Wb/nia/Yobi/3

I. I'elifi mbaŵa wa'atumbunia Yobi

1 Aefa da'ö, ba humede Yobi, i'elifi mbaŵa wa'atumbunia. 2 Humede ia, imane:

3 "Yatekiko mbaŵa andrö, ba zi tumbu ndra'o, ba bongi andrö, me laŵa'ö: No tumuge nono matua! 4 Ya'ogömi-gömi mbaŵa da'ö; böi yamusofu ia Lowalangi si yaŵa ba böi yatobaha khönia fa'amoluo! 5 Ndramu'andrö mangawuli ia fa'ogömi-gömi ba si bongi; yamuhawui ia salu ba yamufeta'u ia fangogömi-gömisi zi moluo. 6 Bongi andrö, ba yamöi ondra'ua zogömi-gömi: Böi omuso dödönia ba ngenoli mbaŵa ndröfi andrö, böi yala'erai awö mbaŵa bö'ö. 7 Ya lö tumbu niha sa'ae ba mbongi da'ö: böi ya'owua-wua dödö niha ba khönia! 8 Ndramu'elifi ia sangelifi baŵa, sangila mamarou maliu. 9 Yandrundrumö ndröfinia na arakha moluo: yamudöna-döna haga — zaya-zaya gölö! alösu böi yamu'ila hörö wa'amoluo! 10 Me lö niduhönia khögu talu ninagu ba me lö nibini'önia khögu famakao, fa böi i'ila hörögu!

II. Mangarö-ngarö ia ba wamakao andrö

11 Hana wa lö mate ndra'odo ba dalu ninagu? hana wa lö aetu nosogu, me böla ndra'o? 12 Hana wa nihagi na ndra'odo ba hana wa la'oro'ö khögu mbalö meme, nisisiögu? 13 Tobali no adölö tou ndra'o mena'ö iada'e, ba molombase; mörö mena'ö ndra'o ba ahono dödögu, 14 awö razo ba awö gumandru, sangotomosi khöra adudula, 15 ba ma awö zalaŵa sebua ana'a, samo'ösi omora firö. 16 Ba ma zui si mane tabina saekhu, niko'o ba danö; lö'ö manö ya'odo, si mane tabina, si lö irai mangila haga zi moluo. 17 Ba da'ö labato wabötusa sebua horö ba ba da'ö ahono zi no atage. 18 Sohahau dödö nikuru fefu, lö larongo li mandru. 19 He iraono ba he satua, ba fagölö-gölö ba da'ö, ba aefa zawuyu khö zokhö ya'ia. 20 Hana wa ifohaga zi numana, ba hana wa i'orifi zabu tödö? 21 Si döna-döna fa'amate ba lö alua, sangalui ya'ia moroi ba wangaluinia ana'a. 22 Somuso sibai tödö, si karaini fa'iki ena'ö, na falukha lewatö. — 23 Hana wa tefohaga niha, si no tobini lala, niba'a Lowalangi fasui? 24 Noa sa salahi gögu wangarö-ngarö ba no amaedola gelea wege-egegu andre. 25 Na ata'udo hadia ia, ba no gönado ya'ia, ba hadia zihokha mbugu, ba itörödo. 26 Lö si falukhado na wa'ahono, ba he folombase ba he fa'ohahau dödö, ba hiza sa'ae [zui] wamahufa!"

Famotokhi ba gahe

Fabaliŵa lala

Olayama Yobi: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö