Wb/nia/Nga'ötö II/21

Fa'amate Yozafati. Ibunu dalifusönia Yehoramo ba mame'e adu

I. 1 Ba mate Yozafati itörö lala ndra amania, ba lako'o ia ba ngai ndra amania, ba mbanua Dawido. Ba fangalinia razo, ba ononia Yehoramo. 2 Ba so nakhi da'ö, ono Yozafati: Asaria ba Yehieli ba Sekhariahu ba Asariahu ba Mikhaeli, ba Sefatiahu; oi ono Yozafati razo Ndraono Gizeraeli da'ö, ono matua. 3 Ba no ebua mbuala nibe'e namara khöra, firö ba ana'a ba gama-gama ba banua saro, ba mado Yuda. Ba fa'arazo, ba khö Yehoramo itehe, me no si a'a da'ö. 4 Ba me no tobali razo Yehoramo ba gamatöröŵa namania, ba me no i'aro'ö ia, ba ifabunu'ö nakhinia andrö fefu, fabaya satua Ndraono Gizeraeli ösa. 5 Tölu ngafulu a rua fakhe Yehoramo, me tobali razo ia, ba meŵalu fakhe razo ia ba Yeruzalema. 6 Ba itörö lala razo Ndraono Gizeraeli, lala zi sawu ndra Ahabi, noa sa ono Gahabi wo'omonia. Ba si fatuwu khö Yehowa ilau. 7 Ba lö edöna Yehowa, ifakiko nga'ötö Dawido, börö wawu'usa li andrö, me no fawu'u li ia khö Dawido; dali nifabu'unia, wa lö edöna ibulö'ö wandru khö Dawido ba ba nga'ötönia.

Lafabali ira ba mado Yuda Iraono Gedomo

II. 8 Ba götönia aheta Ndraono Gedomo barö mbawa mado Yuda, ba lafataro khöra razo. 9 Ba isaŵa ira miyefo Yehoramo, awö gumandra khönia, awö guretania fefu. Ba maoso ia ba zi bongi, ba ilau ba Ndraono Gedomo andrö, si no mama'u'u ya'ia, ba ba zolohe kureta khöra. 10 Ba aheta barö mbawa Ndraono Gizeraeli Ndraono Gedomo, irugi ma'ökhö andre. Ba me luo da'ö, ba aheta göi Libena, barö mbawa Yehoramo, me no i'erogö Yehowa, Lowalangi ndra tuania. 11 Ba ifazökhi göi hili-hili ba mbanua mado Yuda misa, ifowöhö mbanua Yeruzalema, ba wame'e adu, ba fabali [khö Yehowa] mado Yuda ibe'e.

Ifeta'u Yehoramo Eliya. Itörö niŵa'önia. Fa'amate Yehoramo

III. 12 Ba ifa'ohe'ö zura khönia Eliya sama'ele'ö, imane: Da'ö niŵa'ö Yehowa, Lowalangi duau Dawido: Me no lö nitöröu lala namau Yozafati ba he lala Asa, razo mado Yuda, 13 me no ö'o'ö mbua-bua razo Ndraono Gizeraeli ba me no öfowöhö ba wame'e adu mado Yuda, fabaya banua Yeruzalema, si mane si sawu ndra Ahabi, si no samowöhö ba nadu göi, ba me no öfabunu'ö göi ndra akhiu, nga'ötö namau, si sökhi moroi khöu, ba hiza, 14 ba ihare'ö khömi dania wamakao sebua, ba mbanuau ba ba ndraonou ba ba ngambatöu ba ba zi so khöu, fefu. 15 Ba ya'ugö, ba si göna fökhö sabe'e dania, fökhö talu, ba mato mendrua fakhe dania, ba adudu mbetu'amö! 16 Ba ifarou udu Yehoramo Ndrawa Wilisiti Yehowa, awö Ndrawa Ara andrö, ba ngai Ndrawa Gaitiofia, 17 ba tobali möi ira musuwö mado Yuda, ba atu'a ira ba mbanua, ba lahalö fefu hadia ia zi so ba gödo razo, fabaya iraononia, awö ngambatönia; la'oloi'ö ahulua; lö si tosai ononia, ha Yoakhasi, ononia si akhi. 18 Ba noa da'ö fefu, ba ibözi ia Yehowa fökhö mbetu'a si lö dalu-dalu. 19 Ba moröfi, ba me arakha alua mendrua fakhe, ba adudu mbetu'ania, ba wökhönia andrö, ba mate ia, fa'amate safökhö sibai. Ba lö latunu zamohua khönia banuania, si mane khö ndra amania mege. 20 Tölu ngafulu a rua fakhe ia, me tobali razo ia, ba meŵalu fakhe razo ia ba Yeruzalema. Ba alele ia lö somasi na mangawuli ia ena'ö. Ba ba mbanua Dawido lako'o ia, ba tenga sa ba lewatö razo.

Famotokhi ba gahe

Fabaliŵa lala

Olayama Nga'ötö II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö