Wb/nia/Mataio/27
I. La'ohe khö Wilato Yesu[edit | edit source]
1 Ba me no moluo, ba mamagölö ndra ere sebua fefu, awö zatua mbanua andrö, ba khö Yesu, ba wamunu ya'ia.[1] 2 Ba laböbö ia, la'ohe, labe'e ba danga gumandru, Filato.[2]
II. Fa'amate Yuda[edit | edit source]
3 Ba me i'ila Yuda andrö, si no manga mbölinia, la'etu'ö huku, ba mangesa dödönia; ba ifuli zi tölu ngafulu rufia, ba gere sebua ba ba zatua mbanua andrö, 4 imane: Horögu, me no u'a mböli ndro zi lö horö.
Ba lamane: Hana wa öfuli, khöma? Faigi, he öwisa.
5 Ba itibo'ö ba gosali rufia andrö ilau mofanö, möi ia muhie mbaginia.[3]
6 Ba lahalö rufia andrö ira ere sebua, lamane: Lö tola tabe'e ba naha game'ela, me böli ndro. 7 Ba mamagölö ira, ba labe'e böli mbenua zamözi bowoa andrö, nibe'e lewatö zikoli. 8 Andrö labe'e töi mbenua andrö mbenua ndro, irugi ma'ökhö andre.[4]
9 Ba da'ö itörö niŵa'ö Yeremia andrö, sama'ele'ö, me imane: "Ba lahalö zi tölu ngafulu rufia andrö, böli nifatö böli andrö, nifatö Ndraono Gizeraeli böli,[5] 10 ba labe'e böli mbenua zamözi bowoa andrö; u'o'ö niŵa'ö Zo'aya khögu."
III. La'etu'ö huku Yesu[edit | edit source]
11 Ba föna gumandru so Yesu.[6] Ba isofu khönia kumandru, imane: Hadia, razo niha Yehuda ndra'ugö?
Ba imane Yesu: Ya'ia niŵa'öu.
12 Ba me la'adugö ia ere sebua ba satua mbanua andrö, ba lö'ö manö itema li.[7]
13 Ba imane khönia Filato: Hadia, lö örongo, hadia ia fefu, wangadugöra ya'ugö?
14 Ba lö itema linia, sambua li lö'ö, töbali ahöli-höli sibai dödö gumandru.
15 Ba no muböwögö, ero na owasa ibe'e aefa kumandru ba zato zamösa nikuru, ha niha zomasi ira. 16 Ba so khöra nikuru, safaito, me luo da'ö, Baraba döinia.
17 Ba me owulo ira, ba imane khöra Filato: Ha niha zomasi ami, u'efa'ö khömi, Baraba andrö, ba ma Yesu andrö, nifotöi Keriso? 18 Noa sa i'ila, börö wa'afökhö dödö, wa labe'e ia ba dangania.
19 Ba me dumadao ia ba dadaoma zanguhuku, ba ifatenge khönia fo'omonia, imane: Böi babaya niha satulö andrö, noa sa tefakao sibai ndra'o, ba khönia andrö, ba wangifi me owi.
20 Ba lafawe'e zato ira, ere sebua ba satua mbanua andrö, ena'ö la'andrö Mbaraba andrö, ba ena'ö lafakiko Yesu.[8]
21 Ba humede kumandru, imane khöra: Ha niha zomasi ami u'efa'ö khömi, ba zi darua andrö?
Ba lamane: Baraba andrö.
22 Imane khöra Filato: Ba he uwisa khö Yesu andrö, nifotöi Keriso?
23 Lamane fefu: Niforöfa!
Ba imane: Ba hadia horönia?
Ba monönö we'aora, lamane: Niforöfa!
24 Ba me i'ila Filato, lö'ö manö manandrösa, ba tedou manö wagua-guasa, ba ihalö nidanö, isasai dangania, föna zato, imane: Lö horögu ba ndro da'e; mifaigi he miwisa.[9]
25 Ba latema linia niha sato fefu, lamane: Yamöi ba huluma ndronia ba ba hulu ndraonoma.[10]
26 Ba aefa da'ö, ba i'efa'ö khöra Mbaraba andrö, ba Yesu, ba ifabözi'ö ba ibe'e niforöfa.
IV. La'o'aya ia[edit | edit source]
27 Ba la'ohe ba gödo Yesu saradadu gumandru andrö,[11] ba la'owuloi khönia zi sabari andrö fefu.
28 Ba laheta khönia nukhania, ba lafobaru ia baru luo soyo. 29 Ba lalalau dakula doi ba lafotakula ia ba sara zukhu labe'e ba dangania kambölö, ba latuhi danö fönania, la'o'aya ia, lamane: Ya'ugö, razo niha Yehuda? 30 Ba ladidiloi ia, lahalö zukhu no mege, ba lahare'ö ba högönia.
V. Laforöfa ia[edit | edit source]
31 Ba me no aefa la'o'aya ia,[12] ba laheta khönia mbaru luo andrö, ba lafonukha ia nukhania, ba la'ohe ia misa, ba wamoröfa ya'ia.
32 Ba me möi ira baero, ba falukha ira niha, banua Girene, Simoni döinia, ba lara'u da'ö, ba wolohe röfania.[13]
33 Ba me larugi naha andrö, sotöi Gologota — 34 sokamu'u geluaha — ba lafabadugö khönia nagu nifaruka awökhu,[14] ba me no itandra, ba lö edöna ibadu.[15]
35 Ba me no laforöta ia, ba lafosasi nukhania, fadahö-dahö ira.[16] 36 Ba dumadao ira, manaro ya'ia ba da'ö.
37 Ba labe'e yaŵa högönia mbörö wa'amatenia, sura: "Yesu da'e, razo niha Yehuda."
38 Ba laforöfa awönia zamara'u, darua, samösa ba gambölö ba samösa ba gabera.[17]
39 Ba latandrawaisi ia sanörö, lafalikhö ira,[18] 40 ba lamane: He sanudugö osali andrö, ba sangotomosi ya'ia, si ha tölu ngaluo, orifi ndra'ugö, na Ono Lowalangi ndra'ugö; ba ae tou moroi ba röfa andrö![19]
41 Si manö göi ndra ere sebua, la'o'aya ia, awö zangila amakhoita awö zatua mbanua andrö, lamane: 42 Niha bö'ö, ba no i'orifi, ba tebai i'orifi ia. Razo Ndraono Gizeraeli ia, yamöi tou iada'e moroi ba röfa, ba mamati sa'ae ita khönia. 43 No faduhu dödönia khö Lowalangi, ba yamu'efa'ö ia da'ö iada'e, na i'omasi'ö ia: noa sa iŵa'ö: Ono Lowalangi ndra'o.[20]
44 Ba si manö göi zamara'u andrö, niforöfa awönia, wanandraŵaisi ya'ia.
VI. Mate ia[edit | edit source]
45 Ba i'otarai laluo,[21] ba tobali ogömi-gömi ba danö ma'asagörö, irugi labözi tölu.[22]
46 Ba so labözi tölu, ba mu'ao Yesu, ebua li, imane: Eli! Eli! lema sabakhtani? He Lowalangigu! He Lowalangigu! hana wa no ö'erogö ndra'o? geluahania.[23]
47 Ba lamane ösa, si so ba da'ö, me larongo da'ö: Mogaoni Eliya da'ö.[24]
48 Ba i'anema'ö fagohi zamösa khöra, ihalö rabo,[25] ifo'ösi niro aisö,[26] ibe'e ba mbalö zukhu ba ifabadugö khönia. 49 Ba lamane tanö bö'ö: Böi ua! datafaigi, na möi Geliya, ba wangorifi ya'ia.
50 Ba ifuli mu'ao Yesu, ebua li, ba aetu noso.
51 Ba hiza, asika mba'a-ba'a andrö ba gosali, fabali, i'otarai si yaŵa, numalö mitou, ba moduru danö, fabali gara,[27] 52 ba teboka lewatö ba oya zi maoso boto niha ni'amoni'ö, si no mate, laröi lewatö, 53 me no aefa maoso Yesu, möi ira ba mba nua ni'amoni'ö andrö, ato zangila ya'ira.
54 Ba me la'ila ira kumandra andrö ba awönia sanaro Yesu, ndruru danö andrö ba hadia ia fefu, ba ata'u sibai ira, lamane: Duhu, Ono Lowalangi da'ö.
55 Ba ato zi so ba da'ö ira alawe, samaigi-maigi, moroi ba zaröu, si no molo'ö Yesu, moroi ba Galilaia, si no möi ngoni-ngoninia; 56 ira Maria, banua Magadala, ba Maria ina ndra Yakobo Yosefo, ba ina nono Zebedaio andrö.
VII. Lako'o ia[edit | edit source]
57 Ba mafi owi,[28] ba so niha so'ana'a banua Garimatia, Yosefo döinia, si no möi nifahaö Yesu göi. 58 Da'ö zi möi khö Wilato, mangandrö boto Yesu andrö. Ba i'oroi'ö Filato labe'e.[29]
59 Ba ihalö mboto Yosefo, i'olohuni muko si sökhi, 60 ba ibe'e ba lewatö si bohou khönia, nifakharu'önia ba gara, ba ifagaölö gowe sebua ba mbawa lewatö andrö, ba mofanö ia.[30]
61 Ba so ba da'ö Maria andrö, banua Magadala ba Maria si sambua andrö, dumadao ira ba gamaudu lewatö.
VIII. Latarogö lewatö[edit | edit source]
62 Ba sara wongi aefa da'ö, me no aefa luo wangehao andrö, ba falukha ndra ere sebua ba farizaio, khö Wilato,[31] 63 lamane: He Tua, no itörö tödöma, wa no iŵa'ö samaelungu andrö, me lö si mate ia na: Na aefa tölu ngaluo, ba maoso ndra'o;[32] 64 andrö oroi'ö, ena'ö latarogö lewatö, irege tölu ngaluo, fa böi möi nifahaönia andrö managö ya'ia, ba ma lamane dania ba niha: No maoso ia moroi ba ngai zi mate, ba tobali abölö-bölö wamaelungu safuria andrö, moroi ba zi föföna.
65 Imane khöra Filato: Labe'e khömi zanaro; mi'ae'e, mihaogö wanaro.
66 Ba möi ira, lafotandro gowe ba lafatarogö'ö lewatö ba zanaro no mege.
Famotokhi ba gahe[edit | edit source]
- ↑ Mar 15:1; Luk 22:66–71
- ↑ Faigi 20:19; Luk 23; Yoh 18:28
- ↑ HalZin 1:18
- ↑ HalZin 1:19
- ↑ Sakh 11:13
- ↑ Ayati 11–26: Mar 15:2–15; Luk 23:2–4,17–25; Yoh 18:33–40
- ↑ Faigi 26:63
- ↑ HalZin 3:13,14
- ↑ MozV 21:6 b.t.; Sin 26:6
- ↑ Faigi 23:35; HalZin 5:28
- ↑ Ayati 27–30: Mar 15:16–19; Yoh 19:1–3
- ↑ Ayati 31–44: Mar 15:20–32; Luk 23:26,33–39; Yoh 19:16–24
- ↑ Heb 13:12,13
- ↑ Agu nifaruka awökhu: Asese lafabadugö da'a ba niha nifakao me föna ena'ö ambö taraso khöra wamakaora.
- ↑ Sin 69:22; Amaed 31:6
- ↑ Sin 22:19
- ↑ Luk 23:32; Yes 53:12
- ↑ Sin 22:8
- ↑ Faigi 26:61; 4:3,6
- ↑ Sin 22:9
- ↑ Ayati 45–56: Mar 15:33–41; Luk 23:44–49; Yoh 19:28–30
- ↑ Labözi tölu: Me föna lö tandraluo. Ena'ö la'ila sobanua wa no irugi sambua za, labözi zi'öli si terongo ba mbanua. Moroi ba da'ö wehede mamözi (li Indonesia pukul).
- ↑ Sin 22:2
- ↑ Faigi 17:10
- ↑ Rabo: li Indonesia sepon, li Inggris sponge
- ↑ Niro aisö: faigi geluaha nagu nifaruka awökhu
- ↑ MozII 26:31; Heb 10:19,20
- ↑ Ayati 57–61: Mar 15:42–47; Luk 23:50–55; Yoh 19:38–42
- ↑ MozV 21:23
- ↑ Yes 53:9
- ↑ Yoh 19:14
- ↑ Faigi 16:21; 17:23
Fabaliŵa lala[edit source]
Sura Mataio: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö