Wb/nia/Mataio/15
I. Oroisa niha si lö guna
[edit | edit source]1 Me luo da'ö möi khö Yesu Farizaio ba sangila amakhoita,[1] banua Yeruzalema, lamane: 2 Hana wa lasawö niŵa'ö ndra tua ira nifahaömö? Lö'ö sa mombanö ira, na la'a göra.[2]
3 Ba itema li, imane khöra: Ba hana ami göi, wa misawö goroisa Lowalangi, ba nifakhoimi andrö?
4 Noa sa i'oroi'ö Lowalangi, imane: "Fosumange namau, awö ninau" ba: "si mate zangelifi amania ba ma inania."[3] 5 Ba ya'ami, ba mimane: Na so zanguma'ö khö namania, ba ma khö ninania: Tebe'e sumange [Lowalangi] zinemau khögu ena'ö, ba alakha lö ifusumange namania, awö ninania.
6 Ba no miwu'ai goroisa Lowalangi andrö, ba nifakhoimi andrö.
7 He ya'ami, samini tödö! Si ndruhu wama'ele'ö Yesaya ba khömi andrö, me imane: 8 "Lafosumange ndra'o bewera niha andrö, ba tödöra, ba no aröu khögu. 9 Zaya-zaya gölöra wamosumangera ya'o, me no nifakhoi niha wamahaöra andrö."
10 Ba ikaoni khönia niha sato, ba imane khöra: Mifondrondrongo ba ya'aboto ba dödömi! 11 Tenga da'ö zana'unöi niha si möi bakha ba mbawania, ha si möi baero, si oroi mbawania da'ö zana'unöi niha.[4]
12 Ba so ndra nifahaö, lamane khönia: Hadia, ö'ila wa no fatuwu ba warizaio, me larongo niŵa'öu andrö?
13 Ba itema li, imane: Fefu zinanö, si tenga nitanö Namagu andrö ba zorugo, ba ladeha dania.[5] 14 Miböhöi ira; niha sau'a ira, samasao sau'a, ba na ifasao nawönia sau'a sau'a, ba faoma aekhu ira ba goho-koho.[6]
15 Ba itema linia Fetero, imane khönia: Ombakha'ö khöma geluaha gamaedola andrö.
16 Ba imane: Hadia, lö'ö na saboto ba dödömi göi? 17 Hadia, lö mi'ila, wa isaŵa mbetu'a fefu zi möi bakha ba mbawa, awö wa ifuli möi baero ba dögi-tögi?
18 Ba hadia ia zi otarai mbawa, ba ba dödö i'otarai, ba da'ö zana'unöi niha.[7] 19 Moroi ba dödö sa i'otarai era-era si lö sökhi, ba fange'e, ba fohoröni donga zodonga ba fohorö bö'ö ba fanagö ba famöbögö si lö duhu ba fanandraŵa.[8]
20 Ya'ia wana'unöi niha. Ba lö ita'unöi niha, na manga lö mombanö.
II. Ifadöhö wökhö nono ndra alawe Gana'ana andrö Yesu
[edit | edit source]21 Ba iheta ia ba da'ö Yesu,[9] isaŵa danö Diro ba tanö Zidona.
22 Ba hiza ndra alawe Gana'ana, si otarai danö da'ö; mu'ao ia, imane: Hakhösi tödö ndra'o Tua, ma'uwu Dawido! ifakao sibai nonogu alawe bekhu.
23 Ba lö itema linia, sambua li lö'ö. Ba möi khönia ndra nifahaönia, mangandrö ira khönia, lamane: Fofanö ia, me si ao-ao moroi furida.
24 Ba itema lira, imane: Ha ba mbiri-biri sisuna andrö, ma'uwu Gizeraeli, tefatenge ndra'o.[10]
25 Ba möi ndra alawe no mege, ituhi danö fönania, imane: He Tua, tolodo!
26 Ba itema linia, imane: Lö tola lahalö gö ndraono, ba wame'e ö nasu.
27 Ba imane: Si ndruhu Tua, ba la'a sa atö asu gakhökhöla, saekhu tou, na manga zokhö ya'ira.
28 Ba itema linia Yesu, imane khönia: He alawe, no ebua wamatimö andrö, yafalukha'ö zomasi ndra'ugö! Ba döhö wökhö nononia alawe, ba da'ö sibai.[11]
29 Ba iheta ia ba da'ö Yesu, isaŵa mbaŵa Galilaia andrö, ba möi ia ba hili, mudadao ia ba da'ö.
30 Ba ato zangondrasi ya'ia niha, si so sogombuyu-mbuyu ba sagau'a ba si lö hede ba sagaböda ba bö'önia, ato, ba latou'ö tou fönania; ba ifadöhö wökhöra,[12] 31 tobali ahöli-höli dödö niha sato, me la'ila humede zi lö hede andrö ba döhö wökhö zagaböda ba mowaö-waö zogombuyu-mbuyu ba la'ila niha sagau'a; ba lasuno Lowalangi Ndraono Gizeraeli.
III. Ibe'e gö ba niha si öfa ngahönö
[edit | edit source]32 Ba humede Yesu ba nifahaönia,[13] imane: Ahakhö dödögu niha sato andrö, me no tölu bongi wa'ara lö niröira ya'o, ba lö öra, ba lö omasido ufofanö ira lö manga, fa lö mate olofo ba lala.[14]
33 Ba lamane khönia nifahaö: Heza tahalö gö si manö fa'oya, ba danö si mate, fangabuso niha si manö fa'ato?
34 Ba imane khöra Yesu: Ha uga roti, si so khömi? Ba lamane: Fitu, ba so ma'ifu gi'a.
35 Ba iŵa'ö ba niha sato, ena'ö mudadao ira ba danö;
36 ba ihalö roti andrö si fitu, awö gi'a andrö, ba i'aohasi gölö Lowalangi, ba iboboto ba ibe'e khö ndra nifahaö, ba ira nifahaö zame'e ba niha sato.
37 Ba manga ira fefu, ba abuso; ba la'ozaragö zi töra, akhökhöla, fitu kude.
38 Ba si manga andrö, ba no öfa ngahönö ndra matua, baero ndraono, baero ndra alawe.
39 Ba ifofanö niha sato, ba möi ia baowo, isaŵa danö Magada.
Famotokhi ba gahe
[edit | edit source]- ↑ Ayati 1–20: Mar 7:1–23
- ↑ Luk 11, 38
- ↑ MozII 20:12; 21:17; Amaed 23:22
- ↑ HalZin 10:15; Rom 14:14
- ↑ HalZin 5:38
- ↑ Faigi 23:16; Luk 6:39; Rom 2:19
- ↑ Yak 3:6
- ↑ MozI 6:5; Rom 7:18
- ↑ Ayati 21–31: Mar 7:24–31
- ↑ Faigi 10, 6
- ↑ Faigi 8:10,13
- ↑ Faigi 11:5; Yes 35:5 b.t.
- ↑ Ayati 32–39: Mar 8:1–10
- ↑ Faigi 14:15 b.t.
Fabaliŵa lala
[edit source]Sura Mataio: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö