Wb/nia/Mataio/25

From Wikimedia Incubator
< Wb‎ | nia‎ | Mataio
Wb > nia > Mataio > 25

Amaedola nono alawe si dafulu[edit | edit source]

Dafulu nono alawe sambö tödö nigambaraini James Tissot

I. 1 Ba da'ö dania fakhili-khili ira mbanua zorugo andrö nono alawe, dafulu, sangai fandrura, ba we'amöi mamaondragö sangowalu.[1] 2 Ba dalima ira zambö tödö, ba dalima zatua-tua.

3 Lahalö sa wandrura sambö tödö andrö, ba lö la'ohe wanikha. 4 Ba satua-tua andrö, ba la'ohe wanikha ba nahia, fabaya fandrura.

5 Ba me ara zangowalu, ba manuköu ira fefu ba mörö.

6 Ba me talu mbongi, ba so zi'ao: Hiza zangowalu, mi'ae mifaondragö ia!

7 Awena maoso nono alawe andrö fefu ba lahaogö wandrura.[2]

8 Ba lamane sambö tödö andrö ba zatua-tua: Mibe'e fanikhama wanikhami ma'ifu, mate sa wandruma andre. 9 Ba latema lira satua-tua, lamane: Ma dania faoma ambö khöda; sökhi na möi ami ba zolafo, ba na mi'öli khömi.

10 Ba me no möi ira mowöli, ba so zangowalu, ba si no mama'anö, ba möi yomo, awönia ba walöŵa, ba lakusi mbawandruhö.[3]

11 Ba aefa da'ö, ba so göi nono alawe no mege, si tosai, lamane: He Tua! he Tua! bokai khöma!

12 Ba itema lira, imane: Si ndruhu niŵa'ögu khömi, lö u'ila, ha niha ami.[4]

13 Andrö böi miförö, me lö mi'ila mbaŵa, awö ginötö.

Amaedola gana'a nibe'e ba zohare[edit | edit source]

II. 14 Hulö niha sofanö:[5] Humede ia ba zawuyunia, ibe'e ba dangara zi so khönia.

15 Ibe'e ba zi samösa, ba lima balaki, ba ba zi samösa, ba dua balaki, ba ba zi samösa, ba samba fondruyu, dali wa'abölö zamösana, ba mofanö ia.

16 Ba i'anema'ö möi nibe'e si lima balaki, ilau ba waniaga, ba fabali.

17 Si manö göi nibe'e si dua balaki, fabali ibe'e.

18 Ba nibe'e si samba fondruyu, ba möi mogo'oli tanö, ibini'ö bakha gana'a zokhö ya'ia.

19 Ba me no ara, ba so zokhö sawuyu andrö, ba mangerai ömö ia khöra.

20 Ba i'ondrasi ia nibe'e si lima balaki, i'ohe göi zi lima balaki harenia, imane: Lima balaki nibe'eu ba dangagu, Tua, faigi, lima balaki tö, nisöndragu, harenia.

21 Imane khönia sokhö ya'ia: Lau, sawuyu si sökhi, si lö faröi; lö si faröi ndra'ugö ba zi lö oya-oya, ba ube'e barö mbawau zoya; tabu ba wa'omuso dödö andrö khö zokhö ya'ugö.[6]

22 Ba i'ondrasi göi ia nibe'e si dua balaki, imane: Dua balaki nibe'eu ba dangagu, Tua, faigi dua balaki tö nisöndragu harenia.

23 Imane khönia sokhö ya'ia: Lau, sawuyu si sökhi, si lö faröi; lö si faröi ndra'ugö ba zi lö oya-oya, ba ube'e barö mbawau zoya; tabu ba wa'omuso dödö andrö khö zokhö ya'ugö.

24 Ba i'ondrasi ia göi nibe'e si samba fondruyu andrö, imane: He Tua, no u'ila ndra'ugö, wa niha sabe'e huku ndra'ugö; mamasi ndra'ugö ba zi lö nitarumö ba mangozara'ö ba zi lö nifazaeweu, 25 ba no ata'u ndra'o, ba no möido mubini'ö zi samba fondruyu andrö khöu barö danö; ba ya'ae khöu gana'au.

26 Ba itema linia sokhö ya'ia, imane khönia: He sawuyu si lö sökhi, sareu! Na no ö'ila mamasi ndra'o, ba zi lö nitarugu ba mangozara ndra'o, ba zi lö nifazaewegu; 27 ba öbe'e mena'ö nifalali wirögu andrö, ba zamalali ana'a, ba na so ndra'o, ba utema ena'ö gana'agu, fabaya hare.

28 Ba mihalö khönia zi samba fondruyu andrö, ba mibe'e ba zi so si fulu balaki. 29 Dozi sa, ba zi so ba tebe'e na ba tehöna khöra; ba ba zi lö ö, ba teheta göi zi so khönia.[7]

30 Ba sawuyu andrö, si lö guna, ba mitibo'ö baero ba zogömi-gömi. Ba fege-ege dania ba da'ö ba fatangisa mboha.[8]

Fanguhuku ba gamozua[edit | edit source]

III. 31 Ba na so Nono Niha, na si so lakhömi ia, na fao khönia mala'ika andrö fefu, ba da'ö dania dumadao ia ba dadaoma lakhöminia andrö.[9]

32 Ba te'owuloi dania fönania fefu soi, ba iföfö'ö ira, si mane na iföfö'ö ira mbiri-biri si alawe mbiri-biri si matua kubalo.[10]

33 Ba ifa'aso ba gambölönia mbiri-biri si alawe, ba ba gaberania mbiri-biri si matua.[11]

34 Ba imane dania razo andrö ba zi so ba gambölönia: Mi aine, ya'ami, nifahowu'ö Namagu, mitema gondröita andrö, banua andrö, ni'asiwai khömi, i'otarai mbö öta danö.

35 Me olofo ndra'o, ba no mibe'e gögu; me owökhi dödögu, ba no nifabadugö khögu nidanö; me tome ndra'o, ba no mifa'amöido yomo;[12] 36 me lö nukhagu, ba no mifonukha ndra'o; me mofökhö ndra'o, ba no möi ami mufaigi ndra'o; ba me sodo ba gurunga, ba no möi ami khögu.

37 Ba latema dania linia satulö andrö, lamane: He Tua, ha mega ma'ila solofo ndra'ugö, ba mabe'e göu! ba ma sowökhi tödö ndra'ugö, ba mafabadugö khöu nidanö? 38 Ba ha mega ma'ila, tome ndra'ugö, ba mafa'amöi'ö yomo? ba ma si lö nukha ndra'ugö, ba mafonukha'ö? 39 Ba ha mega ma'ila sotökhö ndra'ugö, ba ma si so ba gurunga, ba möiga khöu?

40 Ba itema dania lira razo andrö, imane khöra: Si ndruhu niŵa'ögu khömi, ndrege nilaumi ba dalifusögu andrö, fondrege zi numana, ha niha ia, ba khögu no milao da'ö.[13]

41 Awena dania imane göi ba zi so ba gabera: Milabu ami, ya'ami, ni'elifi, mi'ae ba galitö andrö, si lö mate-mate, ni'ebua'ö khö Gafökha andrö ba ba mala'ikania.[14]

42 Olofo ndra'o, ba lö nibe'emi ögu; owökhi dödögu, ba lö nifabadugömi khögu;[15] 43 tome ndra'o, ba lö nifa'amöimi yomo ya'o; lö nukhagu, ba lö nifonukhami ya'odo; mofökhö ndra'o, ba ba gurunga sodo, ba lö si möi ami mamaigi ya'o.

44 Ba latema dania linia, ya'ira göi, lamane: He Tua, ha mega ma'ila solofo ndra'ugö, ba ma sowökhi tödö, ba ma tome, ba ma si lö nukha, ba ma sofökhö, ba ma si so ba gurunga ndra'ugö, si lö si möiga ngoni-ngoniu?

45 Ba itema dania lira, imane: Si ndruhu niŵa'ögu khömi, ndrege zi lö nilaumi khö wondrege zi numana andrö, ha niha ia, ba khögu göi lö nilaumi da'ö.

46 Ba möi da'ö ba wa'afökhö si lö aetu andrö, ba satulö andrö, ba möi ba wa'auri si lö aetu.[16]

Famotokhi ba gahe[edit | edit source]

  1. Fam 19:7 b.t.; KorII 11:2
  2. Luk 12:36
  3. Luk 13:25 b.t.
  4. Faigi 7:22,23; Luk 13:27
  5. Ayati 14–30: Luk 19:11–28
  6. Faigi 24:45,47
  7. Faigi 13:12
  8. Faigi 8:12
  9. Faigi 16:27; Luk 21:27
  10. Rom 14:10; KorII 5:10
  11. Hes 34:17 b.t.
  12. Yes 58:7
  13. Faigi 10:40; Amaed 19:17; Mar 3:35
  14. Faigi 7:23; Yes 30:33; Fam 20:10,15; 21:8
  15. Yak 4:17
  16. Dan 12:2; Yoh 5:29

Fabaliŵa lala[edit source]

Sura Mataio: 12345678910111213141516171819202122232425262728

Amabu'ulali Sibohou: MataioMarekoLukaYohaneHalöŵö ZinengeRomaKorindro IKorindro IIGalatiaEfesoFilifiKoloseTesalonika ITesalonika IITimoteo ITimoteo IITitoFilemoHeberaioYakoboFetero IFetero IIYohane IYohane IIYohane IIIYudaFama'ele'ö

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö