Wb/nia/Moze V/21
Sumange fanala'ö wamunu niha na lö musöndra zamunu[edit | edit source]
I. 1 Na lasöndra nibunu ba mbenua, ba danö andrö, nibe'e Lowalangiu, Yehowa, khöu, ba na lö mu'ila, ha niha zamunu ya'ia, 2 ba ndramöi zatua khömi ba sanguhuku ba lasu'a wa'aröu mbanua, si tefasui nibunu andrö.
3 Ba na no musöndra, he mbanua sahatö khönia, ba ndramuhalö zihene zaŵi satua mbanua andrö, ono zaŵi si lö murai mufohalöŵö, si lö mufokalo mbagi na; 4 ba la'ohe mitou ba ndraso nono zaŵi andrö salaŵa mbanua andrö, ba ndraso si so idanö si lö ogo'ö, daso si lö muhalö-halö ba si lö mutaru fakhe, ba ba da'ö ba ndraso andrö, lafatö mbagi nono zaŵi andrö.
5 Ba ndramu'ondrasi ere andrö, ono Lewi — me no ya'ira nitutuyu Lowalangiu, Yehowa, ena'ö enoninia ira ba ena'ö ba döi Yehowa mamahowu ira, ba balazi niŵa'öra ba wanguhuku hadia ia wamadöni ba hadia zokho[1] — 6 ba dozi salaŵa mbanua andrö, sabölö ahatö ba nibunu no mege, ba lasasai dangara yaŵa nono zaŵi andrö, nifatö bagi, ba da'ö ba ndraso, ba latema lamane: 7 Tenga tangama zame'e aduwa ndro andrö, ba höröma, ba tenga sangila. 8 Be'e aefa, ya'ugö Yehowa, ba mbanuau Iraono Gizeraeli, ni'orifimö, ba böi be'e ba hulu mbanuamö Iraono Gizeraeli ndro niduwagö, si lö horö! Ba aefa khöra horö fange'e andrö, 9 ba öhori ba khömi ndro andrö niduwagö, si lö horö, ena'ö ohahau dödöu, na ölau zatulö, wamaigi Yehowa.
He lawisa na la'owalu zawuyu ba he lawisa ba zi a'a ndraono[edit | edit source]
II. 10 Na möi'ö fasuwö ba nemaliu ba na ibe'e ba dangau ira Lowalangiu, Yehowa, na mi'oloi'ö niha ösa, 11 ba na ö'ila ba ni'oloi'ö andrö ndra alawe si sökhi bawa, ba na tesao khöu wa'omasi, na omasi'ö öhalö dongau, 12 ba ohe ia baomou, ena'ö ifatöwö'ö ia, ba itaba za'ania, 13 ba ifalalini nukhania, nukhania mege, me lara'u ia, ba yaso yomo khöu, ba yamu'e'esi namania ba inania, sara waŵa wa'ara, ba na aefa da'ö, ba hana na möi'ö khönia, hana na öhalö ia, fa dongau ia.
14 Ba na lö'ö sa'ae omasi'ö ia, ba öbe'e aefa manö, ma'ifu lö tola ö'amawa ia, böli gana'a, lö tola ö'osawuyu ia, me no orudu'ö khönia.
15 Na so zi dombua donga ba na abölö i'omasi'ö zi sambua, na i'ositengagö zi sambua, ba na faoma mo'ono khönia, ono matua, he ni'omasi'ö andrö, ba he ni'ositengagö, ba na ono ni'ositengagö andrö zi a'a ndraononia,[2] 16 ba na ifaosa dania ba ndraononia gana'ania, ondröitania, ba lö tola itehe khö nono ni'omasi'ö andrö zinehe ba zi a'a, wangambösi ono ni'ositengagö andrö: me no ya'ia zi a'a, 17 si ndruhu si a'a, ono ni'ositengagö andrö, ba ibe'e si a'a, ifo dua winaeta zinemania ba zi so khönia, fefu, me no si a'a nisöndrania ba wa'abölönia, khönia zinehe ba zi a'a.
Fotu ndraono si lö molo'ö li zatua. Fogo'o nitaŵi[edit | edit source]
III. 18 Na so zi so ono matua si lö ngaroro ba si lö mamondrongo li, si lö mame'e ba dödö na ifarou ia ba zi zökhi amania, ba ma inania, ba si lö molo'ö na göi, na no aefa la'otu'ö ia, 19 ba ndramutuyu da'ionia ira amania ba ndramudöni ba zalaŵa mbanuara, baero mbawa göli mbanua khöra, 20 ba lamane ba zalaŵa mbanuara: Onoma andre, ba no si lö ngaroro ba sabe'e tandro, lö ifondrondrongo lima, no sanibo-nibo ana'a ba si mabu-mabu tuo!
21 Ba ndramutebu kara ia banuara fefu, wamunu ya'ia; öhori ba khömi zi lö sökhi andrö, ba ndramurongo Iraono Gizeraeli fefu ba ndramu'ata'ufi.
22 Na so nibunu, si no mamazökhi horö börö wamunu ya'ia, na no mutaŵi ia ba ndraha geu, 23 ba böi laröi ba ndraha geu mbotonia ba zi bongi; na luo da'ö öko'o ia, me no ni'elifi khö Lowalangi nitaŵi, ba böi be'e ra'iö danömi andrö, nibe'e Lowalangiu, Yehowa, khöu. [3]
Famotokhi ba gahe[edit | edit source]
Fabaliŵa lala[edit source]
Olayama Moze V: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö