Wb/nia/Nga'ötö II/31

Fangohori adu. Famataro ere ba Ono Lewi ba fanguma'ö balazora

I. 1 Ba me no awai da'ö fefu, ba lasaŵa mbanua mado Yuda Iraono Gizeraeli fefu, si so mege, ba larasa harefa andrö ba la'obö Gasera ba ladudugö hili-hili andrö, fabaya naha wame'e sumange ba mado Yuda fefu ba ba mado Mbeniyami ba ba mado Geferayi ba ba mado Manase, irege ahori fefu labe'e. Ba awena lafuli ira khöra Iraono Gizeraeli fefu, ba mbanuara. 2 Ba ifataro ngenoli gere andrö Hisikia, ba Ono Lewi, dali ngenolira andrö, balazi hadia halöŵö zamösana, halöŵö gere ba halöŵö Nono Lewi, ba wame'e sumange nitunu ba sumange fangorifi, ena'ö enoni ira ba golayama nahia Yehowa, ba ena'ö lalau wangandrö zaoha gölö ba fanuno. 3 Ba buala razo, ana'ania, ba böli zumange nitunu andrö, sumange nitunu na mahemolu mbanua, ba na tanö owi ba ba luo sabato ba ba wasulöna ba ba gowasa andrö, dali nifakhoi ba goroisa Yehowa andrö. 4 Ba ibe'e li razo ba zato, banua Yeruzalema, ba wame'e ba gere ba ba Nono Lewi tana khöra, fa böi laböhöli goroisa Yehowa. 5 Ba me no larongo niŵa'önia andrö Iraono Gizeraeli, ba labe'e zi a'a mbua nowi ba agu ba fanikha ba ŵe ŵani, si a'a mbua nowi fefu, oya sibai, sambua ni'ofulu hadia ia fefu la'ohe, ba no fahöna. 6 Ba Iraono Gizeraeli, awö mado Yuda, ba mbanua mado Yuda misa, ba sambua ni'ofulu göi la'ohe saŵi ba biri-biri, ba sambua ni'ofulu göi mbuala andrö ni'amoni'ö khö Lowalangira Yehowa; oi laföfö'ö wame'e tou. 7 Ba mbaŵa si tölu labörötaigö wangöhöna andrö, ba ba mbaŵa si fitu mo'ahonoa khöra.

Fame'e lala ba nibe'e saoha gölö

II. 8 Ba so Hisikia, awö zatua mbanua, lafaigi nihöna andrö, ba lasuno Yehowa ba banuania Iraono Gizeraeli. 9 Ba me isofu ba gere ba ba Nono Lewi lala nihöna andrö Hisikia, 10 ba imane khönia Asaria, ere sebua, ma'uwu Zadoki: I'otarai me labörötaigö molohe ba gosali Yehowa saoha gölö andrö, ba manga-manga ndra'aga, abusoga ba ebua na zi tosai; noa sa ifahowu'ö mbanuania Yehowa, ba tobali tosai na khöma zi fahöna andre. 11 Ba iŵa'ö Hisikia, lafo'oto'oto mbate'e ba gosali Yehowa; ba me no awai da'ö, 12 ba lahaogö wolohe ba da'ö mbuala andrö nibe'e saoha gölö ba si sambua ni'ofulu andrö, awö mbuala ni'amoni'ö. Ba samaigi-maigi, ba Ono Lewi andrö, Khanania, ba tambalinania nakhinia Sime'i. Ba nibe'e tohu-tohu danga ndra Khanania akhinia Sime'i, 13 ba Yehieli ba Azasia ba Mahata ba Azaheli ba Yerimoto ba Yosabada ba Elieli ba Yesimakhia ba Mahata ba Benaya, dali nifakhoi razo Hisikia awö Gasaria, satua ba gosali Yehowa. 14 Ba samaigi-maigi buala andrö, nibe'e saoha gölö khö Lowalangi, ba Ono Lewi andrö, Kore, ono Yimina, sanaro ba mbawandruhö, ena'ö tebe'e mbuala andrö, saoha gölö, tana khö Yehowa, awö game'ela andrö, ni'amoni'ö sibai. 15 Ba barö mbawania ndra Edena Miniyami ba Yesua ba Semaya ba Amaria ba Sekhania, ena'ö la'atulö'ö wame'e ba niwara ba mbanua gere andrö, ni'angenoligö, he ba zatua, ba he ba ndraono, lö lai ndra matua andrö, 16 si no mutanö ba zura nga'ötö, i'otarai zi medölu fakhe fa'ebua ba si a'a moroi andrö, dozi si möi-möi ba gosali Yehowa, na inötö zamösana, ba wangai halöŵöra, sangesangenoli, dali nifakhoi khöra. 17 Ba ba wananö ba zura nga'ötö andrö ere andrö, ba sawu-sawu latanö, ba ba Nono Lewi, ba i'otarai zi 20 fakhe, ba si a'a moroi andrö, dali halö-halöŵöra, ba ngenolira. 18 Ba fabaya onora sawuyu ba fo'omora ba onora matua ba onora alawe — khöra fefu — latanö; noa sa a'oi dödöra we'amoni'ö ya'ira, ba ni'amoni'ö andrö. 19 Ba so ba nga'ötö Ga'aroni, ere andrö, ba nowi ba mbenua andrö, si faböbö ba mbanuara andrö, niha — no mutötöi döira — same'e ba ndra matua, ere, fefu, ba ba Nono Lewi fefu, si no mutanö ba zura, tana khöra. 20 Si manö wolau Hisikia ba mado Yuda fefu; si sökhi ba satulö ba si duhu wamaigi Lowalanginia Yehowa ilau. 21 Fefu hadia ia nilaunia ba halöŵö andrö, ba gosali Yehowa ba ba goroisa andrö ba ba gamakhoita, ba wangalui Lowalanginia, ba no soroi ba dödö, ba mofozu göi.

Famotokhi ba gahe

Fabaliŵa lala

Olayama Nga'ötö II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö