Wb/nia/Mataio/18

From Wikimedia Incubator
< Wb‎ | nia‎ | Mataio
Wb > nia > Mataio > 18

Böi fayaŵa ita[edit | edit source]

I. 1 Ba da'ö möi khö Yesu ndra nifahaönia,[1] lamane: Ha niha atö zebua ba mbanua zorugo andrö?

2 Ba humede ia ba ndraono, ifa'aso fönara, ba imane:

3 Si ndruhu niŵa'ögu khömi, na lö mifuli ami, ba na lö tobali hulö ndraono ami, ba lö'ö manö lalami ba mbanua zorugo andrö.[2] 4 Ba ha niha zangide-ide'ö ya'ia, si mane iraono andre, da'ö zebua ba mbanua zorugo andrö.[3] 5 Ba na so zama'amöi yomo khönia iraono si manö, sambua, ba döigu, ba ya'o nifa'amöinia yomo.[4]

Böi tafobörö wangala khö nawöda[edit | edit source]

II. 6 Ba na so zangalani side-ide andrö,[5] samösa, samati khögu, ba sökhi khönia ena'ö, na lataŵi ba mbaginia gara sebua ba na latibo'ö ia ba dalu nasi.[6]

7 Alai niha ba guli danö, ba wangala andrö! Lö'ö sa tola lö fangala, ba alai niha samobörö fangala.[7]

8 Ba na i'alani ndra'ugö tangau, ba ma aheu, ba tema eŵa ia ba tibo'ö; mohare'ö na saböda ndra'ugö, ba ma sakela-kela, ba ökhamö wa'auri, moroi dua dangau ba dua gaheu, ba tetibo ndra'ugö ba galitö andrö, si lö mate-mate.[8]

9 Ba na i'alani ndra'ugö höröu, ba tema koe ia ba tibo'ö; mohare'ö na si bakole ndra'ugö ba ökhamö wa'auri, moroi dombua höröu, ba tetibo ndra'ugö ba narako alitö andrö.[9]

10 Mifaigi, fa böi mi'ositengagö zide-ide andrö, samösa. Uŵa'ö sa khömi, mala'ikara andrö ba zorugo, ba lö mamalö-malö wa la'ila mbawa Namagu andrö, si so ba zorugo.[10] 11 Ba wangorifi si no elungu sa möi Nono Niha.[11]

12 Hadia ba dödömi?[12] Na so niha, si so biri-biri, otu nga'eu, ba na no elungu zi sageu; hadia, lö iröi zi siŵa wulu a siŵa ba hili misa ba möi mangalui selungu andrö? 13 Ba na tobali isöndra, ba si ndruhu niŵa'ögu khömi, abölö wa'omuso dödönia ba da'ö, moroi ba wa'omuso dödönia ba zi siŵa wulu a siŵa, si lö elungu.

14 Si manö göi khö Namami andrö, si so ba zorugo; tenga nilau dödönia taya zamösa, side-ide andrö.

He tawisa na mosala khöda nawöda[edit | edit source]

III. 15 Ba na mosala khöu dalifusöu, ba ae tegu ia, ba zi ha ya'ami, daruami; na ifondrondrongo khöu, ba no ösöndra dalifusöu.[13]

16 Ba na lö ifondrondrongo, ba halö awöu zamösa tö ba ma darua, ena'ö aro huhuo fefu ba niŵa'ö zi darua, ba ma si datölu, si so ba mbörö.[14]

17 Ba na lö ifondrondrongo khöra andrö, ba ombakha'ö ba mbanua. Ba na lö'ö göi ifondrondrongo niŵa'ö mbanua, ba ya hulö niha baero ia khöu, ya hulö zanema beo.[15]

18 Si ndruhu niŵa'ögu khömi, hadia niböbömi ba guli danö, ba niböbö göi ba zorugo; ba hadia ni'efa'ömi ba guli danö, ba ni'efa'ö göi ba zorugo.[16]

19 Ba uŵa'ö göi khömi, na darua ba khömi zangosara'ö tödöra, ba guli danö, ba ngawalö hadia ia, ni'andröra, ba ibe'e khöra Amagu andrö, si so ba zorugo.[17] 20 Ba zorudu zi darua, ba ma si datölu, ba döigu, ba da'ö sodo khöra ba gotaluara.[18]

Amaedola razo same'e buala sugilönia khö zawuyunia[edit | edit source]

IV. 21 Ba möi khönia Wetero, imane khönia: He Tua, ha me uga u'efa'ö zala dalifusögu, na mosala in khögu? Hadia irugi mewitu?[19]

22 Imane khönia Yesu: uŵa'ö khöu: tenga ha irugi zi mewitu, irugi zi mewitu ngafulu wa fitu.

23 Andrö fakhili-khili ira mbanua zorugo andrö razo, sedöna mangerai ömö khö zawuyunia.

24 Ba me ibörötaigö mangerai, ba te'ohe khönia zamösa, so'ömö si fulu ngahönö balaki. 25 Ba me lö khönia famu'a, ba iŵa'ö sokhö, la'amawa ia, awö wo'omonia, awö nononia, awö fefu hadia ia zi so khönia, famu'a gömö.

26 Ba ituhi danö sawuyu andrö, mangalulu ia khönia, imane: Bologö dödöu khögu, ba ahori ubu'a ia khöu.

27 Ba ahakhö dödö zokhö zawuyu andrö, i'efa'ö ba ibe'e bualania khönia zugilö andrö.

28 Ba me möi baero zawuyu andrö, ba falukha ia nawönia sawuyu, so'ömö khönia si lima wulu rufia. Ba ira'u, itögi mbagi, imane: Bu'a gömöu khögu.

29 Ba ituhi danö awönia sawuyu andrö, mangandrö khönia, imane: Bologö dödöu khögu, ba ubu'a khöu.

30 Ba lö edöna ia; möi ia, ifakuru'ö, irege ibu'a gömö.

31 Ba me la'ila da'ö awönia sawuyu bö'ö, ba abu sibai dödöra ba möi ira, la'ombakha'ö khö zokhö ya'ira da'ö no mege fefu.

32 Ba ifakaoni'ö ia sokhö ya'ia, imane khönia: He sawuyu si lö sökhi! Ömö no andrö fefu, ba no ube'e bualagu khöu, me no mangandrö ndra'ugö khögu;

33 ba hadia, lö öhakhösi tödö göi mena'ö nawöu sawuyu, si mane ya'o, me no uhakhösi tödö ndra'ugö?[20] 34 Ba mofönu zokhö ya'ia, ibe'e ba danga zamakao, irege ibu'a gömönia khönia fefu.[21]

35 Si manö göi ilau khömi dania Amagu andrö ba zorugo, na tenga moroi ba dödömi mi'efa'ö zala, dozi ami, ba dalifusömi.[22]

Famotokhi ba gahe[edit | edit source]

  1. Ayati 1–5: Mar 9:33–37; Luk 9:46–48
  2. Faigi 19:14 b.t.; Mar 10:15; KorI 14:20
  3. Faigi 23:12
  4. Faigi 30:40
  5. Ayati 6–9: Mar 9:42–48
  6. Luk 17:2
  7. Luk 17:1; KorI 11:19
  8. Faigi 5:30
  9. Faigi 5:29
  10. Sin 34:8; Heb 1:14
  11. Faigi 9:13; Luk 19:10; TimI 1:15
  12. Ayati 12–14: Luk 15:4–7
  13. MozIII 19:15; Gal 6:1
  14. Yoh 8:17
  15. KorI 5:11,13; TesII 3:6,14,15
  16. Faigi 16:19; Yoh 20:23
  17. Mar 11, 24
  18. Faigi 28:20; Luk 24:36
  19. Luk 17:3,4
  20. Yak 2:13
  21. Faigi 3:25,26
  22. Faigi 6:15; Mar 11:25 b.t.

Fabaliŵa lala[edit source]

Sura Mataio: 12345678910111213141516171819202122232425262728

Amabu'ulali Sibohou: MataioMarekoLukaYohaneHalöŵö ZinengeRomaKorindro IKorindro IIGalatiaEfesoFilifiKoloseTesalonika ITesalonika IITimoteo ITimoteo IITitoFilemoHeberaioYakoboFetero IFetero IIYohane IYohane IIYohane IIIYudaFama'ele'ö

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö