Wb/nia/Nga'ötö II/35

Lalau wasa

I. 1 Ba ilau wasa khö Yehowa Yosia, ba Yeruzalema, lataba wasa andrö ba zi meweleöfa, ba mbaŵa si föföna. 2 Ba ifataro gere andrö, ba halöŵöra, ba ifarou dödö ba halöŵöra ba gosali Yehowa. 3 Ba imane ba Nono Lewi andrö, samahaö Iraono Gizeraeli fefu, ba si no mu'amoni'ö khö Yehowa: Mibe'e ba gosali dawöla ni'amoni'ö, ba gosali nilau Zelomo, ono Dawido, razo Ndraono Gizeraeli. Böi sa'ae mi'osa'osa'ö. Mi'ae sa'ae enoni Lowalangimi Yehowa ba enoni mbanuania Iraono Gizeraeli. 4 Ba mifa'anö ami, ba ngafumi, ba ngenolimi, dali nifakhoi Dawido, razo Ndraono Gizeraeli, awö goroisa nononia Selomo. 5 Mi'agö ni'amoni'ö, dali ngenoli ngafu niwami andrö, sato, sange-sangenoli zawu-sawu Nono Lewi. 6 Ba mitaba wasa, ba mi'amoni, ba mi'asiwai ö ndra talifusömi, dali wolaumi goroisa Yehowa andrö, nifa'ema Moze. 7 Ba Yosia, ba ibe'e saoha gölönia ba zato nono mbiri-biri ba ono Nambi — oi sumange fasa ba zi so andrö, 30.000 fefu — ba 3000 nga'eu zaŵi, oi okhöta razo mege. 8 Ba satua mbanua andrö khönia, ba labe'e göi, saoha gölöra, ba zato ba ba gere ba ba Nono Lewi. Hilikia andrö ba Sakharia ba Yehieli, satua ba gosali Lowalangi, ba labe'e ba gere, sumange fasa, ba 2600 [nono mbiri-biri] ba 300 nga'eu zaŵi. 9 Ba Khanania ba Semaya ba Netane'eli, talifusönia, ba Hasabia ba Yeieli ba Yozabada, satua Nono Lewi, ba labe'e saoha gölöra ba Nono Lewi, sumange fasa, ba 5000 [nono mbiri-biri] ba 500 nga'eu zaŵi. 10 Ba no mube'e ba lala wame'e sumange andrö, ba la'agö nahara ere ba Ono Lewi, ba ngenolira, dali niŵa'ö razo. 11 Ba lataba wasa, ba latema ba dangara ndro ere ba latefe nitefe, ba Ono Lewi zamo'a uli [zumange]. 12 Ba la'oniagö nibe'e sumange nitunu, ba wame'e ba danga ngafu zato, ena'ö la'o'ö nifakhoi ba zura Moze, ba lamanö göi ba zaŵi andrö. 13 Ba latunu ba galitö wasa andrö, dali nifakhoi, ba ame'ela ni'amoni'ö andrö, ba larino ba mbalanga ba ba mbowoa ba ba mako ba lata'i-ta'i labe'e ba niha sato fefu. 14 Ba aefa da'ö, ba la'asiwai khöra, fabaya ö gere. Irugi bongi sa, ba lö aefa gere, ma'uwu Ga'aroni, ba wame'e sumange nitunu andrö, fabaya tawö andrö, andrö wa Ono Lewi zangasiwai göra ba ö gere, ma'uwu Ga'aroni. 15 Ba la'iagö nahara sanunö andrö, ma'uwu Gasafo, dali nifakhoi ndra Dawido, Asafo, Hemano ba Yedutuno sangi'ila andrö khö razo, ba si manö göi zanaro ba mbawandruhö fefu. Alakha lö laböhöi halöŵö, me no iwara andrö, Ono Lewi zangasiwai göra. 16 Ba tobali no mube'e ba lala wamosumange Yehowa andrö fefu, me luo da'ö lalau wasa andrö ba labe'e zumange nitunu ba naha wame'e sumange andrö khö Yehowa, dali nifakhoi razo Yosia. 17 Tobali lalau wasa Iraono Gizeraeli, si so andrö, me luo da'ö, fabaya owasa roti si lö mu'aisöni, fitu ngaluo wa'ara. 18 Ba lö murai mulau wasa si manö, i'otarai luo Zamueli sama'ele'ö, samösa lö razo Ndraono Gizeraeli mege, solau fasa, si mane nilau Yosia ba ere andrö ba Ono Lewi, awö mado Yuda, awö Ndraono Gizeraeli fefu, si so andrö, ba banua Yeruzalema. 19 Me no alua mewelewitu fakhe razo Yosia telau wasa andrö.

Isuwö Yosia Fara'o Nekho. Fa'amate Yosia

II. 20 Ba me aefa da'ö fefu — me no ifuli i'azökhi gosali Yosia — ba so moroi si tou Nekho, razo Miserayi, ba wanuwö ba Garikemi, ba mbewe Oifarati. Ba ifaondragö ia Yosia. 21 Ba ifatenge zinenge khönia Nekho, imane: Hadia horögu khöu, ya'ugö razo mado Yuda? Tenga ya'ugö usuwö iada'e, udugu usuwö, ba no ifangaösö ndra'o Lowalangi. Böi laŵa Lowalangi andrö, si oawögö ya'o, fa böi ifakiko ndra'ugö! 22 Ba lö iböhöli ia Yosia, noa sa ihonogöi sibai, ilau khönia. Andrö wa lö ifondrondrongo li Nekho andrö, niŵa'ö Lowalangi, ifaondragö, ba wolau ba ndraso andrö ba Megido. 23 Ba lafana razo Yosia si fafana. Ba imane razo khö genoninia: Mi'ohe misa ndra'o, noa sa mesokho ndra'o, sokho sebua! 24 Ba laheta ia ba gureta [zanuwö] enoninia, labe'e ba guretania si sambua, ba me no larugi Yeruzalema, ba mate ia, ba ba lewatö ndra amania lako'o ia. Ba la'e'esi Yosia mado Yuda ba banua Yeruzalema fefu.

Fange'esi Yosia

III. 25 Ba ilau ngenu-ngenu Yeremia ba khö Yosia andrö, ba dozi sanunö, he ira matua, ba he ira alawe, ba itörö lira Yosia ba ngenu-ngenura andrö, irugi ma'ökhö andre. Ba labali'ö huku ba Ndraono Gizeraeli da'ö, ba no mutanö ba zura, ba zura ngenu-ngenu andrö. 26 Ba bö'önia hikaya Yosia ba hadia nilaunia si sökhi, wolo'ö nifakhoi ba goroisa, 27 he hikayania famobörö mege, ba he safuria andrö, ba no mutanö ba zura razo Ndraono Gizeraeli ba ba zura razo mado Yuda.

Famotokhi ba gahe

Fabaliŵa lala

Olayama Nga'ötö II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö