Wb/nia/Mataio/13

From Wikimedia Incubator
< Wb‎ | nia‎ | Mataio
Wb > nia > Mataio > 13

Amaedola zamazaewe tanömö zinanö[edit | edit source]

I. 1 Me luo da'ö möi baero Yesu,[1] mudadao ia ba zinga mbaŵa andrö.

2 Ba ato zowulo khönia niha, ba möi ia baowo ba mudadao, ba baene so niha sato fefu.

3 Ba oya huhuonia khöra, amaedola, imane:

Hiza, möi ba nowi zamazaewe tanömö, ba wamazaewe tanömö zinanö. 4 Ba ba wamazaewenia, ba so zi göna ba lala, ba so wofo, ba la'a.

5 Ba so zi göna ba zokara, ba zi lö awe'e-we'e tanö khönia, ba i'anema'ö motalinga, me lö awe'e-we'e danö khönia. 6 Ba me tumbu luo, ba angongo ba mate, me no ambö ŵa'ania.

7 Ba so zi göna barö ndroi, ba ebua ndroi ba mate zinanö ibe'e. 8 Ba so zi göna ba danö si sökhi, ba mowua, so zowua si dua wulu, so zi felendrua ba so zi önö, zamba yöu.

9 Si so tögi dalinga, ba yamufondrondrongo! [2]

10 Ba la'ondrasi ia nifahaönia, lamane khönia: Hana wa amaedola niŵa'öu khöra?

11 Ba itema li, imane: khömi no mube'e wa'aboto ba dödö zi no tobini andrö, ba mbanua zorugo andrö, ba khöra, ba lö mube'e.[3] 12 Ba zi no so sa, ba tebe'e na, lahöna khönia, ba ba zi lö'ö, ba laheta göi zi no so khönia.[4]

13 Da'ö mbörö wa amaedola huhuogu khöra, me lö mangila ira, he ŵa'ae no teboka höröra, ba me lö mamondrongo, he ŵa'ae larongo, ba me lö aboto ba dödöra.

14 Ba itörö ba khöra nifa'ele'ö Yesaya, me imane: "Mirongo dania ia tögi dalingami, ba lö'ö manö aboto ba dödömi; anehe hörömi, ba lö mi'ila. 15 Noa sa mu'abe'e'ö dödö niha andre ba no afiso-fiso ira, ba no lafakifu hörö, ena'ö lö la'ila höröra ba ena'ö lö larongo tögi dalingara ba ena'ö lö aboto ba dödöra, fa lö lafuli ira, ena'ö u'orifi ira."

16 Ba ya'ahowu hörömi, me la'ila, ba tögi dalingami, me larongo.[5] 17 Si ndruhu niŵa'ögu khömi: No ato zama'ele'ö ba no ato zatulö somasi mangila ni'ilami andrö, ba lö ni'ilara, ba somasi mamondrongo nirongomi andrö, ba lö nirongora.[6]

18 Ba mifondrondrongo geluaha gamaedola andrö, samazaewe tanömö zinanö:

19 Na so zamondrongo turia mbanua andrö, ha niha ia, ba na lö aboto ba dödönia, ba so Gafökha, i'oloi'ö nifazaewe ba dödönia; da'ö nifazaewe tanömö si göna ba lala andrö.

20 Ba nifazaewe ba zokara, ba da'ö ia: Irongo daroma li andrö, ba i'anema'ö itema, omuso dödönia. 21 Ba lö moŵa'a ba dödönia, lö'ö sa anau-nau gölö; ba na tesao wamakao, ba ma folohi, na börö daroma li andrö, ba i'anema'ö mangawuli furi.

22 Ba nifazaewe barö ndroi, ba da'ö ia: Irongo daroma li andrö, ba so wa'abu dödö ba guli danö andre, awö wamaelungu andrö, ba gana'a, ba ibunu daroma li, ba tobali lö mowua.[7]

23 Ba nifazaewe ba danö si sökhi, ba da'ö ia: Irongo daroma li, ba aboto ba dödönia, ba ya'ia zowua, so zowua si dua wulu, so zi felendrua ba so zi önö, zamba yöu.

Amaedola ndru'u barö wakhe[edit | edit source]

II. 24 Amaedola tanö bö'ö iŵa'ö khöra, imane: No fakhili-khili ira mbanua zorugo andrö niha samazaewe tanömö si sökhi ba nowinia.

25 Ba me no mörö niha, ba so zi fatiu tödö khönia, möi mufazaewe, danömö ndru'u barö zinanö ba ilau mofanö. 26 Ba me no ebua zinanö, me molai, awena göi oroma ndru'u andrö.

27 Ba so genoni zokhö, lamane khönia: He Tua! hadia, tenga tanömö zinanö si sökhi nifazaeweu ba nowiu? Ba he moroi khönia ndru'u andrö?

28 Ba imane khöra: Niha si fatiu tödö zolau da'ö.

Ba lamane khönia enoni: Ba hadia, omasi'ö na möiga mu'ozaragö ia?

29 Ba imane: Böi, ma dania mifao wondröni sinanö, na mi'ozaragö ndru'u.[8] 30 Akha faoma ebua ia, irege wamasi, ba na baŵa wamasi, ba uŵa'ö ba zamasi, umane: Mi'ofönai'ö wangozaragö du'u ba milau ba ngamböbö, ba wanunu ya'ia, ba bua zinanö, ba mi'owuloi ba halasa khögu.[9]

Amaedola danömö lada[edit | edit source]

III. 31 Amaedola tanö bö'ö iŵa'ö khöra,[10] imane: No fakhili-khili ira mbanua zorugo andrö hunö lada, nihalö niha, nifazaewenia ba nowinia.

32 Fondrege zide-ide mbua zinanö sa ia, ba na no manöi, ba ebua ia moroi ba gule-gule bö'ö ba tobali motöla, tobali möi wofo ba dalu mbanua, mangazuni ba ndrahania.

Amaedola danömö roti[edit | edit source]

IV. 33 Amaedola tanö bö'ö iŵa'ö khöra, imane: No fakhili-khili ira mbanua zorugo andrö danömö roti, nihalö ndra alawe, nifarukania ba zi tölu yöu hamo, irege aisö ma'afefu.

34 Da'ö fefu niŵa'ö Yesu ba niha sato, amaedola, lö bö'önia, huhuonia khöra, ha sambalö amaedola.

35 Ena'ö itörö niŵa'ö zama'ele'ö andrö, me imane: "Damuhededo, ulau gamaedola, ubokai zi no tobini, i'otarai mböröta danö."[11]

36 Aefa da'ö, ba ifofanö niha sato ba möi ia yomo. Ba möi khönia nifahaönia, lamane: Ombakha'ö khöma geluaha gamaedola andrö, du'u ba nowi.

37 Ba itema lira, imane: Samazaewe tanömö zinanö si sökhi andrö, ba ya'ia Nono Niha,

38 ba nowi andrö, ba ya'ia niha ba guli danö; ba tanömö si sökhi andrö, ba ono mbanua andrö; ba du'u, ba ono Gafökha.[12]

39 Ba si fatiu tödö andrö, samazaewe ya'ia, ba ya'ia Gafökha andrö. Ba famasi, ba amozua götö danö andre; ba samasi, ba mala'ika andrö.[13]

40 Ba hulö si mane na la'ozaragö ndru'u, nitunu ba galitö, si manö göi dania ba gamozua götö danö andre. 41 Ifatenge dania mala'ikania Ono Niha, ba la'ozaragö fefu wangala ba mbanuania andrö, awö zamazökhi si lö atulö,[14] 42 ba latibo'ö ba mbaho galitö andrö, ba fege-ege dania ba da'ö ba fatangisa mboha.[15]

43 Ba humaga dania zatulö andrö, hulö luo, ba mbanua Namara andrö. Ha niha zi so tögi dalinga, ba yamufondrondrongo![16]

Amaedola girö-girö nibini'ö ba mbenua[edit | edit source]

V. 44 No fakhili-khili ira mbanua zorugo andrö girö-girö nibini'ö ba mbenua, nisöndra niha, ba ibini'ö; ba ba wa'omuso dödönia andrö, ba möi ia, i'amawa fefu hadia ia zi so khönia, ba i'öli mbenua andrö.[17]

Amaedola mani-mani[edit | edit source]

VI. 45 Fakhili-khili zui ira mbanua zorugo andrö niha saniaga, sangalui mani-mani si sökhi. 46 Ba me isöndra zambua mani-mani sebua böli, ba möi ia, i'amawa fefu hadia ia zi so khönia ba i'öli da'ö.[18]

Amaedola giri[edit | edit source]

VII. 47 Fakhili-khili zui ira mbanua zorugo andrö giri, nilau ba nasi, fama'u'u fefu hadia ia ngawalö gi'a. 48 Ba na no afönu ia, ba ladöni yaŵa baene ba mudadao ira, la'ozaragö zi sökhi, lalau ba nahia ba si lö sökhi, ba latibo'ö.

49 Si manö göi dania ba gamozua götö danö andre. Möi dania mala'ika andrö ba lafabali zi lö sökhi andrö ba zatulö; 50 ba latibo'ö ba mbaho galitö andrö, ba fege-ege dania ba da'ö ba fatangisa mboha.[19]

51 Hadia, no aboto ba dödömi da'ö fefu?

Lamane khönia: Noa.

52 Ba imane khöra: Me si manö, ba dozi sangila amakhoita, nifahaö ba ngawalö mbanua Lowalangi andrö, ba no fakhili-khili ba niha, satua baomo, sanao'ö baero, moroi ba girö-girönia andrö, si bohou, awö zi no ara.

La'ositengagö Yesu banuania[edit | edit source]

VIII. 53 Ba me no i'o'ozui Yesu gamaedola andrö,[20] ba iheta ia ba da'ö. 54 Ba me irugi mbanuara, ba ifahaö ira ba zekola khöra, irege tobali dödöra, ba lamane: Heza moroi khönia wa'atua-tua andrö, awö wa'abölö andrö?

55 Tenga ono duka andrö ia? Tenga Maria döi ninania andrö, ba tenga Yakobo ba Yosefo ba Simoni ba Yuda döi dalifusönia matua andrö?[21] 56 Ba talifusönia alawe andrö, ba tenga khöda so ira, fefu? Ba heza moroi khönia da'ö fefu?

57 Ba fatuwu ia khöra.

Ba imane khöra Yesu: Lö'ö sa te'ositengagö zama'ele'ö, na tenga ba mbanuara ba na tenga moroi yomo khöra.[22]

58 Ba lö oya ifazökhi ba da'ö tandra, börö wa lö mamati ira.

Famotokhi ba gahe[edit | edit source]

  1. Ayati 1–23: Mar 4:1–20; Luk 8:4–15
  2. Faigi 11:15
  3. Faigi 11:25; 16:17; KorI 2:7–10
  4. Faigi 25:29; Mar 4:25; Luk 8:18; 19:26
  5. Luk 10:23 b.t.
  6. FetI 1:10; Heb 11:13
  7. Faigi 19:23; TimI 6:9
  8. Yes 65:8
  9. Faigi 3:12; SamII 23:6
  10. Ayati 31–34: Mar 4:30–34; Luk 13:18–21
  11. Sin 78:2; KorI 2:7
  12. Yoh 8:44; YohI 3:8
  13. Fam 14:15
  14. Faigi 24:31
  15. Sin 50; Fam 19:20
  16. Dan 12:3; KorI 15:40 b.t.
  17. Fil 3:7
  18. Amaed 8:10,11
  19. Faigi 22:13; 24:51
  20. Ayati 53–58: Mar 6:1–6; Luk 4:16,22–24
  21. Faigi 12:46; Yoh 6:42
  22. Yoh 4:44

Fabaliŵa lala[edit source]

Sura Mataio: 12345678910111213141516171819202122232425262728

Amabu'ulali Sibohou: MataioMarekoLukaYohaneHalöŵö ZinengeRomaKorindro IKorindro IIGalatiaEfesoFilifiKoloseTesalonika ITesalonika IITimoteo ITimoteo IITitoFilemoHeberaioYakoboFetero IFetero IIYohane IYohane IIYohane IIIYudaFama'ele'ö

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö