Wb/nia/Yobi/1
I. Fa'atulö Yobi andrö ba fa'ohahau dödönia
[edit | edit source]1 So niha [föna], ba danö Usi, Yobi döinia, niha satulö ba sadölö tödö, sangata'ufi Lowalangi ba si fa'udu ba zi lö sökhi.[1] 2 Ba fitu nononia matua ba tölu nono alawe. 3 Ba 7.000 khönia mbiri-biri ba 3.000 gondra, ba 500 fasa zaŵi ba 500 galide si alawe, ba ato sibai zawuyunia; tobali salaŵa niha da'ö, moroi ba niha bö'ö fefu, tanö ba gatumbukha luo. 4 Ba maoso-maoso nononia matua, lalau fatome, samösa ma'ökhö, ba lafakaoni-kaoni'ö dalifusöra alawe si datölu andrö, ba wemanga khöra.
5 Ba na no fatutu watomesa andrö, ba ifaŵa'ögö khöra Yobi, ena'ö na lasala'ö ira. Ba ihulö wongi wemaoso, ibe'e zumange nitunu, i'ohia'ö wa'atora. Imane sa'ae Yobi: Ma dania no molalö nonogu andrö, ma no la'erogö Lowalangi tödöra! Si manö-manö wolau Yobi andrö.
II. Ilulu Yobi Lowalangi ba danga Zatana ba wanandraigö ya'ia
[edit | edit source]6 Ba samuza ma'ökhö, ba so nono Lowalangi, ba wangondrasi Yehowa, ba fao göi khöra Zatana.[2]
7 Ba imane Yehowa khö Zatana: Heza ö'otarai?
Itema li Yehowa Satana, imane: U'otarai kumoli, no utöröi guli danö![3]
8 Ba imane Yehowa khö Zatana: Hadia, no önehegö göi genonigu Yobi andrö? Lö'ö sa famaedonia ba guli danö, ba wa'atulö ba ba wa'adölö dödö, ba wangata'ufinia Lowalangi ba ba wa'udusa ba zi lö sökhi.
9 Itema li Yehowa Satana, imane: Hadia, i'ata'ufi göi Lowalangi Yobi, lö böli gölönia? Tenga no öfoba'a-ba'a ia ba omonia, fabaya fefu zi so khönia, fasui? 10 Halöŵö dangania, ba no öfahowu'ö, ba itugu oya manö gurifönia ba danö. 11 Ba tema oro'ö dangau ba babaya zi so khönia fefu, ba lö zi lö ikaoni ba mbawau, wa i'erogö ndra'ugö.
12 Ba imane Yehowa khö Zatana: Hiza, fefu hadia ia, zi so khönia, ba ya so ba dangau, ba böi babaya mbotonia!
Ba mofanö Zatana, iröi Yehowa.
III. Taya fefu zi so khönia ba tekiko göi nononia. Fa'ebolo dödönia
[edit | edit source]13 Ba ha samuza ma'ökhö, me manga-manga nono Yobi ono matua ba ononia alawe, ba nomo ga'ara si a'a, ba me labadu-badu nagu, 14 ba so zangombakha turia khö Yobi; imane: No manguhundra laza zaŵi ba mangalui göra galide si alawe, ba hinölu, 15 ba so manö Ndrawa Zaba, la'oloi'ö, ba la'ö'ötö si'öli zawuyu, ba ha ya'o zoloi, ba wangombakha khöu. 16 Ba lö saetu na li da'ö, ba so zamösa tö, imane: No aekhu galitö Lowalangi, moroi ba mbanua si yaŵa, ba no i'a mbiri-biri, fabaya sawuyu, ba ha ya'o zoloi, ba wangombakha khöu.[4] 17 Ba lö saetu na li da'ö, ba so zamösa tö, imane: Tölu bawa zabölö Ndrawa Galedaia, ba lahawui manö gondra, larabu; ba sawuyu, ba la'ö'ötö si'öli, ba ba ya'o zoloi, ba wangombakha khöu. 18 Ba lö saetu na li da'ö zui, ba so zamösa tö, imane: Manga-manga mege nonou matua ba onou alawe, ba nomo ga'ara si a'a, 19 ba i'ozumagö so nangi sabölö, moroi ba danö si mate, telobi ba nomo andrö, ba watalingania ma'a'öfa, ba adudu, ilangö ndraonou andrö ba mate ira, ba ha ya'o zoloi, ba wangombakha khöu.
20 Ba maoso Yobi, isika nukhania, ifatöwö'ö mbunia; ba ifalögu tou ia ba danö, mangalulu ia.[5] 21 Imane: Lö nukhagu, me u'otarai dalu ninagu, ba lö nukhagu, na mangawulido dania, Yehowa zame'e ba Yehowa zangai; nisuno döi Yehowa![6]
22 Ba da'ö fefu, ba lö lalö Yobi, ba lö iŵa'ö si lö göna nilau Lowalangi.[7]
Famotokhi ba gahe
[edit | edit source]Fabaliŵa lala
[edit source]Olayama Yobi: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö