Jump to content

Wb/nia/Yobi/15

From Wikimedia Incubator
< Wb‎ | nia‎ | Yobi
Wb > nia > Yobi > 15

I. Itegu Yobi ba huhuonia fayaŵasa andrö

[edit | edit source]

1 Ba itema li Yobi Elifasi andrö, banua Dema, imane:[1] 2 "Hadia, ilau maö huhuo nifahokha niha satua-tua, wanedema li, ba hadia, ifo'ösi narö dotonia angi timu — 3 fasosota si lö boto ba huhuo si lö guna? 4 Ba öfara'u na'i wangata'ufi Lowalangi, ba taya gera-era ba wangandrö khö Lowalangi, öbe'e. 5 Horöu andrö sa'ae wangatua-tua mbeweu, ba huhuo zonekhe ötuyu. 6 Bawau andrö zangetu'ö hukumö, ba beweu andrö zi möi sasi, udumö. 7 Hadia, si a'a niha ndra'ugö, me tumbu'ö, ba si a'a ndra'ugö moroi ba hili ba danö, me börötau? 8 Hadia, no örongo dödö Lowalangi, ba no öra'ui wa'atua-tua?[2] 9 Hadia ni'ilau, si lö ma'ila ena'ö, ba hadia zaboto ba dödöu, si lö aboto ba dödöma? 10 Ba khöma göi so zatua ba si no tohare huwa, sara ba guli danö, moroi ba wa'ara namau![3] 11 Hadia, ambö khöu wondrara tödö andrö, khö Lowalangi, ba fangehao li andrö khöu? 12 Hadia wa ifarou ndra'ugö falösökhi-sökhi dödöu, ba hadia wa tegaölögaölö bakha höröu, 13 wa no maoso dödöu khö Lowalangi, wa alua ba mbeweu wehede [si manö]?[4]

II. Samösa lö niha satulö

[edit | edit source]

14 Hadia niha, fa sohau-hau ia ena'ö, ba he moroi wa'atulö ni'adonogö ndra alawe?[5] 15 Hiza, ba ni'amoni'ö andrö khönia na'i aombö dödönia, ba banua si yaŵa, ba tenga sohau-hau wamaiginia.[6] 16 Ba mendrua manö ni'ogorofi andrö, si no fakuyu manö — niha andrö, samamadu idanö si lö atulö. 17 Da'u'ombakha'ö khöu, fondrongondrongo khögu, ba hadia zi no i'ila hörögu, ba udunö-dunö khöu. 18 Ni'ombakha'ö zatua-tua andrö, si lö labini'ö, si otarai götö ndra tua sa'ae. 19 Khöra manö na danö; lö'ö na sa niha bö'ö si fatewu khöra.

III. Famakao ba fökhö, ba no lua-lua walöatulö

[edit | edit source]

20 Ba zebua horö, ba sagötö ya'ia, ba lö aefa wa'afökhö, ba no muhuku ndröfi ba zi höndrögö awönia. 21 Humöngö ba dögi dalingania zata'u ita; na lö hadia ia taŵa'ö, ba ihawui ia samufu.[7] 22 Aetu khönia wanötöna fa'aefa ba zogömi-gömi, ba no muhonogöi khönia mbawa zi'öli. 23 Mowaö-waö ia misa, mangalui gö — ba heza so? — i'ila, wa no mube'e fönania mbaŵa si lö haga.[8] 24 Ikeani ia fa'abu dödö ba fa'ata'u; ira'u ia, si mane razo si no mama'anö ya'ia ba wanuwö, 25 me no i'oro'ö dangania, fa'udusa ba Lowalangi, ba me no ilaŵa Zi lö ambö fa'abölö. 26 Amaedola isuwö — no abe'e mbörö du'i — ilau hulu mbalusenia, si no awe'e-we'e, 27 me no ibe'e balu-balu mbawania dawö ba me no motawö göi löwi-löwinia,[9] 28 me no i'agö mbanua nilakha'ö, ba me no i'onahia nomo, si lö tola so niha, si no muhonogöi adudula.[10] 29 Lö falukha mo'ana'a, ba lö aro ba dangania nibaya-bayania, ba lö adada ba danö nifa'ua zi manö. 30 Lö aefa ia ba zogömi-gömi; lewiönia, ba oköli ba galitö, ariri ia ba wönu Lowalangi.[11] 31 Böi abe'e dödönia ba waya, elungu ia: faya sa dania wangali. 32 Lö'ö na sa irugi baŵania, ba no itörö, ba aleu mbulu nohi khönia. 33 Itorugö mbuania si lakiritö, si mane agu, wa'atoru mbowonia, si mane fa'atoru mbowo falo. 34 Nga'ötö zebua horö, ba no timba zi mate, ba alitö zi manga nose zi manga gana'a. 35 Manabina famakao ira, ba la'adonogö wamakiko; faya lua-lua dalura."[12]

Famotokhi ba gahe

[edit | edit source]
  1. Yer 49 b.t.
  2. Rom 11:34
  3. Yer 49:7
  4. Yak 3:6 b.t.
  5. Faigi 4:17; Sin 14:3
  6. Faigi 25:5; 1:6 b.t.
  7. TesI 5:3
  8. Sin 59:16; 109:10
  9. MozV 32:15; Sin 17:10
  10. RazI 16:34
  11. Faigi 4:9
  12. Sin 7:15; Yes 59:4

Fabaliŵa lala

[edit source]

Olayama Yobi: 123456789101112131415161718192021222324252627282930313233343536373839404142

Amabu'ulali Siföföna: Moze IMoze IIMoze IIIMoze IVMoze VYosuaSanguhukuRutiSamueli ISamueli IIRazo IRazo IINga'ötö INga'ötö IIEseraNehemiaEsiteraYobiSinunöAmaedola ZelomoSangombakhaSinunö SebuaYesayaYeremiaNgenu-Ngenu YeremiaHezekieliDanieliHoseaYoeliAmosiObadiaYonaMikhaNakhumiHabakukiSefaniaHagaiSakhariaMaleakhi

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö