Wb/nia/Nga'ötö II/13
Fasuwö ira Gabia Yerobeamo. Huhuo Gabia ba Ndraono Gizeraeli
[edit | edit source]I. 1 Me no alua mewelewitu fakhe razo Yerobeamo tobali razo mado Yuda Gabia.[1] 2 Medölu fakhe razo ia ba Yeruzalema; ba töi ninania, ba Ma'akha, ono Gurieli, banua Gibea. Ba fasuwö ira Gabia Yerobeamo. 3 Abia zi börötaigö fasuwöta andrö, ato sibai khönia zabölö, 400.000 nitutuyu. Ba ifaondragö ia Yerobeamo, no te'anö göi ira, 800.000, sabölö. 4 Ba i'agö zuzu hili Zemara'i Abia, ba hili mado Geferayi, ba mu'ao ia, imane: Mifondrondrongo, ya'ugö Yerobeamo ba ya'ami Iraono Gizeraeli! 5 Hadia, lö mi'ila ena'ö wa no khö Dawido ba ba nga'ötönia ibe'e wa'arazo ba Ndraono Gizeraeli Yehowa, Lowalangi Ndraono Gizeraeli, si lö mamalö-malö, ba wawu'usa li andrö nilau asio?[2] 6 Ba no maoso Yerobeamo andrö, ono Nebati, enoni Zelomo ono Dawido, ilaŵa zokhö ya'ia.[3] 7 Ba no mangondra khönia niha sambö era-era, niha si lö ngaroro, ba no lahöndrögö Rehabeamo, ono Zelomo; me no ono matua na Rehabeamo, sambö fa'abe'e dödö, ba tebai itimba ira. 8 Ba iada'e, ba miwai mi'ila milaŵa wa'arazo andrö khö Yehowa, si so ba danga nga'ötö Dawido, me no ato sibai ami, ba me no awömi nono zaŵi balaki andrö, nifazökhi Yerobeamo Lowalangimi.[4] 9 Hadia, tenga no mitibo'ö gere andrö khö Yehowa, nga'ötö Ga'aroni andrö, fabaya Ono Lewi, ba tenga no miwöwöi khömi gere, si mane ere ba niha baero? Ha niha zolohe ono zaŵi, sageu, ba biri-biri si matua, fitu nga'eu, ba wamamataro'ö ya'ia ere, ba tefataro ere ba zi tenga Lowalangi.[5] 10 Ba Lowalangima, ba Yehowa, ba lö ni'erogöma ya'ia, ba ere khö Yehowa nga'ötö Ga'aroni, ba lahalö-halö halöŵöra Ono Lewi, 11 ero mahemolu ba ero owi latunutunu khö Yehowa zumange nitunu ba kumöyö ba hadia ia zamohua, ba lafa'oli roti andrö ba meza balaki, ba ero owi, ba latunu wandru, ba naha wandru ana'a andrö. Me matöngöni nifakhoi Lowalangima, Yehowa, ba ya'ami, ba no mi'erogö ia![6] 12 Si ndruhu, itolo ndra'aga Lowalangi, solohe ya'aga, ba no fao khöma gere andrö khönia ba torofe andrö fangekhugö niha, ba wangekhugö niha, khömi. He ya'ami, Iraono Gizeraeli! Böi milaŵa Yehowa, Lowalangi ndra tuami, ba wa lö boto sa atö aekhu khömi![7]
Abölö Gabia, te'ala Ndraono Gizeraeli. Lakhömi Gabia ba fa'amatenia
[edit | edit source]II. 13 Ba iŵa'ö Yerobeamo lafasui mado Yuda si no mamini'ö ya'ira mege; ba tobali lafaondragö mado Yuda, ba so göi moroi furi zi no tobini mege. 14 Ba me labali'ö ira furi mado Yuda, ba la'ila, faoma lalau khöra, he moroi föna ba he moroi furi. Ba la'angaröfi li Yehowa, ba lalau dorofe ere, 15 ba lahahagö mado Yuda; ba me lahahagö, ba te'ala Yerobeamo ba Iraono Gizeraeli fefu, ibe'e Lowalangi, khö Gabia ba ba ba mado Yuda. 16 Ba moloi Ndraono Gizeraeli labe'e mado Yuda, ba ibe'e ba danga mado Yuda ira Lowalangi. 17 Ba ato sibai ira nibunu ndra Abia sabölö andrö khönia, tobali 500.000 zi mate nibunu, Iraono Gizeraeli. 18 Ba tobali nihöndrögö Ndraono Gizeraeli, ba sabölö mado Yuda, me no labe'e we'e-we'e dödöra Yehowa, Lowalangi ndra tuara. 19 Ba igohi Yerobeamo Abia, ba ifadöni khönia mbanua ösa: Betieli, fabaya halama soya khöra, ba Eferona, fabaya halama soya khöra. 20 Ba no amomo Yerobeamo, ba götö Gabia andrö. Ba ibözi ia Yehowa ba mate ia. 21 Ba itugu abölö Gabia; 14 ihalö ira alawe, ba 22 nononia, ono matua, ba 16 nono alawe. 22 Ba hadia na niŵa'ö ena'ö, ba khö Gabia andrö, ba bua-buania ba huhuonia, ba no mutanö ba zura hikaya andrö khö Ido sama'ele'ö.[8]
Famotokhi ba gahe
[edit | edit source]Fabaliŵa lala
[edit source]Olayama Nga'ötö II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö