Wb/nia/Mataio/2

I. Ere si otarai danö ba gatumbukha luo

1 Ba me no tumbu Yesu ba Mbetilekhema, ba Yudaia, me luo razo Herode andrö, ba hiza gere, moroi ba danö ba gatumbukha, si möi ba Yeruzalema.

2 Lamane: Hezo razo Niha Yehuda andrö, sawena tumbu? No oroma khöma ndröfinia ba danö ba gatumbukha, ba möiga mangalulu khönia.

Ira ere moroi ba gatumbukha

3 Ba me irongo da'ö razo andrö, Herode, ba tobali dödönia ba samba banua manö Yeruzalema, awönia. 4 Ba ifalukha'ö gere sebua fefu, awö zangila amakhoita ba niha Yehuda, ba izofu-zofu khöra, hadia niŵa'ö, heza tumbu Keriso.

5 Ba lamane khönia da'ö: Ba Mbetilekhema ba Yudaia, si mane sa ba zura zama'ele'ö: 6 "Ba ya'ugö, Betilekhema, ba danö mado Yuda, ma'ifu tenga fondrege zide-ide ndra'ugö ba zolohe mado Yuda andrö, me ba khöu i'otarai dania solohe andrö, sokubaloi banuagu andrö Iraono Gizeraeli."

7 Awena ifakaoni'ö gere no mege Herode, ibini'ö wamakaoni'ö, ba izofu-zofu sibai khöra, ha mega oroma ndröfi andrö. 8 Ba ifatenge ira ba Mbetilekhema, imane: Mi'ae'e, mi'alu-alui sibai, heza so nono andrö, ba na no misöndra, ba mi'ombakha'ö khögu, ena'ö möido göi mangalulu khönia.

9 Ba me no larongo niŵa'ö razo andrö, ba möi ira, ba hiza ndröfi andrö, ni'ilara ba danö ba gatumbukha, mowaö-waö fönara, irugi tebato ia faudu zi so ono andrö. 10 Ba me la'ila ndröfi andrö ba omuso sibai dödöra.

11 Ba möi ira yomo ba da'ö, ba hiza nono, awö ninania Maria, ba labalöduhini tou danö, mangalulu khönia ba labokai naha gana'ara, mamuala ira khönia, balaki ba kumöyö ba emuri.

12 Ba iŵa'ö khöra Lowalangi, ba wangifi, böi lafuli ira khö Herode; ba latörö lala bö'ö, wangawuli ba danöra.

II. Foloi ba danö Miserayi

13 Ba me no mofanö ira, ba hiza mala'ika Zo'aya, sangoroma'ö ya'ia khö Yosefo, ba wangifi, imane: Faoso, ohe nono, awö ninania, ba oloi ba danö Miserayi ba ba da'ö iagö, irege muhededo khöu; i'alui sa dania nono Herode, ba wamakko ya'ia.

14 Ba maoso ia, i'ohe nono, awö ninania, ba zi bongi ba isaŵa danö Miserayi. 15 Ba ba da'ö so ia irugi wa'amate Herode, ena'ö itörö niŵa'ö Zo'aya, ni'ombakha'ö zama'ele'ö andrö, me imane: "No ukaoni nonogu moroi ba danö Miserayi."

III. Famunu ono ba Mbetilekhema

16 Ba me i'ila Herode, no lalimo ia ere andrö ba mofönu sibai ia, ba ifatenge, ifabunu'ö fefu ndraono ba Mbetilekhema ba ba zi fasui fefu, i'otarai zi mendrua fakhe fa'ebua, no malö ba zide-ide moroi andrö, dali wa'ara andrö nizofu-zofunia ba gere andrö.

17 Ba da'ö itörö niŵa'ö Yeremia andrö, sama'ele'ö, me imane: 18 "No terongo wangarö-ngarö ba Rama, fege-ege, ba fange'esi sabölö-bölö; i'e'esi nononia Rakhela, ba lö edöna ia larara dödönia, me lö ya'ira sa'ae"

IV. Fangawuli moroi ba danö Miserayi

19 Ba me no mate Herode, ba hiza mala'ika Zo'aya, sangoroma'ö ya'ia khö Yosefo, ba wangifi, ba danö Miserayi. 20 Imane: Faoso, ohe nono, awö ninania ba fuli'ö ba danö Ndraono Gizeraeli, noa sa mate zamunu ono andrö ena'ö.

21 Ba maoso ia, i'ohe nono, awö ninania, ba isaŵa danö Ndraono Gizeraeli. 22 Ba me irongo, no tobali razo Yudaia Gerikhela'o, fangali namania Herode, ba ata'u ia möi ba da'ö. Ba humede khönia Lowalangi, ba wangifi; ba isaŵa danö Galilaia.

23 Möi ia ba mbanua sotöi Nazareta, ena'ö itörö niŵa'ö zama'ele'ö, wa banua Nazareta dania döinia.

Famotokhi ba gahe

Fabaliŵa lala

Sura Mataio: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö