Wb/nia/Moze V/28

Famabu'u howu-howu ba zolo'ö

I. 1 Na lö tebulö dania wamondrongou li Lowalangiu, Yehowa, ba na ötöngöni sibai goroisania fefu, nifa'emagu khöu ma'ökhö, ba wolo'ö ya'ia, ba alaŵa yaŵa niha bö'ö ba guli danö fefu ndra'ugö ibe'e Lowalangiu, Yehowa, 2 ba möi khöu howu-howu andrö fefu, alua khöu, na ö'o'ö li Lowalangiu, Yehowa.

3 Nifahowu'ö ndra'ugö yomo ba mbanua, ba nifahowu'ö baero ba danö. 4 Nifahowu'ö dabinamö ba bua danö khöu, ba beto guriföu ba ono zaŵiu ba fo'ono mbiri-biriu. 5 Nifahowu'ö ndragamö, awö naha wamaruka roti khöu. 6 Nifahowu'ö ndra'ugö na so'ö, ba nifahowu'ö na mofanö'ö.

7 Yehowa zamözi tou fönau emaliu, si maoso udumö; ha sara lalara, na so ira, ba wanuwö ya'ugö, ba fitu rozi lalara, na moloi ira, öbe'e.

8 Yamufao khöu howu-howu Yehowa, ba halasamö ba ba nilau dangau fefu, yamufahowu'ö ndra'ugö ba danö andrö, nibe'e Lowalangiu, Yehowa, khöu!

9 Yamubali'ö soi ni'amoni'ö ndra'ugö khönia Yehowa, si mane niŵa'onia khöu, si no möi ba hölu ia, na ö'o'ö goroisa Lowalangiu, Yehowa, ba na ötörö lala andrö khönia, 10 ena'ö la'ila niha baero, ba guli danö fefu wa no dali döi Yehowa mege, ba wamatörö töimö, ba ena'ö la'ata'ufi ndra'ugö!

11 Ba fahöna dania khöu zi sökhi, ibe'e Yehowa, he ono khöu ba he ono guriföu, ba he bua danö khöu, ba danö andrö, nifabu'u Yehowa fame'e khöu khö ndra tuau, si no möi ba hölu ia.

12 Ibokai khöu Yehowa naha girö-girö andrö khönia, si no fahöna, banua si yaŵa andrö, ba wame'e teu ba danöu, na inötö, ba ba wamahowu'ö halöŵö dangau fefu, tobali ato niha nibe'eu nifalali, ba ya'ugö, ba alakha lö'ö manö mamalali'ö hadia ia.

13 Ba ibe'e högö ndra'ugö Yehowa ba tenga i'o, ba itugu manöi ndra'ugö, ba lö'ö manö toulö ndra'ugö, na ö'o'ö goroisa Lowalangiu, Yehowa, andrö, nifa'emagu khöu ma'ökhö, na ötöngöni ba na ö'o'ö, 14 na ötörö fefu niŵa'ögu khöu ma'ökhö, na lö öhole'ö ndra'ugö, he ba gambölö, ba he ba gabera, ba wolo'ö ba Lowalangi bö'ö ba ba wamosumange da'ö.

Fangelifi ba zi lö molo'ö

II. 15 Ba na lö ö'o'ö niŵa'ö Lowalangiu, Yehowa, niŵa'önia khöu, ba wolo'ö sibai oroisa andrö, awö nifakhoi andrö fefu, nifa'emagu khöu ma'ökhö, ba tohare khöu wangelifi andrö fefu, alua khöu dania.

16 Ni'elifi ndra'ugö yomo ba mbanua ba ni'elifi baero ba danö. 17 Ni'elifi ndragamö ba ni'elifi naha wamaruka roti khöu. 18 Ni'elifi dabinamö ba bua danö khöu ba ono zaŵiu ba fo'ono mbiri-biriu. 19 Ni'elifi ndra'ugö na so'ö, ba ni'elifi na mofanö'ö.

20 Ifatörö khöu Yehowa wangelifi andrö ba fa'atobali dödö ba fa lö howu-howu ba halöŵöu fefu, nihalö dangau, irege tehori ndra'ugö, si lö arara, irege tekiko ndra'ugö, börö walösökhi wolaumö andrö, wa no ö'erogö ndra'odo.

21 I'olembai dania ndra'ugö fökhö waba, ibe'e Yehowa, irege ahori ndra'ugö ibe'e, ba danö andrö, ba zi möi'ö, ba wangokhögö ya'ia. 22 Ibözi'ö fökhö baösi Yehowa, ba fogikhi ba faosa ba fa'aukhu ba fa'oköliköli [danö] ba fa'akhozi lai wakhe ba fa'ahohomö; da'ö zi lö aefa-aefa khöu, irege no tekiko ndra'ugö.

23 Töla dania mbanua si yaŵa, yaŵau, ba si'öli danö barö gaheu.

24 Ibali'ö gawu-gawu ba ene deu ba danöu Yehowa, da'ö dania zatoru khöu moroi yaŵa, irege no tekiko ndra'ugö.

25 Tegaölö tou ndra'ugö föna nemaliu ibe'e Yehowa; ha sara lalamö, na awena möi'ö fasuwö khöra, ba fitu rozi lala, na moloi'ö labe'e, ba tobali dozi niha bö'ö ba guli danö ba muhokha mbu wamaigi ya'ugö.

26 Ba ö wofo ba dalu mbanua fefu ba ö gutu ndru'u dania mboto zi mate khöu, lö sanaboi ya'ira.

27 Ibözi dania ndra'ugö Yehowa faosa Ndrawa Miserayi ba faosa sembili ba gigimö ba böni, si lö famadöhö. 28 Ibözi'ö Yehowa fa'owöhö ba fa'au'a ba fa'afawuka dödö.

29 Öbaya-bayaisi manö hadia ia ba zi laluo, si mane na ibayaisi niha sau'a ba zogömi-gömi andrö, ba si lö fozu nilau-laumö andrö; fadoro manö nifakao ndra'ugö ba ni'anagöi, ba lö sanolo ya'ugö.

30 Öfohu khöu ndra alawe, ba niha bö'ö zi horöni ya'ia; ö'otomosi nomo, ba lö ö'onahia; öfazökhi kabu nagu, ba lö'ö sa ö'a mbuania.

31 Ba zanehe ndra'ugö tetaba zaŵiu ba ma'ifu lö'ö labe'e öu; terabu galideu, ni'ila höröu, ba lö'ö sa'ae mangawuli khöu; ba danga nemaliu möi mbiri-biriu, ba lö sanolo ya'ugö.

32 Onou matua ba onou alawe, ba tebe'e ba danga niha bö'ö [sawuyu], i'ila höröu, ba mo'ala, ba wehulu dödöu khöra, ma'ö-ma'ökhö, ba tebai ölau hadia ia.

33 Bua danö khöu ba hadia ia gölöu fefu, si no erege dödöu, ba soi si lö örai mila zi manga, ba fadoro manö nifakao ndra'ugö ba nihundragö, 34 ba owöhö ndra'ugö, ba wamaigi-maigi ni'ila höröu andrö.

35 Ibözi ndra'ugö gigimö sanandraŵa, si lö dalu-dalu ba mbalöduhiu ba ba waha, ba i'otarai narö kahe, numalö ba galizuzu.

36 Ya'ugö ba razo andrö, nifataromö khöu, ba i'ohe ba niha bö'ö Yehowa, ba niha si lö mirai mila, ya'ugö ba ira tuau mege; Lowalangi bö'ö nifosumangeu ba da'ö dania, balö geu ba kara.

37 Börö wa'atobali dödö dania ndra'ugö ba börö wango'aya ba börö wangehera, ba niha andrö fefu, ba ni'ohe Yehowa ya'ugö.

38 Oya öbe'e ba danö tanömö zinanö, ba lö oya-oya öbasi bua, tamo sa'ae zi manga ya'ia.. 39 Öfazökhi kabu nagu ba öhaogö-haogö, ba lö dania öu, ösi nagu nibadu, ba lö nibe'e ba naha; era sa'ae zi manga döla. 40 Öfatutu wananö ono zai ba mbenuau, ba lö fanikha dania, ba wamayoiniu ya'ugö, me sadoru-doru mbua zai.

41 Mo'ono ndra'ugö, ono matua ba ono alawe, ba tenga onou dania, me ni'oloi'ö dania ira.

42 Fefu geu sowua khöu ba sinanöu ba danö, ba gola faruwu zi okhögö.

43 Niha bö'ö, si fatewu khöu, ba itugu ebua manö moroi khöu, ba ya'ugö ba sahöndrö-höndrö; 44 ya'ia zame'e-me'e nifalali khöu, ba ya'ugö, ba tenga same'e nifalali khönia hadia ia; ya'ia dania högö ba ya'ugö, ba i'o.

45 Fangelifi andrö fefu zanörö ya'ugö dania, lö aefa-aefa khöu ba alua ba khöu, balazi no ahori ndra'ugö, me no lö nifondrondrongou li Lowalangiu, Yehowa ba me lö ni'o'ömö oroisania ba amakhoita andrö, nifakhoinia khöu; 46 ba tandra dania ia ba ila-ila, ba khöu ba ba madoumö dania, götö-götö wa'ara.

47 Me no lö nifosumangeu Lowalangiu, Yehowa, saoha gölö ba soroi ba dödö, me no fahöna khöu fefu hadia ia, 48 ba möi'ö sawuyu nemaliu, nifatörö Yehowa khöu, göna'ö fa'olofo ba fa'owökhi dödö ba fa lö nukha ba fa'ambö manö hadia ia fefu, ba ibe'e ba mbagiu galo mbagi si'öli, irege no ihori ndra'ugö.

49 Ikaoni udumö niha, moroi ba zaröu, moroi ba wondrege danö, Yehowa, hulö na itörö moyo, na so moroi sa, niha si lö ö'ila li, 50 niha sabe'e hörö, si lö ba dödö si no tohare huwa, ba si lö fa'ahakhö dödö ono matua.

51 La'a nono guriföu ba bua danö khöu, irege no ahori ndra'ugö; lö lasaigö khöu, he fakhe ba he ŵe nagu ba he fanikha, he ono zaŵiu ba he ono mbiri-biriu, balazi no lafakiko ami.

52 Lafa'u'u ami ba mbanuami fefu, irege no adudu göli kara andrö khömi, si no alaŵa ba si no aro, nidöna-dönami, ba danömi misa fefu; lafasui ami ba mbanuami fefu, ba danömi misa, ba danö nibe'e Lowalangiu, Yehowa, khöu.

53 Ba ba wa'abu dödö andrö ba ba wa'atosasa, ba nemali andrö, ba ö'a ndraonou, ösi nonou matua ba ösi nonou alawe, nibe'e Lowalangiu, Yehowa, khöu.

54 Ba he sabölö ombuyu mege ba si hulö nono omasiö ba khömi, ba safökhö tödö dania khö dalifusönia ba ba ndra alawe andrö, nitalaguinia ba ba ndraono andrö, si tosai na khönia.

55 Khöra fefu, ba lö ibe'e wöfö nösi nononia andrö ni'ania, me lö hadia ia zi tosai khönia, ba wa'abu dödö andrö ba ba wa'atosasa, ba nemali andrö, ba mbanuami fefu.

56 Ira alawe sabölö ombuyutö ba sabölö mangeha-ngehao khönia fefu hadia ia ba khömi, si lö irai manandraigö manguhundragö tanö, ba wa'ombuyu-mbuyu ba ba wangeha-ngehao, ba afökhö dödönia ba ndra matuania, nitalaguinia ba ba nononia matua ba ba nononia alawe, 57 i'afökhöi tödö khöra nawö nono andrö, si otarai dalunia ba ono andrö, ni'adonogönia, i'a sa'ae, nibini'ö, me lö hadia ia khönia, ba wa'abu dödö andrö ba ba wa'atosasa, ba nemali andrö, ba mbanuami fefu.

58 Na lö ötöngöni daroma li oroisa andrö fefu, nitanö ba zura andre, ba wolo'ö ya'ia, wangata'ufi Lowalangiu, Yehowa, töi andrö, sebua lakhömi ba sata'u ita. 59 Ba ifatörö khöu ba ba madoumö dania wamakao si tenga inötö Yehowa, famakao sabölö-bölö ba sara, ba fökhö sabe'e sibai ba sara göi. 60 Ba ifuli ifatörö khöu wökhö Ndrawa Miserayi andrö fefu, si hokha mbumö i'olembai ndra'ugö. 61 Ba ifatörö na göi khöu Yehowa ngawalö wökhö ba famakao, si lö ba zura goroisa andre, irege no tetiko ndra'ugö.

62 Fa'oya ndröfi ba mbanua si yaŵa ami mena'ö, ba ha fasamösa dania zi tosai ya'ami, me no lö nifondrondrongou li Lowalangiu, Yehowa.

63 Ba si mane fa'omuso dödö Yehowa mege wame'e fa'ohahau dödö khömi, awö wangoya'ö ya'ami, si manö wa'omuso dödö Yehowa dania wamakiko ya'ami, awö wangohori ya'ami, tobali tetimba ami ba danö andrö, ba zi möi ami iada'e, ba wangokhögö ya'ia.

64 Ifazawili dania ndra'ugö ba niha baero fefu, i'otarai wondrege danö, numalö ba wondrege tanö sa; ba öfosumange dania Lowalangi bö'ö, ba da'ö, si lö mirai mila mege, ya'ugö ba ira tuau mege, balö geu ba kara. 65 Ba si lö ahono ndra'ugö ba niha andrö dania, ba lö naha solombase gaheu; tödö sanizi-nizi ibe'e khöu ba da'ö Yehowa, awö hörö sariri ba fa'abu dödö. 66 Nosou, ba hulö zanaŵa-naŵa fönau wamaigiu; lö bongi lö ma'ökhö, ba manizi-nizi ndra'ugö ba lö ödöna-döna auri'ö, öŵa'ö. 67 Ba zanguhulö wongi, ba ömane: Ena'ö na bongi! ba na bongi, ba ömane: Ena'ö na ifuli moluo! börö wa'abu dödöu andrö ba famaigiu hadia ni'ila höröu andrö. 68 Ifuli ifoloyo ndra'ugö ba danö Miserayi Yehowa; ifatörö ba lala andrö, niŵa'ögu khöu no: Lö'ö sa'ae i'ila ia höröu, ba ba da'ö te'oro'ö dania ami sawuyu, ira matua ba ira alawe, ba nemalimi, ba lö sedöna mowöli ya'ami.

69 Da'ö daroma li ba wawu'usa li andrö, me fawu'u li Moze ba Ndraono Gizeraeli, ba danö Ndraono Moabi, niŵa'ö Yehowa khönia, lö lai wawu'usa li andrö, me fawu'u li ia khöra ba gahe hili Horebi.

Famotokhi ba gahe

Fabaliŵa lala

Olayama Moze V: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö