Wb/nia/Nga'ötö II/16

Fasuwö ira Asa Mba'esa. Ihuwu khönia Mbenihada, razo Ndrawa Garamo, Asa

I. 1 Ba me no alua 35 fakhe razo Asa, ba so moroi si yaŵa Mba'esa, razo Ndraono Gizeraeli, ba wanuwö mado Yuda; i'aro'ö Rama, ba womba'a lala niha khö Asa, razo mado Yuda. 2 Ba ihalö wirö ba ana'a Asa ba nahia girö-girö ba gosali Yehowa ba ba gödo razo, ifa'ohe'ö khö Mbenihada, razo Ndrawa Garamo, ba Ndramaseko, imane khönia: 3 Si no fawu'u li ita ba ira amada mege. Ba hiza, ba ufa'ohe'ö khöu wirö ba ana'a: ba labu, dudugö wawu'usa li andrö khömi Ba'esa, razo Ndraono Gizeraeli, ena'ö ibato wanuwö ya'o. 4 Ba ifondrondrongo li razo Asa, Benihada, ba ifatenge ba mbanua Ndraono Gizeraeli gumandra khönia, ba ladudugö Niyono ba Dano, ba Habeli Ma'i ba omo mbalazo nihöna fefu, ba mbanua mado Nafetali. 5 Ba me irongo da'ö Ba'esa, ba iböhöli wangaro'ö Rama, i'etu'ö halöŵönia. 6 Ba i'ohe mado Yuda fefu razo Asa, ba lahalö gara andrö ba eu balo, ni'oguna'ö Mba'esa fangaro Rama, ba ibe'e fangaro Geba ba fangaro Misefa Asa.

Itegu ia ba da'ö Hanani, ba mofönu ia khö zangi'ila andrö

II. 7 Ba me luo da'ö, ba möi khö Asa, razo mado Yuda, Hanani sangi'ila andrö, imane khönia: Me no öbe'e we'e-we'e dödöu razo Ndrawa Garamo, ba me tenga Yehowa, Lowalangi, ba no aefa ba dangau zabölö Ndrawa Garamo andrö. 8 Hadia, tenga no ato sibai Ndrawa Gaitiofia no ba Dawa Libia, ba tenga no oya sibai khöra gureta, awö zi fakudo? Ba me no öbe'e we'e-we'e dödöu Yehowa, ba no ibe'e ba dangau ira. 9 Ihörö-hörögö sa guli danö ma'asagörö Yehowa, ena'ö i'abölögö wanolo si no adölö tödö khönia. Nifolau zi lö tödö khöu da'ö; i'otarai da'e sa, ba lö aefa-aefa khöu wasuwöta! 10 Ba mofönu Asa khö zangi'ila andrö ba ifakuru'ö, börö wönunia khönia ba da'ö. Ba ifakao mbanuania ösa Asa, me luo da'ö.

Fökhö Asa ba fa'amatenia

III. 11 Ba hikaya Asa andrö, he famobörö mege, ba he safuria andrö, ba no mutanö ba zura hikaya razo mado Yuda ba ba hikaya razo Ndraono Gizeraeli. 12 Ba me no alua 38 fakhe razo ia, ba mofökhö ia, fökhö gahe; abölö-bölö sibai wökhönia andrö. Ba he ba wökhönia andrö, ba lö i'alui Yehowa, ha same'e dalu-dalu. 13 Ba mate Asa, itörö lala ndra amania, me no alua 40 fakhe razo ia. 14 Ba lako'o ia ba lewatönia andrö, nifakharu'önia khönia ba mbanua Dawido. Labe'e ba gaso, si no mulau dalu-dalu ba hadia ia ngawalö zamohua, nifaruka, si mane na lafaruka dalu-dalu nigule'ö; ba ebua latunu samohua khönia.

Famotokhi ba gahe

Fabaliŵa lala

Olayama Nga'ötö II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö