Wb/nia/Nga'ötö II/14

Razo Asa, razo satulö tödö, ba sofozu wolaunia

I. 1 Ba mate Gabia, itorö lala ndra amania, ba ba mbanua Dawido andrö lako'o ia. Ba fangalinia razo, ba ononia Asa. Ba me razo da'ö, ba lö hadia ia, sahono manö ira ba danö, mewulu fakhe. 2 Ba satulö ilau Asa ba si sökhi wamaigi Lowalanginia, Yehowa. 3 Iheta naha wame'e sumange bö'ö andrö, fabaya hili-hili andrö, irasa harefa, ba i'obö geu ni'amoni'ö. 4 Ba iŵa'ö ba mado Yuda, Yehowa, Lowalangi ndra tuara la'olembai ba la'o'ö goroisa, awö gamakhoita. 5 Iheta hili-hili andrö, awö nadu luo, ba mbanua mado Yuda fefu, ba sahono gamatöröŵania, ba götönia. 6 Ba i'aro'ö mbanua mado Yuda ösa; me no sahono ira ba danö, ba me lö'ö manö sanuwö ya'ira, ba götö da'ö, me no ifaigi khöra wa'ahono Yehowa. 7 Andrö wa imane Asa ba mado Yuda: Datataru'ö mbanua andrö ba ta'ölini öli kara ba tafomalige ba tafobawa göli nilazi, me no fönada manö na danö, börö me lö niböhölida Yehowa, Lowalangi ndra tuada. No ya'ia ta'olembai, ba lö hadia ia khöda, fasui manö, ibe'e. Ba lalau, ba mofozu. 8 Ba no ato zabölö khö Asa, solohe baluse ba toho: mado Yuda, ba 300.000, ba mado Mbeniyami, ba 280.000, solohe baluse ba sogai fana — oi sabölö.

Lasuwö ia Dawa Gaitiofia, ba ya'ia zabölö

II. 9 Ba so moroi si tou Zera, Dawa Gaitiofia, möi manuwö ya'ira, 1.000.000 khönia zabölö ba 300 gureta, ba irugi Maresa. 10 Ba ifaondragö ia Asa, ba ndraso Zefata lafa'anö ira, ba ngai Maresa. 11 Ba i'angaröfi li Lowalanginia Yehowa Asa, mangandrö ia, imane: "He Yehowa, ha ya'ugö zangila manolo si tebai ba zabölö. Tologa, ya'ugö Yehowa, Lowalangima! Ya'ugö sa we'e-we'e dödö, ba no moroi ba döimö, wa no mafaondragö zato sibai andrö. He Yehowa, Lowalangima ndra'ugö; lö sangila molaŵa ya'ugö niha si mate andrö!" 12 Ba ibözi Ndrawa Gaitiofia Yehowa, föna Asa ba föna mado Yuda, ba moloi ira. 13 Ba lagohi ira Asa ba awönia sabölö andrö, irugi ba Gerara. Ba ato sibai zi mate Dawa Gaitiofia, lö fangorifi sa'ae; nirasa sa'ae ira khö Yehowa ba ba zabölö andrö khönia. Ba ebua sibai zahulu mado Yuda, 14 ba atu'a ira ba mbanua andrö fefu, si tefasui Gerara; noa sa ihawui fa'ata'u khö Yehowa mbanua andrö. Ba la'oloi'ö gana'a ba hadia ia na ba mbanua andrö fefu [mado Yuda], ebua sibai nisöndrara khöra. 15 Ba ose gurifö, ba lahawui ba oya sibai la'oloi'ö biri-biri ba ondra, ahuluara, ba lafuli ira ba Yeruzalema.

Famotokhi ba gahe

Fabaliŵa lala

Olayama Nga'ötö II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö