; Luk 4:14,15
- ↑ Luk 4:16–31
- ↑ Yes 9:1,2
- ↑ Faigi 3:2
- ↑ Ayati 18–22: Mar 1:16–20; Luk 5:1–11
- ↑ Yoh 1:35 b.t.
- ↑ Faigi 19:27
- ↑ Faigi 9:35; HalZin 10:38
- ↑ Mar 3:7 b.t.
- ↑ Luk 6:17 b.t.
Fabaliŵa lala[edit source]
Sura Mataio: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö