Wb/nia/Moze V/17
Böi labe'e sumange zi so sala.[edit | edit source]
I. 1 Böi be'e sumange Lowalangiu, Yehowa, zaŵi ba ma biri-biri, si so sala, hadia ia zi lö sökhi, me no sogoro Lowalangiu, Yehowa, da'ö.[1]
2 Na falukha ba mbanuami andrö heza, nibe'e Lowalangiu, Yehowa, khöu, niha, he ira matua, ba he ira alawe, solau si lö omasi Lowalangiu, Yehowa, wanawö fawu'usa li andrö khönia,[2] 3 na möi ia mamosumange Lowalangi bö'ö ba na mangalulu khöra, ba ba luo ba ma ba mbaŵa ba ma ba ngahönö andrö fefu, ba mbanua si yaŵa, si tenga nitehegu,[3] 4 ba na te'ombakha'ö khöu, ba na tesöndra — na no musekhegö — si ndruhu, no mulau zi manö — sogoro ita — ba Ndraono Gizeraeli, 5 ba ö'ohe baero mbawa göli niha andrö, he ira matua, ba he ira alawe; solau si lö sökhi andrö, ba he ira matua, ba he ira alawe, ba ötebu kara, wamunu ya'ia.
6 Ba niŵa'ö zi darua, ba ma si datölu, si so ba mbörö, tebunu zi manö, na no mu'etu'ö huku, ba lö tola labunu ia, na ha samösa zi so ba mbörö.[4]. 7 Si so ba mbörö andrö zi börötaigö mamunu ya'ia, ba awena dania zato fefu, ba tobali öhori ba khömi zi lö sökhi andrö.
Ba naha ni'amoni'ö andrö setu huku, na so huhuo sebua.[edit | edit source]
II. 8 Na so huhuo sabölö afökhö famatunö öŵa'ö, ma na fange'e mbörö ba ma famadöni hadia ia, ba ma fabagosa, huhuo ba mbanuami, ba fazaŵa'ö ba ae ba naha andrö nituyu Lowalangiu, Yehowa, 9 dania, ba ötunö khö gere, ono Lewi ba ba zanguhuku andrö, si so na luo da'ö, ösofu lala, ba ya'ira zangombakha khöu he wisa huku.
10 Ba ö'o'ö niŵa'öra, ni'ombakha'öra khöu ba naha andrö nituyu Yehowa; fefu nilaumö dania, ba dali sibai lala andrö, ni'ombakha'öra khöu. 11 Lala andrö, ni'ombakha'öra khöu, ba huku andrö, ni'etu'öra öbe'e dali ba wolaumö, niŵa'öra andrö khöu, ba ötörö, böi hole'ö ndra'ugö, he ba gambölö, ba he gabera.
12 Ba na so zi fayaŵa, si lö mamondrongo li gere andrö, si no so ba da'ö, enoni Lowalangiu, Yehowa, ba he li zangukuku andrö, ba si mate da'ö; öhori zi lö sökhi ba Ndraono Gizeraeli, 13 ena'ö larongo sato fefu ba ena'ö ata'u ira, fa böi falukha zi fayaŵa.
Oroisa ba wamataro razo.[edit | edit source]
III. 14 Na no örugi danö andrö, nibe'e Lowalangiu, Yehowa, khöu, na no ö'okhögö ba na no ahono ndra'ugö ba danö, ba na ömane dania: Da'ufataro khögu razo, högögu, si mane ba niha baero fefu, si tefasui ya'o,[5] 15 ba ha nituyu Lowalangiu, Yehowa, öfataro razo khöu. Iwami öfataro razo khöu; niha bö'ö, si tenga ya'ami, ba lö tola öfataro khöu.
16 Ba fa böi soya kudo ia ba böi yamu'ohe mangawuli ami ba danö Miserayi, ba wangoya'ö kudonia, me noa sa'ae iŵa'ö khömi Yehowa: Böi manö mifuli ami ba da'ö![6] 17 Ba böi yamu'oya'ö ndrongania, fa böi i'erogö [Yehowa], ba böi yamuhöna khönia wirö ba ana'a.[7]
18 Ba na no dumadao dania ia ba dadaoma razo, ba yamusura khönia zambua zura goroisa andre, khö gere ono Lewi andrö ihalö; 19 ba böi aefa-aefa khönia, ba ibaso-baso sagötö ya'ia, ena'ö ifamaha ia ba wangata'ufi Lowalanginia, Yehowa, ba ena'ö itöngöni daroma li goroisa andre, awö nifakhoi andrö, fefu, ba wolo'ö ya'ia,[8] 20 fa böi fayaŵa ia ba niwania andrö, ba böi zi lö itörö goroisa andrö, böi yamuhole'ö ia, he ba gambölö, ba he ba gabera, ena'ö ara razo ia ba Ndraono Gizeraeli, he ya'ia, ba he ononia dania.
Famotokhi ba gahe[edit | edit source]
Fabaliŵa lala[edit source]
Olayama Moze V: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö