Wb/nia/Nga'ötö II/34

Ihori nadu Yosia

I. 1 Ha meŵalu fakhe na Yosia, me tobali razo ia, ba 31 fakhe razo ia ba Yeruzalema. 2 Ba somasi Yehowa ilau, itörö lala duania Dawido, lö ihole'ö ia, he ba gambölö, ba he ba gabera. 3 Ba me no alua mewitu fakhe razo ia, me iraono na ia, ba ibörötaigö mangalui Lowalangi duania Dawido, ba me no alua mewelezara fakhe, ba ibörötaigö mangehao tanö mado Yuda, awö Yeruzalema, wangeheta hili-hili andrö ba Asera andrö ba adu nifu ba adu nifahele. 4 Ba zi so ya'ia ladudugö naha wame'e sumange khö Mba'ali, ba la'eŵa nadu luo andrö, ba dete yaŵa: ba Asera andrö ba adu nifu ba adu nifahele, ba irasa, ifufu ba ifazawili ba dete lewatö zamosumange me mege. 5 Ba töla gere andrö, ba itunu ba dete naha wame'e sumange andrö khöra, wangehao tanö mado Yuda, awö Yeruzalema. 6 Ba ba mbanua mado Manase ba ba mbanua mado Geferayi ba ba mbanua mado Zimeoni ba irugi ba mado Nafetali — ba gadudula khöra misa — 7 ba idudugö naha wame'e sumange, irasa ba ifufu Gasera andrö ba adu nifu; ba adu luo andrö, ba i'eŵa, ba danö Ndraono Gizeraeli ma'asagörö. Ba ifuli ia ba Yeruzalema.

Lahaogö gosali ba lasöndra zura goroisa

II. 8 Ba me no alua mewelewitu fakhe razo ia, me ihaogö-haogö danö ba osali, ba ifatenge Zafana andrö, ono Gasalia, ba kumandra ba mbanua andrö, Ma'aseya, ba sa'asa sebua, Yoa, ono Yoahasi, ba wanga'azökhi osali Lowalanginia Yehowa. 9 Ba möi ira khö gere sebua, Hilikia, ba labe'e ba dangania gana'a andrö, si no mube'e ame'ela ba gosali Lowalangi, ni'ozaragö Nono Lewi andrö, sanaro ba mbawandruhö, ni'ozaragö ba mado Manase ba ba mado Geferayi ba ba mado Gizeraeli bö'ö, fefu, ba he ba mado Yuda fefu ba ba mado Mbeniyami ba ba mbanua Yeruzalema. 10 Ba labe'e ba danga högö duka, nifataro ba gosali Yehowa; ba ya'ira zame'e ba zohalöŵö ba gosali Yehowa, ba wanga'azökhi osali, ba ba wangehao. 11 Ba zotomo ba ba duka gara labe'e, ena'ö la'öli gara nitoto ba eu famaböbö andrö ba buatö ba nomo andrö, nidudugö razo mado Yuda mege. 12 Ba mohalö-halöŵö niha, tenga si falimo, lahalö-halö halöŵö andrö, niŵa'ö khöra: Ono Lewi andrö, Yahata ba Obadia, ma'uwu Merari ba Sakharia ba Mesula, ma'uwu Gahati, ba wamaigi-maigi. Ba Ono Lewi andrö — dozi si no to'ölö molau hadia nifoli ba wanunö — ba labe'e mandru zonoro. 13 Ba dozi si so halöŵö hadia ia, ba nifomandru. Ba ba Nono Lewi andrö, ba no durutuli ösa, ba amaedola gumandru ösa ba sanaro ba mbawandruhö ösa. 14 Ba me lasao'ö baero gefe andrö, si no mube'e ba gosali Yehowa, ba isöndra zura goroisa Yehowa Hilikia ere, sura khö Moze no andrö. 15 Ba humede Hilikia, imane khö durutuli Safana: No usöndra zura goroisa, ba gosali Yehowa. Ba ibe'e ba danga Zafana zura andrö Hilikia. 16 Ba i'ohe khö razo Safana ba i'ombakha'ö khö razo mbö'önia göi, imane: Fefu hadia ia halöŵö niŵa'öu ba genoniu, ba no lahalö. 17 No lafaduwa gefe andrö, ba gosali Yehowa, ba no labe'e ba danga nifataro samaigi-maigi ba ba danga högö duka. 18 Ba imane na göi khö razo Safana durutuli: No ibe'e khögu zura Hilikia ere. Ba ibaso ösa Safana, khö razo.

Ifakaoni'ö zama'ele'ö ira alawe andrö, Huleda, Yosia, ba hadia niŵa'ö da'ö

III. 19 Ba me irongo daroma li oroisa andrö razo, ba itika nukhania. 20 Ba ibe'e li razo khö ndra Hilikia Ahikamo, ono Zafana, Abedono, ono Mikha, Safana, durutuli, Asaya, ngoni-ngoni razo, imane: 21 Mi'ae misofu khö Yehowa, ba khögu andre ba ba zi tosai na Iraono Gizeraeli ba mado Yuda, ba zura andrö nisöndra; ebua sibai sa wönu Yehowa, si no tesao khöda, me no lö ba dödö ndra tuada oroisa Yehowa, ba wolo'ö sibai mena'ö si so ba zura andrö. 22 Ba Hilikia andrö, awö nitöföi razo töi andrö, ba möi khö Huleda andrö, sama'ele'ö ira alawe, fo'omo Zalumi, samaigi-maigi nukha, ono Dokahata ono Hasera; ba Yeruzalema so nomonia, tanö si tou, ba humede ira khönia, lasofu khönia. 23 Ba imane khöra: Da'ö niŵa'ö Yehowa, Lowalangi Ndraono Gizeraeli: Mimane ba niha andrö, samatenge ya'ami khögu: 24 Da'ö niŵa'ö Yehowa: Si ndruhu, famakao ufatörö ba mbanua andre, ba ba nösinia, fangelifi andrö fefu, si so ba zura andrö, nibasora khö razo mado Yuda; 25 börö me no la'erogö ndra'o, ba me no lafosumange Lowalangi bö'ö, ba wangandrö fönugu nilau dangara andrö fefu; andrö wa tesao wönugu sebua ba mbanua andre, si tebai tebato. 26 Ba khö razo mado Yuda, samatenge ya'ami, ba wanofu khö Yehowa, ba mimane: Da'ö niŵa'ö Yehowa, Lowalangi Ndraono Gizeraeli, ba daroma li andrö, nirongou: 27 Me no ombuyu dödöu, ba me no ö'ide-ide'ö ndra'ugö föna Lowalangi, me örongo niŵa'önia nitandrösaigö ba mbanua da'e ba ba nösinia, me no ö'ide-ide'ö ndra'ugö fönagu, ba me no ötika nukhau, ba me no mege-ege'ö fönagu, ba noa göi ufondrondrongo khöu, iŵa'ö Yehowa. 28 Hiza, u'orudugö ndra'ugö khö ndra amau, ena'ö te'ohe ba lewatömö ndra'ugö lö hadia ia ba ena'ö lö i'ila höröu wamakao andrö fefu, nifatörögu ba mbanua andre dania! Ba laombakha'ö khö razo.

Lafuli fawu'u li khö Yehowa

IV. 29 Ba ifatenge razo, ifakaoni'ö zatua mado Yuda ba satua mbanua Yeruzalema, fefu. 30 Ba möi miyaŵa ba gosali Yehowa razo, awö ndra matua mado Yuda ba banua Yeruzalema, fefu, fabaya ere ba Ono Lewi, awö niha sato fefu, he satua, ba he iraono, ba ibaso khöra niŵa'ö ba zura wawu'usa li andrö fefu, sura nisöndra ba gosali Yehowa. 31 Ba i'agö nahania razo ba fawu'u li föna Yehowa, wa edöna la'o'ö khö Yehowa, wa edöna latöngöni goroisania ba famaduhu'önia ba amakhoitania, soroi si'aikö ba dödö ba ba gera-era fefu, ba wolo'ö taroma li ba wawu'usa li andrö, si so ba zura andrö. 32 Ba iŵa'ö razo latehe wawu'usa li andrö banua Yeruzalema fefu, awö mado Mbeniyami, fefu. Ba banua Yeruzalema andrö, ba labe'e dali khöra wawu'usa li andrö khö Lowalangi, Lowalangi ndra tuara. 33 Ba ihori fefu zogoro ita Yosia, ba danö Ndraono Gizeraeli fefu, ba dozi niha ba danö Ndraono Gizeraeli, ba ifarou ba wamosumange Lowalangira Yehowa. Ba fatua lö si mate ia, ba lö laböhöli wolo'ö khö Yehowa, Lowalangi ndra tuara.

Famotokhi ba gahe

Fabaliŵa lala

Olayama Nga'ötö II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö