Wb/nia/Nga'ötö II/33

Same'e-me'e adu Manase. Lara'u ia Dawa Asiria ba la'oloi'ö ba khöra

I. 1 Ha mewelendrua fakhe Manase, me tobali razo ia, ba 55 fakhe razo ia ba Yeruzalema. 2 Ba si fatuwu khö Yehowa ilau, i'ohia'ö zogoro ita ba niha baero andrö, nitimba Yehowa mege föna Ndraono Gizeraeli. 3 Ifuli i'a'azökhi hili-hili andrö, nidudugö namania Hisikia mege, ba ifa'anö naha wame'e sumange ba Mba'ali andrö, ba ifazökhi Gasera, ba mangalulu ia ba ngahönö ba mbanua si yaŵa ba ifosumange da'ö. 4 Ba ifa'anö göi naha wame'e sumange [ba nadu] bakha ba gosali Yehowa, ba niŵa'ö Yehowa: Ba Yeruzalema nahia döigu, si lö mamalö-malö. 5 Ba ba golayama gosali Yehowa, si dua görö, ba ifa'anö naha wame'e sumange ba ngahönö andrö fefu, ba mbanua si yaŵa. 6 Ononia matua ifatörö ba galitö, ba ndraso Mbeni-Hinomo, fakelemu ia ba faeta ba hadia ia nekhe-nekhe bö'ö ba zi tobini; ba ifataro zogaoni bekhu ba sangombakha eluaha gila-ila; oya ngawalö ilau si fatuwu khö Yehowa, ba wangandrö fönunia. 7 Ba adu nifu andrö, nifalau'önia, ba ibe'e ba gosali Lowalangi, ba niŵa'ö Lowalangi khö Dawido ba khö nononia Selomo: Osali andre, awö Yeruzalema, nituyugu, ba mado Ndraono Gizeraeli fefu, ba ubali'ö nahia döigu, götö-götö wa'ara. 8 Ba lö'ö sa'ae uwu'ai gahe Ndraono Gizeraeli ba danö andrö, nibe'egu khö ndra tuami, balazi na so ba dödöra wolo'ö fefu hadia ia niŵa'ögu khöra, na latörö sibai goroisa andrö, awö gamakhoita, awö lala andrö, nifa'ema Moze. 9 Ba tobali ifowöhö mado Yuda ba banua Yeruzalema Manase, ba wolau si lö sökhi, sabölö-bölö moroi ba nilau niha baero andrö, nihori Yehowa föna Ndraono Gizeraeli. 10 Ba humede Yehowa khö Manase ba ba mbanuania, ba lö lafondrondrongo. 11 Ba ifa'amöi khöra Yehowa zolohe sanuwö khö razo Asiria; ba lara'u Manase khai-khai, ba laböbö ba la'ohe ba ba Mbabeli.

Ifalalini gera-erania ba ibe'e aefa horönia Lowalangi

II. 12 Ba me no abu dödönia, ba i'alui wa'ebolo dödö Lowalanginia Yehowa, i'ide-ide'ö sibai ia föna Lowalangi ndra tuania. 13 Ba me mangandröngandrö ia khönia, be ifondrondrongo linia. I'o'ö khönia wakaosania andrö, ba i'ohe mangawuli ia ba Yeruzalema, ifuli ifataro razo. Ba awena aboto ba dödö Manase, wa Yehowa Lowalangi. 14 Ba aefa da'ö, ba ifalau'ö göli kara andrö, tanö baero, ba mbanua Dawido, tanö ba gaekhula luo, mitou ba Gihona, ba ndraso, irugi ba lala miyomo ba mbawa göli gi'a, ifasui Gofeli andrö, öli salaŵa sibai. Ba ifataro göi gumandra ba mbanua saro, ba mado Yuda, fefu. 15 Ba iheta ba gosali Yehowa nadu andrö, adu niha baero, ba adu famaedo andrö, fabaya naha wame'e sumange fefu, nifa'anönia ba hili gosali Yehowa ba ba Yeruzalema, itibo'ö baero mbanua. 16 Ba ifuli i'azökhi naha wame'e sumange khö Yehowa ba ibe'e zumange fangorifi ba sumange fangandrö saoha gölö, ba da'ö; ba ibe'e li ba mado Yuda, ena'ö Yehowa, Lowalangi Ndraono Gizeraeli lafosumange. 17 Ba niha sato, ba si dörö-dörö mame'e sumange ba hili-hili andrö, he ŵa'ae khö Lowalangira Yehowa labe'e.

Fa'amatenia

III. 18 Ba bö'önia hikaya Manase ba fangandrönia andrö khö Lowalanginia, awö niŵa'ö zangi'ila andrö, sama'ema khönia niŵa'ö Lowalangi Ndraono Gizeraeli, ba no mutanö ba zura hikaya razo Ndraono Gizeraeli. 19 Ba fangandrönia andrö, ba he wisa wamondrongo Yehowa linia, awö horönia andrö fefu, ba falimosania, awö naha andrö misa, ba nifazökhinia hili-hili, awö nibe'enia Asera ba adu nifu, me lö ni'ide-ide'önia ya'ia na, ba no mutanö ba zura hikaya nisura zangi'ila andrö. 20 Ba mate Manase, itörö lala ndra amania, ba ba ngai nomonia lako'o ia. Ba fangalinia razo, ba ononia Amoni.

Mame'e-me'e adu göi Gamoni

IV. 21 Dua wulu a rua fakhe Gamoni, me tobali razo ia, ba ha mendrua fakhe razo ia ba Yeruzalema, 22 Ba si fatuwu khö Yehowa ilau, si mane amania Manase mege. Ba nadu nifu andrö fefu, nifazökhi Manase mege, ba i'oya'ö zumange Amoni, enoni da'ö ia. 23 Ba lö'ö sa i'ide-ide'ö ia föna Yehowa, si mane amania mege; ya'ia, Amoni, ba ihöna manö horö ba hulunia. 24 Ba mamagölö genoninia, ba wamunu ya'ia, ba labunu ia ba gödonia. 25 Ba labunu göi fefu zamagölö mege ba wamunu razo Amoni niha ba danö; ba lafataro fangalinia razo nononia Yosia niha ba danö.

Famotokhi ba gahe

Fabaliŵa lala

Olayama Nga'ötö II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö