Wb/nia/Moze V/14

Fanenaŵa fange'esi faya-faya andrö

1 Ono Lowalangimi, Yehowa, ami; ba böi mikhoi nösimi, na so zi mate ba böi mitöwö mbumi yaŵa gangango. 2 No soi ni'amoni'ö khö Lowalangiu, Yehowa, ndra'ugö, ba no ya'ugö nituyu Yehowa ba niha bö'ö fefu ba guli danö, ena'ö khönia ndra'ugö, soi tana khönia.

Famasugi si lö tola la'a

3 Böi a hadia ia zogoro ita! 4 Da'ö zaliŵa-liŵa ba danö si tola mi'a: 5 Saŵi ba biri-biri ba nambi, ba böhö ba nago ba öröbao ba felandru ba bate ba selandra ba böhö dandri.

6 Fefu zi öfa ahe ba si no fabali sa'a si dombua ba samomendrua fonganga göra, ba zi öfa ahe andrö, ba tola mi'a.

7 Ba ba zamomendrua fonganga göra ba ba zi no alua fabali sa'a, ba da'ö zi lö tola mi'a: Ondra ba kawelu ba kelindri; lafomendrua sa wonganga göra ba tenga si no fabali sa'a — si ra'iö ira miŵa'ö; 8 ba bawi; noa sa si fabali sa'a ia, ba tenga samomendrua fonganga gönia — si ra'iö ia miŵa'ö. He ösinia ba he amatelania, ba lö tola mibabaya.

9 Ba da'ö zi tola mi'a saliŵa-liŵa ba nidanö, fefu: Fefu zi so fere-fere ba huna-huna, ba tola mi'a: 10 ba ba zi lö ferfere ba si lö hunhuna, ba sambua lö'ö si tola mi'a; si ra'iö ira miŵa'ö.

11 Fefu wofo, si tenga si ra'iö, ba tola mi'a; 12 ba da'ö zi lö tola mi'a: Moyo ba hela ba razö wali, 13 ba sayowa ba ala-ala ba fefu motöi hela nasi, 14 ba fefu motöi gaga, 15 ba fofo ondra ba katawaena ba samari ba fefu motöi fötö. 16 Ba tugöu ba lamuhu ba meu, 17 ba engangi ba bangau ba belibi, 18 ba laki-laki ba fefu motöi kotoli ba meragai ba bögi.

19 Fefu ngawalö zaliŵa-liŵa ba danö so'afi, ba salakha miŵa'ö; tö töla te'a. 20 Fefu wofo, si tenga si ra'iö, ba tola mi'a.

21 Hadia ia gamatela, ba lö tola mi'a; ba niha bö'ö, si fatewu ba mbanuami ba hana na öbe'e, önia, ba he na öbe'e önia, ba he na ö'amawa ba niha bö'ö, ba hana; me no soi ni'amoni'ö khö Lowalangiu, Yehowa, ndra'ugö. Ono mbiri-biri, ba böi rino ba nösi zusu ninania

Famoguna'ö si sambua ni'ofulu andrö

22 Ba mbua zinanöu ba danö fefu, ba öhalö zambua ni'ofulu, ero röfi, 23 ba föna Lowalangiu, Yehowa, ba naha andrö, nituyunia, ba wamonahia töinia ba da'ö, ö'a zi sambua ni'ofulu andrö, bua nowi khöu ba agu ba fanikha khöu ba si a'a nono zaŵi ba si a'a nono mbiri-biri khöu, ba wamamaha ya'ugö ba wangata'ufi Lowalangiu, Yehowa, götö wa'anau nosou.

24 Ba na abölö aröu öŵa'ö, na tebai ö'ohe ba da'ö, me no aröu naha andrö, nituyu Lowalangiu, Yehowa, nahia döinia, ba na no ifahowu'ö ndra'ugö Lowalangiu, Yehowa, 25 ba be'e böli gana'a, ba ohe gana'a andrö, böi taya, ba ae ba naha andrö, nituyu Lowalangiu, Yehowa, 26 ba öli hadia ia zomasi'ö — ana'a andrö be'e böli — saŵi ba biri-biri ba agu ba hadia nibadu na, sabe'e, ba hadia ia fefu zomasi'ö, ba manga'ö ba da'ö föna Lowalangiu, Yehowa, ba ya'omuso dödöu, awö zoroiyomou fefu.

27 Ba böi olifugö'ö ba da'ö nono Lewi, si so ba khömi, me lö khönia tanö, lö tana khönia, ba ngaimö. 28 Ba na no irugi medölu fakhe, ba ö owuloi zi sambua ni'ofulu nisöndrau ba ndröfi da'ö, fefu, öbe'e tou ba nahiamö, 29 ena'ö möi nono Lewi andrö, si lö tanö, si lö tana khöra, ba ngaimö, awö niha bö'ö andrö, ba si lö ama, si lö ina, awö lakha mbanua, si so ba khömi, ba ena'ö la'abusoi'ö ira, ena'ö ifahowu'ö ndra'ugö Lowalangiu, Yehowa, ba nilaumö andrö fefu, halö-halöŵö dangau andrö.

Famotokhi ba gahe

Fabaliŵa lala

Olayama Moze V: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö