Wb/nia/Mataio/23

Add links
From Wikimedia Incubator
< Wb‎ | nia‎ | Mataio
Wb > nia > Mataio > 23

Itegu warizaio Yesu[edit | edit source]

I. 1 Ba humede Yesu ba niha sato ba khö ndra nifahaönia,[1] imane:

2 Ba dadaoma Moze dumadao zangila amakhoita andrö ba farizaio. 3 Ba fefu hadia ia, niŵa'öra khömi, ba mi'o'ö, böi misawö, ba böi mi'o'ö ba mbua-buara; laŵa'ö-wa'ö sa, ba lö latörö.[2]

4 Ba laböbö noro sabua ba lahare'ö ba galisi niha, ba ya'ira, ba sara turura lö labe'e, ba wamaliŵa ya'ia.[3]

Sura wangera-ngera ndra niha Yahudi ni'amöbögö yaŵa gangangora

5 Afu-afura la'ila ira niha, andrö lalau fefu nilaura andrö. La'ebolo'ö sa zura wangera-ngera andrö khöra,[4] ba la'ebua'ö mbowo-bowo mbarura andrö.[5] [6]

Nifotöi bowo mbaru tola lakhaigö ia mba nukha, ba gorden, ba wöda, ba tola göi ba loyo. Ba hiza sasese ta'ila so ia ba mbalö dakula ndra mahasiswa na lawisuda ira.

6 Ba no omasi ira naha tanö si yaŵa ba gowuloa ba dadaoma tanö si yaŵa ba zekola;[7] 7 ba omasi ira na la'owai ira ba kade, ba na labe'e töira zamahaö niha tanö bö'ö.

8 Ba böi ndramube'e töimi zamahaö, ha sa samösa zamahaö ya'ami, ba si fatalifusö ami fefu.

9 Ba böi fa'ama ami ba niha ba guli danö, ha sa samösa Namami, si so ba zorugo.

10 Ba böi ndramaube'e töimi zolohe, me ha samösa zolohe ya'ami, Keriso.

11 Enonimi zebuami.[8]

12 Ba samali'ö salaŵa ya'ia, ba ni'ide-ide'ö dania, ba sangide-ide'ö ya'ia, ba nibali'ö salaŵa.[9]

13 Ba alai ami, sangila amakhoita, ba farizaio, samini tödö! me mikusi mbanua zorugo andrö föna niha; lö'ö sa möi ami bakha, ba lö mifa'amöi bakha zi möi ena'ö.[10]

14 Alai ami, sangila amakhoita ba farizaio, samini tödö! me no si manga nomo lakha mbanua ami, ba me mi'oroma'ö wangandrö sara; andrö tedou huku, nifatörö khömi.

15 Alai ami, sangila amakhoita ba farizaio, samini tödö! me no sanöröi asi, awö danö, ami, ba wamali'ö solo'ö huku khömi samösa niha, ba na no i'o'ö, ba mibali'ö ono narako, mendrua manö na sa moroi khömi.

16 Alai ami, solohe tanga niha bö'ö, ba no au'a ami, sanguma'ö: Na so zame'e hölu osali, ba si lö'ö da'ö, ba na so zame'e hölu ana'a gosali, ba nitörö. 17 He sambö tödö, si no au'a! he zebua ira sa, ana'a, ba ma osali, same'e amonita ana'a andrö?

18 Ba mimane: Na so zame'e hölu naha wame'e sumange andrö, ba si lö'ö da'ö, ba na so zame'e hölu sumange andrö, si so yaŵa, ba nitörö. 19 He sau'a! he zebua ira sa, sumange andrö, ba ma naha wame'e, same'e amonita sumange andrö?[11]

20 Andrö, same'e hölu naha wame'e sumange, ba ibe'e hölu da'ö, fabaya si so yaŵa fefu. 21 Ba same'e hölu osali, ba ibe'e hölu da'ö, fabaya si onahia osali.[12] 22 Ba same'e hölu sorugo, ba ibe'e hölu dadaoma Lowalangi fabaya sidadao yaŵa.[13]

23 Alai ami, sangila amakhoita ba farizaio, samini tödö! me mibe'e zambua ni'ofulu lönga ba höwa ba lada, ba no olifu ami zebua goroisa, fanguhuku ba fa'ahakhö dödö ba fa lö faröi; ni'o'ö zi sambalö, ba tenga göi ni'ositengagö zi sambalö.[14]

24 He solohe tanga niha, si no au'a, mitafi'ö nibadu, ba wameta di, ba mitölö kudo.

25 Alai ami, sangila amakhoita ba farizaio, samini tödö! me mihaogö gero mako ba ero wiga, ba yaŵa, ba no fahöna warabu ba folu'a-lu'a.[15]

26 He farizaio sau'a! ofönai'ö wangehao yaŵa, mako, ena'ö sökhi göi geronia.[16]

27 Alai ami, sangila amakhoita ba farizaio, samini tödö, me no hulö lewatö nilau betua ami, si sökhi sa moroi baero, wamaigida, ba bakha, ba no fahöna döla zi mate, awö fefu hadia ia zi ta'unö.[17] 28 Si manö göi ami, niha satulö ami, wamaigida, moroi baero, ba bakha, ba no fahöna wamini tödö ba fa lö atulö.

29 Alai ami, sangila amakhoita ba farizaio, samini tödö! me mi'a'azökhi lewatö zama'ele'ö andrö, ba me mihaogö dandra lewatö zatulö,[18] 30 ba me mimane: Na ya'aga mena'ö ba götö ndra tuada, ba lö fao ndra'aga khöra, ba wamunu sama'ele'ö andrö.

31 Tobali mifaduhu'ö dödö niha bö'ö khömi, wa no ma'uwu zamunu sama'ele'ö andrö ami.[19] 32 Ba mifönui zu'a-su'a andrö khö ndra tuami.[20]

33 He ulö, ono gulö! he miwisa wangefa'ö ya'ami ba wanguhuku andrö, ba narako?[21]

I'e'esi mbanua Yeruzalema andrö[edit | edit source]

II. 34 Andrö, hiza,[22] ufatenge khömi zama'ele'ö ba satua-tua ba sangila amakhoita, ba so dania ba mibunu, miforöfa, ba so, ba mibözi-bözi ba zekola khömi ba migohi, i'otarai mbanua si sambua, numalö ba zi sambua,[23] 35 ena'ö möi ba hulumi fefu ndro zatulö andrö, niduwagö ba guli danö, i'otarai ndro Habeli satulö andrö, irugi ndro Zakharia, ono Mbarakhia andrö, nibunumi ba gotaluara gosali naha wame'e sumange.[24]

36 Si ndruhu niŵa'ögu khömi, tohare dania da'ö fefu ba niha si sagötö andre.

37[25] He Yeruzalema! he Yeruzalema! samunu sama'ele'ö andrö, sanebu kara nifatenge khönia, ha me uga no utandraigö mangowuloi onou, si mane sifagelo, na i'owuloi nononia barö gafinia, ba lö sedöna ami. 38 Hiza, teröi khömi nomomi, adudu.[26] 39 Uŵa'ö sa khömi, lö'ö sa'ae mi'ila ndra'o, i'otarai da'e, irege miŵa'ö dania: Ya'ahowu zi so ba döi Zo'aya![27]

Famotokhi ba gahe[edit source]

  1. ↑ Ayati 1–14: Mar 12:38–40; Luk 20:45–47
  2. ↑ Rom 2:21
  3. ↑ Luk 11:46
  4. ↑ Sura wangera-ngera: ba teks asli Yunani tesura φυλακτήρια (phylaktēria) eluahania balö garate nisura bakha ayati Zura Ni'amoni'ö. Balö garate andre labe'e bakha ba sambua nahia si hulö kade side-ide. Laböbö kade andre ba gangangora ya'ira niha Yahudi faoma böbö sanau.
  5. ↑ Bowo mbaru: ba teks asli Yunani tesura κράσπεδα (kraspeda) eluahania bu'u-bu'u dali ma bana (faigi gambara ba nga'örö andre). Te abölö faudu na laŵaö ia bowo mbana.
  6. ↑ Faigi 6:1,2; MozIV 15:38; MozV 6:8
  7. ↑ Luk 11:43
  8. ↑ Faigi 20:26,27
  9. ↑ Faigi 18:4; Luk 14:11; 18:14; Amaed 29:23; FetI 5:5
  10. ↑ Luk 11:52
  11. ↑ MozII 29:37
  12. ↑ SalI 8:13
  13. ↑ Faigi 5:34
  14. ↑ Luk 11:42
  15. ↑ Luk 11:39 b.t.
  16. ↑ Tit 1:15
  17. ↑ Luk 11:44
  18. ↑ Luk 11:47,48
  19. ↑ HalZin 7:52
  20. ↑ TesI 2:16
  21. ↑ Mat 3:7
  22. ↑ Ayati 34–36: Luk 11:49–51
  23. ↑ Faigi 10:17
  24. ↑ MozI 4:8; Nga'ötII 24:20 b.t.
  25. ↑ Ayati 37–39: Luk 13:34,35
  26. ↑ Faigi 24:2; SalI 9:7
  27. ↑ Faigi 21:9; Yoh 12:13

Fabaliŵa lala[edit source]

Sura Mataio: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Mataio/23&oldid=6120383"