Wb/nia/Mataio/16
Tandra moroi ba mbanua si yaŵa[edit | edit source]
I. 1 Ba möi khönia warizaio ba sadukaio,[1] latandraigö ia, la'andrö khönia, ena'ö na i'oroma'ö khöra dandra, moroi si yaŵa ba mbanua.[2]
2 Ba itema li, imane khöra: Na tanö owi, ba mimane: Lökhö dania, me no oyo mbanua;[3] 3 ba na mahemolu mbanua, ba mimane; Moteu sabölö-bölö ma'ökhö, me no oyo mbanua ba me no alu. Amuata mbanua andrö, ba mi'ila mihuku, ba tandra ginötö andrö, ba tebai mihuku. 4 La'alui dandra niha si lö sökhi, sohorö-horö, ba lö tebe'e khöra dandra, ha tandra khö yona andrö. Ba iröi ira, mofanö ia.[4]
Tanömö roti warizaio andrö[edit | edit source]
II. 5 Ba me no larugi si yefo ira nifahaö, ba no olifu ira wolohe roti.
6 Ba imane khöra Yesu: Mifaigi, mi'angelama ba danömö roti warizaio andrö ba ba danömö roti zadukaio.[5]
7 Ba lafatou-tou tödöra, lamane: Me lö ni'oheda roti.
8 Ba me i'ila da'ö Yesu, ba imane: Hadia nifatou-toumi tödömi, sambö famati, wa lö ni'ohemi roti?
9 Hadia, lö'ö na saboto ba dödömi, ba hadia, lö itörö tödömi roti no, si lima ba zi lima ngahönö niha ba ha uga kude ni'ozaragömi?[6] 10 Ba he roti si fitu ba zi öfa ngahönö niha, ba ha uga kude ni'ozaragömi?[7]
11 Hana wa lö aboto ba dödömi, wa tenga roti niŵa'ögu khömi, me umane: Mi'angelama ba danömö roti warizaio andrö ba ba danömö roti zadukaio?
12 Awena aboto ba dödöra, wa tenga da'ö niŵa'önia: Mi'angelama ba danömö roti warizaio andrö ba ba danömö roti zadukaio, wa famahaö warizaio ba famahaö zadukaio niŵa'önia.
Famaduhu'ö Wetero[edit | edit source]
III. 13 Ba me irugi Yesu danö Kaisaria Wilifo,[8] ba isofu khö ndra nifahaönia, imane: Hadia laŵa'ö niha, ha niha Nono Niha?
14 Ba lamane: So zanguma'ö Yohane andrö, samayagö idanö ba so zanguma'ö Eliya, ba so, ba Yeremia lawa'ö, ba ma fasamösa zama'ele'ö andrö.[9]
15 Ba imane khöra: Ba ya'ami, ba ha miŵa'ö, ha niha ndra'odo?
16 Ba itema li Simoni Fetero, imane: Keriso ndra'ugö, Ono Lowalangi sauri andrö.[10]
17 Ba itema linia Yesu, imane khönia: Ya'ahowu ndra'ugö Simoni, ono Yona, me no tenga niha zama'ele'ö khöu da'ö, me Amagu andrö, si so ba zorugo, zama'ele'ö.[11] 18 Ba ya'odo göi, uŵa'ö khöu: Fetero ndra'ugö, ba ba dete gowe andrö utaru'ö mbanuagu andrö dania, ba lö lalaŵa ia bawa göli mbanua tou.[12] 19 Ube'e dania khöu wogoe mbanua zorugo andrö, ba na so niböbömö ba guli danö, ba niböbö göi ba zorugo, ba hadia ni'efa'öu ba guli danö, ba ni'efa'ö göi ba zorugo.[13]
20 Aefa da'ö iŵa'ö khö ndra nifahaö, böi laŵa'ö ba niha, wa Keriso ia.
Ibörötaigö mangombakha famakao ya'ia Yesu[edit | edit source]
IV. 21 I'otarai da'ö,[14] ba ibörötaigö Yesu ibokai khö ndra nifahaönia, wa lö tola lö möi ia ba Yeruzalema, awö wa la'oya'ö dania wamakao ya'ia satua andrö ba ere sebua ba sangila amakhoita, awö wa labunu dania ia, awö wa tesusugi dania ia, na no irugi tölu ngaluo.[15]
22 Ba isöbi ia khönia Fetero, ibörötaigö itenaŵa, imane: Yamutimba khöu Lowalangi, Tua! Böi göna ndra'ugö si manö.
23 Ba ibali'ö ia, imane khö Wetero: Ae furigu, Satana! fangalagu ndra'ugö; me lö öfatou-tou zomasi Lowalangi, ha somasi niha öfatou-tou.[16]
Ifobawa lala ba wolo'ö ya'ia[edit | edit source]
V. 24 Aefa da'ö, ba imane Yesu khö ndra nifahaönia: Na so zedöna molo'ö ya'o, ba yamu'ositengagö ia ba yamulu'i röfania ba yamu'o'ö ndra'o.[17]
25 Ba zangalui fa'anau nosonia, aetu ia, ba saetu noso, na börö ndra'o, da'ö zanöndra ya'ia.[18]
26 Hadia sa guna ba niha, na isöndra harenia fefu hadia ia zi so ba guli danö, ba na te'ala ia nosonia? Ba hadia ena'ö nibe'e niha höli nosonia?[19]
27 So sa dania Nono Niha, so khönia lakhömi Namania, awönia mala'ika khönia, ba ba da'ö ibe'e zulö ba zamösana, dali mbua-buania.[20]
28 Si ndruhu niŵa'ögu khömi, so ösa, zi so ba da'e, si lö mate, irege no la'ila so Nono Niha ba mbanuania andrö.[21]
Famotokhi ba gahe[edit source]
- ↑ Ayati 1–12: Mar 8:11–21
- ↑ Faigi 12:38
- ↑ Luk 12:54 b.t.
- ↑ Faigi 12:39. Yon 2:1
- ↑ Luk 12:1; Gal 5:9; KorI 5:6
- ↑ Faigi 14:17 b.t.
- ↑ Faigi 15, 34 b.t.
- ↑ Ayati 13–20: Mar 8:27–30; Luk 9:18–21
- ↑ Faigi 14:2; 17:10
- ↑ Faigi 14:33; Yoh 6:69; 11:27
- ↑ Gal 1:16; KorI 2:14
- ↑ Yoh 1:43; HalZin 15:7
- ↑ Faigi 18:18; Yoh 20:23
- ↑ Ayati 21–28: Mar 8:31–38; 9:1; Luk 9:22–27
- ↑ Faigi 17:22,23; 20:18,19
- ↑ SamII 19:22
- ↑ Faigi 10:38
- ↑ Luk 17:33; Yoh 12:25
- ↑ Sin 49:8,9
- ↑ Faigi 24:30; 25:31; KorII 5:10
- ↑ Faigi 10:23
Fabaliŵa lala[edit source]
Sura Mataio: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö