Wb/nia/Nga'ötö II/17

Fa'atulö dödö Yozafati, awö wofozu wolaunia

I. 1 Ba ononia Yozafati zi tobali razo fangalinia, ba abe'e da'ö, udu Ndraono Gizeraeli. 2 Ba idozigö banua saro wamataro sabölö, ba ba danö mado Yuda ba ba mbanua mado Geferayi andrö, nifadöni namania Asa khöra, ba ifataro zanaro. 3 Ba itolo Yozafati Yehowa, me no sanörö lala duania Dawido ia, lala ba mböröta, ba tenga si olembai Ba'ali andrö ia, 4 lö'ö sa iböhöli Lowalangi duania andrö, i'o'ö goroisania, tenga si mane Iraono Gizeraeli. 5 Andrö tedou wa'asalaŵa, me ya'ia zolohe, ibe'e Yehowa; ba mado Yuda fefu, ba momamuala khö Yozafati, ba tobali fahöna khönia gana'a, ba he sumange.

Itibo'ö nadu

II. 6 Ba me itugu abe'e dödönia wanörö lala andrö, nifakhoi Yehowa, ba iheta göi hili-hili andrö, fabaya eu ni'amoni'ö andrö, ba mado Yuda. 7 Ba me no alua mendrua fakhe razo ia, ba ifatenge nawönia salaŵa andrö: Benihaili ba Obadia ba Sakharia ba Netana'eli ba Mikhaya, ba wamahaö banua mado Yuda, 8 ba ibe'e awöra Nono Lewi: Semaya ba Netania ba Sebadia ba Azaheli ba Semiramoto ba Yonata ba Adonia ba Tobia ba Tobi-Adonia, Ono Lewi andrö, ba fao na göi gere, Elisama ba Yoramo. 9 Da'ö zamahaö mado Yuda; la'ohe zura goroisa Yehowa ba latöröi mbanua mado Yuda fefu, mamahaö niha sato.

Fa'ebua döinia ba fa'abölönia

III. 10 Ba ihawui fa'ata'u Yehowa gamatöröŵa niha baero fefu, si tefasui mado Yuda, ba tobali lö lasuwö Yozafati. 11 Ba Dawa Wilisiti ösa, ba la'ohe mbuala khö Yozafati, ba firö, beo; ba he Dawa Ara, ba la'ohe khönia gurifö side-ide: 7700 mbiri-biri si matua, ba 7.700 nambi si matua. 12 Ba tobali itugu tedou manö wa'abölö Yozafati, irege no fahöna, ba itaru'ö hati ba danö mado Yuda ba banua ba nihöna balazo. 13 Ba no fahöna khöra mbalazo ba mbanua mado Yuda andrö ba ato zabölö ba Yeruzalema. 14 Ba da'ö wama'oli ya'ira, ba ngafura andrö: högö ngahönö ba mado Yuda, ba Adena, högö, ba 800.000 nawönia sabölö; 15 aefa da'ö, ba Yohanano, högö göi, 16 ba 280.000 nawönia sabölö, ba aefa da'ö, ba Amasia, ono Zikhiri, si no mangoro'ö ya'ia khö Yehowa, saoha gölö, ba 200.000 nawönia sabölö. 17 Ba mado Mbeniyami, ba Eliada sabölö andrö, ba 200.000 nawönia si no mangaro, fana ba baluse, 18 ba aefa da'ö, ba Yosabada ba 180.000 nawönia, si no mangaro, ba wasuwöta. 19 Da'ö genoni razo andrö, lö lai nifataronia ba mbanua saro andrö, ba danö mado Yuda ma'asagörö.

Famotokhi ba gahe

Fabaliŵa lala

Olayama Nga'ötö II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö