Wb/nia/Moze V/12
Oroisa ba wanudugö fefu naha wame'e adu[edit | edit source]
I. 1 Da'e nifakhoi, ba da'e huku, nitöngönimi ba wolo'ö ya'ia, si lö mamalö-malö, ba danö andrö, nibe'e Lowalangi ndra tuau, Yehowa, khöu, götö wa'anau nosomi ba guli danö.
2 Mifaulugö wanudugö nahia andrö fefu, ba nifosumange soi niha andrö, nitimbami, Lowalangira mege, ba hili salaŵa, ba ba hili-hili ba ba mbörö geu sauri fefu.[1] 3 Midudugö naha wame'e sumange andrö khöra, ba gowe khöra, ba mirasa, ba eu ni'amoni'ö andrö khöra, ba mitunu, ba famaedo Lowalangira, ba mifufu, mibe'e mate döinia ba nahania andrö.[2] 4 Ba böi mimanö ba khö Lowalangimi, Yehowa.[3]
Fangohonogöi naha wame'e sumange si ha sambua[edit | edit source]
II. 5 Naha andrö, nihonogöi Lowalangimi, Yehowa, dania, nituyunia ba madomi andrö fefu, ba wamonahia töinia ba da'ö, ba böi miböhöli, ba da'ö möi-möi'ö. 6 Ba da'ö mi'ohe zumange nitunu andrö khömi ba sumange nitaba, ba si sambua ni'ofulu andrö khömi ba hadia nibe'emi sumange si no amaedola wegero, ba amabu'ula limi. Ba saoha gölömi ba si a'a ba wa'atumbu ba zaŵimi ba ba mbiri-birimi. 7 Ba da'ö milau manga föna Lowalangimi, Yehowa, ba ba da'ö omuso dödömi, soroiyomomi fefu, mi'omusoi'ö tödö gölömi, nisöndrami andrö, nifahowu'ö Lowalangiu, Yehowa, ya'ugö.
8 Böi mitohugö wolau-lauda iya'e, me ilau zomasi ia zamösana. 9 Irugi maökhö sa, ba lö nikhamömi fa'ahono ba tenga na khömi danö, nibe'e Lowalangiu, Yehowa, dania.
10 Ba na no mi'ötö Yoridano, na no ahono ami ba danö andrö, nibe'e Lowalangimi, Yehowa, okhötami ba na no itimba nemalimi fefu, fasui, fa ahono ami, 11 fa lö hadia ia sa'ae khömi, awena dania mo'ahonoa, wa ba naha andrö, mi'ohe fefu hadia ia ni ŵa'ögu khömi, ba naha andrö, nituyu Lowalangimi, Yehowa, ba wamonahia töinia ba da'ö; sumange nitunu andrö khömi ba sumange nitaba, ba si sambua ni'ofulu andrö khömi, ba hadia nibe'emi sumange si no amaedola wegero, ba sumange amabu'ula li andrö khömi, nitutuyu, nifabu'umi khö Yehowa.
12 Ba omuso dödömi föna Lowalangimi, Yehowa, ya'ami ba iraonomi matua ba iraonomi alawe ba sawuyumi, ira matua ba ira alawe, awö nono Lewi andrö, si fatewu khömi, me lö khönia tanö, lö tana khönia, ondröita dania.[4]
13 Faigi sibai, fa böi sate öbe'e zumange nitunu andrö khöu: 14 ba naha nituyu Yehowa ba madomi andrö, heza, ba da'ö öbe'e zumange nitunu andrö khöu, ba ba da'ö ölau fefu hadia ia niŵa'ögu khöu.
15 Ba hana sa na ötaba öu zomasi'ö ba mbanuami fefu, misa, ha wa'oya nibe'e khöu, howu-howu Lowalangiu, Yehowa; he si ra'iö ba he si lö fa'ara'iö, ba hana na la'a, amaedola nago ba amaedola mböhö. 16 Ha do zi lö tola mi'a; öfanuwagö idanö ba danö.[5]
17 Ba si sambua ni'ofulu andrö khöu, he bua danö ba he agu ba he fanikha, ba lö tola ö'a ba mbanuami misa, ba he si a'a ba wa'atumbu andrö ba zaŵiu ba ba mbiri-biriu, ba he hadia ia gamabu'ula li andrö, nifabu'umö, ba he ame'elamö saoha gölö, ba he hadia ia nibe'eu sumange fegero; 18 föna Lowalangiu Yehowa, ba naha andrö nituyu Lowalangiu, Yehowa, ö'a ia, ya'ugö ba onou matua ba onou alawe, ba sawuyumö, ira matua ba ira alawe, awö nono Lewi andrö, si fatewu ba mbanuami, ba ö'omusoi'ö tödö fefu hadia ia, nisöndrau föna Lowalangiu, Yehowa.[6]
19 Ba faigi sibai, fa böi ö'ositengagö nono Lewi andrö, götö wa'anau nosou ba danömi.
Fanenaŵa wemanga ndro[edit | edit source]
III. 20 Ba ebolo dania danöu, ibe'e Lowalangiu, Yehowa, na itörö nifabu'unia khöu, ba na ömane dania: Omasido ndriwo! me no mamio-mio dölö-tölöu ba da'ö, ba hana na ö'a ndriwo, ha wa'oya zomasi'ö.
21 Ba na no abölö aröu naha andrö, nituyu Lowalangiu, Yehowa, ba wamonahia töinia ba da'ö, ba taba-taba, si mane niŵa'ögu khöu, saŵimö ba biri-birimö, nibe'e Yehowa khöu, ba a ia, ba nahiau andrö, ha wa'oya zomasi'ö. 22 Si mane na la'a nago ba böhö wemangau ya'ia; he si ra'iö, ba he si lö fa'ara'iö, ba faoma tola la'a wöfö. 23 Ba böi awu'a, wa böi manö ö'a ndro; me no noso ndro andrö, ba lö tola öfao wemanga noso, na ö'a nösi.[7] 24 Lö tola ö'a, öfanuwagö idanö ba danö tou. 25 Lö tola ö'a, ena'ö sohahau dödö ndra'ugö ba iraonou furiu, na ö'o'ö zatulö, wamaigi Yehowa.
26 Ba hadia nibe'eu ame'ela ni'amoni'ö ba sumange amabu'ula li andrö khöu, ba ba naha andrö, nituyu Yehowa, ö'ohe, 27 ba ba naha wame'e sumange khö Lowalangiu, Yehowa, öbe'e zumange nitunu andrö khöu, ösi ba do, ba do zumange nitunu andrö khöu, ba nifaduwa ba naha wame'e sumange khö Lowalangiu, Yehowa; ba ösi, ba tola ö'a.
28 Töngöni goroisa andrö fefu, nifa'emagu khöu, ba o'ö, ena'ö lö mamalö-malö, wa sohahau tödö ndra'ugö, fabaya onou furiu dania, na ölau zatulö ba si sökhi, wamaigi Lowalangiu, Yehowa.
Famangelama ba zogoro ita andrö ba Ndrawa Gana'ana[edit | edit source]
IV. 29 Ba na ihori fönau soi niha andrö Lowalangiu, Yehowa, soi si möi'ö mutimba, ba na no ötimba ira ba na no ahono ndra'ugö ba danöra, 30 ba angelama, fa böi elungu ndra'ugö, ba wolo'ö huku khöra, na no muhori ira fönau, ba fa böi özofu-zofu Lowalangira andrö, fa böi ömane: Hewisa atö wamosumange soi andrö Lowalangira, ena'ö umanö göi wolau?
31 Lö tola ömanö wolau ba khö Lowalangimö, Yehowa; nilaura khö Lowalangira sa, ba oi sogoro Yehowa ba oi si fatuwu khönia, onora matua na'i ba onora alawe, ba latutunu ö Lowalangira.[8]
Famotokhi ba gahe[edit | edit source]
Fabaliŵa lala[edit source]
Olayama Moze V: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö