Wb/nia/Moze V/15
Döfi wangefa andrö ba he lawisa ba zi numana[edit | edit source]
I. 1 Ba na no irugi mewitu fakhe, ba milau ndröfi wangefa.[1] 2 Ba mimane ba wangefa andrö: Dozi sosugilö, ba böi sa'ae lasugi nibe'era nifalali khö nawöra; böi lasasagö nawöra iwara, me no mufarongogö wangefa andrö khö Yehowa. 3 Niha bö'ö, ba hana na ösasagö, ba sugilöu ba niwami, ba ölulu.
4 Ba lö'ö sa si numana ba khömi dania; ifahowu'ö sibai sa'ae ndra'ugö dania Yehowa, ba danö andrö, nibe'e Lowalangiu, Yehowa, khöu, tana khöu ba tana ba madoumö dania, ena'ö ö'okhögö, 5 asala öfondrondrongo sibai li Lowalangiu, Yehowa, wanöngöni oroisa andrö fefu, nifa'emagu khöu ma'ökhö, ba wolo'ö ya'ia.
6 No'a sa ibe'e khöu howu-howu andrö Lowalangiu, Yehowa, si mane nifabu'unia khöu, tobali oya soi nibe'eu nifalali; ba ya'ugö, ba alakha lö öfalali gana'a, ba oya soi dania zi so barö mbawau; ba lö'ö sa si möi ndra'ugö barö mbawa.[2]
7 Na so ba khömi zi numana, iwami, ha niha, ba mbanuami, heza, ba danömi andrö, nibe'e Lowalangimi, Yehowa, khömi, ba böi zi lö ahakhö dödöu, ba böi gokhöi dangau ba niwami andrö, si numana,[3] 8 öbokai dangau khönia, ba ya aoha gölöu wame'e nifalali khönia, ha wa'ebua zoguna khönia, ba wa'ambö andrö khönia, si no göna ia.
9 Ba angelama, fa böi tumbu ba dödöu gera-era si lö sökhi, fa böi ömane dödöu: No ahatö ndröfi si fitu andrö, döfi wangefa! ba fa böi afökhö dödöu wamaigiu iwami andrö, si numana, fa lö öbe'e khönia, ba na i'angaröfi li dania Yehowa, ba khömö andrö, ba tobali horöu. 10 Öbe'e khönia ba böi abua gölöu wame'e khönia; börö sa wolau si manö, wa ifahowu'ö dania ndra'ugö Lowalangiu, Yehowa, ba nilaumö fefu, hadia ia, halö-halöŵö dangau.[4] 11 Lö'ö sa aefa-aefa, wa so ba danö zi numana, andrö uŵa'ö khöu: böi abua gölöu wamokai tangau ba niwami andrö si tosasa ba si numana, ba danömi.[5]
Fangefa'ö sawuyu[edit | edit source]
II. 12 Na so zamawa ya'ia khöu, iwami; Heberaio, he ira matua ba he ira alawe, ba me'önö fakhe sawuyumö ia, ba ba ndröfi si fitu, ba ö'efa'ö ia.[6] 13 Ba na ö'efa'ö ia, ba böi fofanö ia lö noro danga, 14 öfonoro ia biri-biri khöu ba bua nowi ba agu, sabönö noronia, nifahowu'ö Lowalangiu, Yehowa, ya'ugö, ba öbe'e khönia ösa. 15 Ba ötörö tödöu wa no sawuyu ndra'ugö göi ba danö Miserayi no, awö wa no i'efa'ö ndra'ugö Lowalangiu, Yehowa; andrö uŵa'ö khöu da'ö ma'ökhö.
16 Ba na imane khöu: Lö edönado aefa khöu — börö wa'omasinia ndra'ugö ba soroiyomou fefu, me no ohahau dödönia yomo khöu — 17 ba halö wörögi, ba tögi dalingania ba mbawandruhö, ba sawuyumö ia, si lö mamalö-malö; ba he ba zawuyumö ira alawe, ba ömanö göi wolau.[7]
18 Böi afökhö khöu, na ni'efa'ö ia, noa sa timba zi darua mogazi enoni wohalöŵönia khöu zi me'önö fakhe andrö; ba tobali ifahowu'ö ndra'ugö Lowalangiu, Yehowa, ba nilaumö, fefu.
Fe'amoni'ö ono si a'a[edit | edit source]
III. 19 Fefu nono si a'a, si matua, ono zaŵiu ba ono mbiri-biriu, ba ö'amoni'ö khö Lowalangiu, Yehowa. Si a'a nono zaŵiu, ba lö öfohalöŵö, ba ba zi a'a nono mbiri-biriu, ba lö tola öguti mbu.[8] 20 Ba naha andrö nituyu Yehowa, ö'a ia, föna Lowalangiu, Yehowa, ero röfi, ba awöu zoroiyomou fefu.[9]
21 Ba na so khönia zi sala, ma fa'ombuyu-mbuyu döla, ba ma fa'au'a ba ma bö'önia sala sebua, ba lö tola öbe'e sumange Lowalangiu, Yehowa.[10] 22 Ba nahiamö ö'a zi manö, ba he si ra'iö ba he si lö fa'ara'iö, ba i'a, nifemanga nago ba ma böhö. 23 Ha do zi lö tola ö'a, öfanuwagö idanö, ba danö tou.[11]
Famotokhi ba gahe[edit | edit source]
Fabaliŵa lala[edit source]
Olayama Moze V: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö