Jump to content

Wb/nia/Mataio/11

Add links
From Wikimedia Incubator
< Wb | nia | Mataio
Wb > nia > Mataio > 11

I. Ifatenge khö Yesu nifahaönia Yohane

[edit | edit source]

1 Ba me no i'o'ozui Yesu wamobawa lala andrö ba nifahaönia si felendrua andrö, ba mofanö ia ba da'ö, möi ia mamahaö ba mangombakha ba mbanua khöra misa.

2 Ba me irongo nifazökhi Yesu Yohane andrö,[1] ba gurunga, ba ifatenge nifahaönia,[2] 3 ifasofu'ö khönia, imane: Hadia, ya'ugö zi möi andrö, ma mabalo-baloi danö bö'ö?[3]

4 Ba itema lira Yesu, imane khöra: Mi'ae mi'ombakha'ö khö Yohane nirongomi, awö ni'ila hörömi andrö. 5 Ifuli la'ila niha sau'a, ba mowaö-waö zombuyu-mbuyu töla, döhö mbou auri ba larongo li niha safiso, ba maoso zi mate, ba ba zi numana te'ombakha'ö duria somuso dödö,[4] 6 ba ya'ahowu ba zi lö fatuwu ndra'o.

II. Fa'ebua Yohane

[edit | edit source]

7 Ba me no mofanö da'ö,[5] ba ibörötaigö Yesu, imane ba niha sato, ba khö Yohane andrö: Hadia nifaigimi, wa möi baero ami ba danö si mate? Hadia, sukhu, nifaheu-heu nangi?

8 Ma hadia, wa möi baero ami? Hadia, ba wamaigi niha sonukha sombuyu-mbuyu? Hiza, ba nomo razo so zonukha sombuyu-mbuyu.

9 Ma hadia, wa möi baero ami? Hadia, ba wamaigi sama'ele'ö? Si ndruhu niŵa'ögu khömi, si töra sama'ele'ö.[6] 10 Ya'ia zi so ba zura: "Hiza, ufowaö-waö fönau zinengegu, sangehao lalamö fönau."[7]

11 Si ndruhu niŵa'ögu khömi, lö irai so zebua moroi khö Yohane andrö, samayagö idanö, ba ni'adonogö ndra alawe, ba fondrege zide-ide ba mbanua zorugo andrö ba no ebua moroi khönia.

12 Ba i'otarai luo Yohane andrö, samayagö idanö, irugi da'e, ba teforege wangalui banua zorugo andrö, ba samorege andrö, da'ö zondra'u ya'ia khöra.[8] 13 Noa sa mama'ele'ö zama'ele'ö andrö fefu, awö goroisa, irugi Yohane, 14 ba na edöna ami, ba ya'ia Geliya andrö, niŵa'ö si so.

15 Si so tögi dalinga, ba yamufondrondrongo![9]

16 Ba ha khö ufaudugö niha andre? Amaedola ndraono ira, sidadao ba kade, 17 si'ao ba nawöra, lamane: No malau zigu khömi, ba lö solaya ami, no me'e ndra'aga, ba lö sabu dödömi.

18 Noa sa so Yohane andrö, lö manga ba lö mamadu-madu hadia ia, ba lamane: Sobekhu.[10]

19 Ba no so Nono Niha, manga-manga ba mamadu-madu hadia ia, ba lamane: Hiza niha solu'a-lu'a, samadu-madu agu, si fahuwu ba zanema beo andrö ba ba zebua horö; ba tobali sa famu'a ba hulu wa'atua-tua andrö nifazökhi dangania.[11]

III. Itegu mbanua andrö si lö molo'ö

[edit | edit source]

20 Ba da'ö ibörötaigö ihede-hede'ö mbanua andrö, ba zoya tefazökhi tandra andrö khönia, me lö nifalalinira era-erara, imane:

21 Alai ndra'ugö, khorasi! alai ndra'ugö, Betisa'ida! Na ba Diro ba na ba Zidona mena'ö tefazökhi dandra andrö, nifazökhi ba khömi andrö, ba na föna sa'ae lafalalini gera-era mena'ö, no la'onukha goni, ba no lalau nawu ba högöra mena'ö.[12] 22 Ba uŵa'ö na khömi: Öna-öna na zi göna Diro ba Sidona, na luo wanguhuku andrö, moroi ba zi göna ami.

23 Ba ya'ugö, Kafanauma, tenga no mu'alaŵa'ö ndra'ugö, irugi mbanua si yaŵa? Irugi mbanua tou tetibo'ö ndra'ugö dania. Na ba Zodoma mena'ö tefazökhi dandra andrö, nifazökhi ba khömö andrö, ba lö si tebulö ia mena'ö, irugi ma'ökhö andre. 24 Ba uŵa'ö na khömi: Öna-öna na zi göna mbanua Zodoma andrö, na luo wanguhuku andrö, moroi ba zi göna ndra'ugö.[13]

25 Me luo da'ö humede Yesu, imane: usuno ndra'ugö, Ama, Sokhö sorugo, awö danö, me no öbini'ö da'ö ba zatua-tua, awö ba zonekhe, ba me no öfa'ele'ö ia ba ndraono.[14]

26 Ya'ia, Ama, me no wa'omasiu zi manö. 27 Fefu hadia ia, ba no ibe'e ba dangagu Amagu. Ba lö saboto ba dödö Ono, baero Nama, ba lö saboto ba dödö Ama, baero Nono, awö ba zedöna ifa'ele'ö Ono.[15]

IV. Ikaoni khönia zerege tödö

[edit | edit source]

28 Mi'aine khögu, dozi serege tödö, awö zonoro, ba ufolombase ami.[16] 29 Mihare'ö khömi kalo mbagi andrö khögu ba mitöngöni khögu, me no sebolo tödö ndra'o ba si lö fayaŵa tödö, ba falukha ami wolombase dödömi.[17] 30 Moguna sa kalo mbagi andrö, khögu, ba no aoha noro andrö khögu.[18]

Famotokhi ba gahe

[edit | edit source]
  1. ↑ Ayati 2–6: Luk 7:18–23
  2. ↑ Faigi 14:3
  3. ↑ MozV 18:15
  4. ↑ Faigi 15:30,31; Yes 35:5; 61:1)
  5. ↑ Ayati 7–19: Luk 7:24–35
  6. ↑ Luk 1:76
  7. ↑ Mal 3:1; Mar 1:2
  8. ↑ Luk 16:16
  9. ↑ Faigi 13:9
  10. ↑ Faigi 3:4
  11. ↑ Faigi 9:10; Yoh 2:2
  12. ↑ Hes 26 ba 27; Yob 42:6
  13. ↑ Faigi 10:15; Luk 12:47
  14. ↑ Faigi 5:3; KorI 1:19–29
  15. ↑ Yoh 1:18; 3:35; 14:6; Faigi 28:18
  16. ↑ Yer 31:25
  17. ↑ Sakh 9:9; Fil 2:5 b.t.
  18. ↑ YohI 5:3

Fabaliŵa lala

[edit source]

Sura Mataio: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Mataio/11&oldid=6272334"