Wb/nia/Moze V/6

Ifarou dödöra Moze ba wolo'ö oroisa si föföna andrö

1 Da'ö goroisa andrö, awö gamakhoita andrö, awö huku, ba nifahaögu ya'ami, dali niŵa'ö Lowalangimi, Yehowa, ena'ö mi'o'ö ba da'ö, ba danö andrö, ba zi möi ami, miyefo, 2 ba wangokhögö ya'ia, ena'ö ö'ata'ufi Lowalangiu, Yehowa, ba ena'ö ö'o'ö nifakhoinia andrö ba oroisania fefu, nifa'emagu khöu, ba ena'ö anau nosou. 3 Ba na no mirongo, ya'ami Iraono Gizeraeli, ba mitöngöni, ba wolo'ö ya'ia, ena'ö sohahau tödö ami, ba ena'ö ato sibai ami dania, si mane nifabu'u Lowalangi ndra tuami andrö, Yehowa, tanö si no falawu susu ba ŵe ŵani.

4 Mifondrondrongo, ya'ami Iraono Gizeraeli! Yehowa, ba no Lowalangida, ha Yehowa, ha ya'ia!. 5 Ba ö'omasi'ö Yehowa andrö, Lowalangiu, moroi si'aikö ba dödöu ba moroi si'aikö ba gera-erau fefu, ö'oigö wa'abölöu..

6 Taroma li andre, niŵa'ögu khöu ma'ökhö, ba ötanö ba dödöu. 7 Ba öfahaö göi ndraonou ba da'ö, itörö-törö liu, na yomo so'ö, ba he na ba wekoli; na möi'ö mörö ba na maoso'ö.. 8 Öböbögö ba dete dangau, tandra, ba ba mbörö nikhumö, amaedola mbala högö; 9 ba ösura ba gehomo nomou, ba ba lagö mbawa göli khöu.

10 Ba na i'ohe dania ndra'ugö Lowalangiu, Yehowa, ba danö andrö, nibe'enia khöu dania, dali wahölusania mege khö ndra tuau Aberahamo, Iza'aki, Yakobo, tanö si so banua sebua ba si sökhi, si tenga nitaru'ömö, 11 ba omo si no mo'ösi gama-gama si sökhi, tenga moroi khöu, ba ba'a nikhao ba gara, si tenga nikhaomö, ba kabu nagu ba kabu falo, si tenga nitanöu; ba na manga ndra'ugö na abuso'ö, ba faigi sibai, 12 fa böi olifu'ö Yehowa, si no mangeheta ya'ugö ba danö Miserayi, ba danö si no möi sawuyu ndra'ugö.

13 Lowalangiu andrö, Yehowa, ba ö'ata'ufi ba öfosumange ba ba döinia möi'ö ba hölu, 14 ba lö tola mi'o'ö Lowalangi bö'ö, Lowalangi niha andrö, si tefasui ya'ami. 15 Me no Lowalangi solohu Lowalangimö andrö, Yehowa, ba khömi, fa böi mofönu khöu Lowalangimö, Yehowa, ba fa böi ise'e ndra'ugö ba guli danö! 16 Böi mitandraigö Lowalangimi, Yehowa, si mane fanandraigömi ya'ia no, ba Masa..

17 Oroisa Lowalangimi Yehowa andrö, ba mi'o'ö, lala andrö ba amakhoita nibe'enia khömi, ba mitörö; 18 hadia zatulö ba hadia zi sökhi, wamaigi Yehowa, da'ö ötörö, ena'ö sohahau tödö ndra'ugö, ba ena'ö örugi danö si sökhi andrö, nifabu'u Yehowa khö ndra tuau, fahölusa, ba ena'ö ö'okhögö, 19 wanimba fönau si fa'udu khöu andrö, fefu, dali nifabu'u Yehowa.

He lawisa wamahaö iraonora ba da'ö

II 20 Na isofu dania khöu onou, na imane: Hadia niŵa'ö andrö ba amakhoita andrö ba huku andrö, nioroi'ö Lowalangida, Yehowa?, 21 ba ömane khö nonou andrö: No sawuyu Wara'o ndra'aga mege, ba danö Miserayi, ba no ihetaga ba danö Miserayi Yehowa, tangania andrö, si no abe'e. 22 No ilau dandra ba ila-ila sebua ba famakiko Yehowa, ba danö Miserayi, khö Wara'o ba ba zoroiyomonia fefu, ba zanehe ndra'aga; 23 ba ya'aga, ba no iheta ba da'ö, ba wolohe ya'aga ba danö andrö ba ba wame'e khöda tanö andrö, nifabu'unia khö ndra tuada, fahölusa.

24 Ba no iŵa'ö khöma Yehowa wolo'ö nifakhoi andrö fefu, wangata'ufi Lowalangida, Yehowa, ena'ö lö tebulö wa sohahau tödö ita, ba ena'ö i'oriorifi ita, si mane ma'ökhö. 25 Ba niha satulö ita, na lö olifu ita wolo'ö oroisa andrö fefu, föna Lowalangida Yehowa, si mane niŵa'önia khöda.

Famotokhi ba gahe

Fabaliŵa lala

Olayama Moze V: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö