Wb/nia/Nga'ötö II/9

Möi tome Zelomo razo Zaba, ira alawe

I. 1 Ba me irongo duria Zelomo razo Zaba andrö, ira alawe, ba möi ia, ba wanandraigö Selomo ba dahö-dahö; ato sibai nawönia fao, fabaya ondra, sonoro famasa ba dalu-dalu ba ana'a ba feremata, oya sibai, ni'ohe ba Yeruzalema. Ba me irugi Zelomo, ba fahuhuo ia khönia, ibokai fefu hadia ia zi so ba dödönia. 2 Ba itema linia Selomo, ba nisofunia khönia fefu; lö hadia ia zi lö aboto ba dödö Zelomo, lö hadia ia zi tebai itema linia. 3 Ba me irongo wa'atua-tua Zelomo razo Zaba, ba me i'ila gödo andrö nilau Zelomo, 4 ba öra andrö ba meza khönia, ba omo genoninia, awö halö-halöŵö zangai halöŵö yomo khönia, awö nukhara, ba sama'oli gö khönia, awö nukhara, ba sumange andrö khönia, nibe'e-be'enia ba gosali Yehowa, ba tobali sibai dödönia, 5 ba imane khö razo: Si ndruhu manö nirongogu ba danögu, ba ngawalö hadia ia khömö, ba ba wa'atua-tuamö andrö! 6 Lö si faduhu dödögu nidunö-dunö niha, irege no urugi, ba irege no i'ila hörögu. Ba ambö na i matonga ni'ombakha'ö khögu, faafahöna wa'atua-tuamö andrö; ötalu'i na duria andrö, nirongogu. 7 Ya ahowu ndra alawe khöu, ba ya ahowu genoniu andre, si lö aefa-aefa khöu, wamondrongondrongo fa'atua-tuamö andrö! 8 Nisuno Yehowa, Lowalangiu andrö, si no mangomasi'ö ya'ugö, wamedadao ya'ugö ba dadaoma andrö khönia, razo khö Lowalangiu, Yehowa, börö wa'omasi Lowalangiu Ndraono Gizeraeli, fa lö ibulö'ö ira, götö-götö wa'ara; andrö wa no ibali'ö razora ndra'ugö, ena'ö huku si sökhi öfatörö ba satulö! 9 Ba ibe'e bualania khö razo, ba 476.460 balaki gana'a, ba famasa ba dalu-dalu ba feremata, oya sibai; lö'ö manö ifuli dania si manö [wa'oya] wamasa ba dalu-dalu, si mane nibe'e razo Zaba andrö khö razo Selomo. 10 Ba banua Huramo no mege göi ba banua Zelomo, si no möi mangai ana'a ba Gofiri, ba lasao'ö göi geu sendrana ba feremata. 11 Ba eu sendrana andrö, ba ibali'ö ora Selomo, he ba gosali, ba he ba gödo razo, ba biola nitika, side-ide ba sebua, fakake zanunö andrö; lö murai mu'ila zi manö föna, ba danö mado Yuda. 12 Ba razo Selomo, ba ibe'e khö razo Zaba fefu hadia ia zomasi ia, awö ni'andrönia, lö lai ni'ohenia khö razo. Ba maoso ia, mofanö, ifuli ia khöra, awö genoninia.

Fa'ebua gana'a Zelomo, awö lakhöminia

II. 13 Ba ana'a nisöndra Zelomo döfi, ba 2.544.353 balaki, 14 lö lai nisöndrania ba zi möi-möi maniaga ba ba zolafo; ba dozi razo Ndrawa Ara ba he kumandru ba danö, ba labe'e khö Zelomo gana'a ba firö. 15 Ba 200 ifafazökhi Selomo dange, ana'a niböbözi: 600 fondruyu zambua; 16 ba 300 mbaluse, ana'a niböbözi: 300 fondruyu zambua. Ba ibe'e ba nomo eu hili Libano Selomo. 17 Ba ifalau'ö göi dadaoma razo Selomo, dadaoma sebua, ifö guaza, ba ifo'uli balaki. 18 önö mbosi dadaoma andrö ba baku-baku gahe nifadoro khönia. Ba ba dadaoma, ba no faoma fatambai latalata da'io; ba zinga latalata da'io andrö, ba dua geu wamaedo zingo. 19 Ba felendrua wamaedo zingo ba mbosi no mege, si önö, fatambai. Lö murai mulau zi manö ba razo bö'ö, heza. 20 Ba mako razo Selomo, mako ba wamadu, ba ana'a; ba he gama-gama [bö'ö] fefu, ba nomo eu hili Libano, ba balaki manö, lö hadia ia wirö, me no lö'ö manö ba dödöra wirö, ba götö Zelomo andrö. 21 Noa sa so nowo khö razo, soloyo ba Darisi, awö mbanua Huramo andrö; ero medölu fakhe, ba so nowo andrö, soloyo ba Darisi, ba ösi, ba ana'a ba firö ba ifö guaza ba ba'e ba fofo meraki. 22 Ba italu'i razo bö'ö ba guli danö fefu razo Selomo, ba wa'ebua gana'a ba ba wa'atua-tua. 23 Ba dozi omasi razo ba guli danö la'ila Zelomo ba lafondrondrongo wa'atua-tuania andrö, nibe'e Lowalangi ba dödönia. 24 Ba oi dozi la'ohe mbuala, gama-gama firö ba gama-gama ana'a ba nukha ba fangöna ba famasa gö ba dalu-dalu ba kudo ba kalide kudo, ero röfi. 25 Ba 4000 fasa khö Zelomo kudo ba kureta, ba 12.000 zi fakudo; ba ba mbanua gureta andrö ifataro da'ö ba ba zi tefasui ya'ia ba Yeruzalema. 26 Ba barö mbawania razo fefu, i'otarai Oifarati ba irugi danö Ndrawa Wilisiti ba ola danö Miserayi. 27 Ba falaŵalaŵa ira gara wirö, wa'oya, ba Yeruzalema ibe'e razo, ba timba döla geresi döla ara gatua ba ndraso. 28 Ba moroi ba danö Miserayi lafa'ema khö Zelomo kudo ba moroi ba danö bö'ö fefu.

Fa'amatenia

III. 29 Ba bö'önia hikaya Dawido, he föna, ba he safuria andrö, ba no mutanö ba zura hikaya andrö khö Natano sama'ele'ö ba ba wama'ele'ö Gahia, banua Zilo, ba ba gangilata Yedo sangi'ila, khö Yerobeamo, ono Nebati. 30 Ba 40 fakhe razo Zelomo ba Yeruzalema, razo Ndraono Gizeraeli fefu. 31 Ba mate Zelomo, itörö lala ndra amania, ba lako'o ia ba mbanua namania Dawido andrö. Ba fangalinia razo ba ononia Rehabeamo.

Famotokhi ba gahe

Fabaliŵa lala

Olayama Nga'ötö II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö