Wb/nia/Moze V/24
Oroisa ba zi faronga[edit | edit source]
I. 1 Na so zangai ira alawe, na i'owalu, ba na tebai i'omasi'ö dania, me no i'ila ba khönia zi fatuwu khönia, ba na no ibe'e khönia zura wangefa ba na no ifofanö baomonia,[1] 2 ba na noa sa'ae möi donga niha bö'ö, me no aefa aheta ia baomonia, 3 ba na no ibe'e göi zura wangefa, na no ifofanö göi baomonia ira matuania si samösa andrö, me anuzu dödönia göi khönia, ma na no mate ndrongania si samösa andrö, sangowalu ya'ia mege: 4 ba lö tola ifuli ihalö ira matuania si föföna andrö, sangefa'ö ya'ia mege, ena'ö dongania zui, me no itehe, ra'iö ia labe'e, me no sogoro Yehowa zi manö, ba böi fatörö horö ba danö andrö, nibe'e Lowalangiu, Yehowa, khöu, okhötau.
5 Na so zi bohou mangowalu, ba akha lö fao ia ba wanuwö, ba lö lafo'ömö ia hadia ia; döfi aefa ia, fa böi mofanö-fanö ia, ena'ö i'omusoi'ö dödö ndra alawe andrö, nihalönia.[2]
Oroisa ba wamaigi si numana[edit | edit source]
II. 6 Böi lahalö gade lösu, ba he ha halu; amaedola lahalö gade noso, na lahalö da'ö. 7 Na te'ila zondra'u iwania, Iraono Gizeraeli, ba na i'osawuyu, ba ma na i'amawa, ba si mate zanagö andrö. Öhori ba khömi zi lö sökhi.[3]
8 Faigi-faigi sibai ba wamakao andrö, bou auri andrö; ötöngöni sibai niŵa'ö gere, ono Lewi, ba ö'o'ö; oroisagu andrö khöra, ba mitörö sibai.[4]
9 Törö-törö tödö hadia nifatörö Lowalangiu, Yehowa, khö Miriya no, ba lala, me mi'otarai danö Miserayi![5]
10 Na öbe'e khö nawöu nifalali, hadia ia, ba lö tola möi'ö ba nomonia mangai gade khönia. 11 Tou ö'iagö, ba nibe'eu nifalali, ba i'ohe tou khöu gade.
12 Ba na niha si numana ia, ba böi mörö'ö so ba dangau gade andrö nibe'enia; 13 na aekhu luo, ba öfuli khönia gade andrö, ena'ö ibe'e balu-balunia mbarunia sebua, na mörö ia, ba ena'ö ifahowu'ö ndra'ugö, ba niha satulö ndra'ugö iŵa'ö Lowalangiu, Yehowa.[6]
14 Enoni si numana ba sambö balazo, ba böi fakao, he na oi ya'ami, ba he na niha bö'ö, si so ba danömi, ba mbanuami misa.[7] 15 Ero owi öbe'e luonia, böi na'i öbase'ö wa'aekhu luo, me no si numana ia ba me humulu dödönia wanema, fa böi i'angaröfi li Yehowa, ba khömö andrö, ba fa böi tobali horöu.
16 Böi mate nama börö ndraono, ba böi mate ndraono börö nama; ba horönia mate zamösana.[8]
17 Böi fuyu'ö huku, na so huhuo niha bö'ö ba ma na huhuo zi lö ama, si lö ina; ba böi halö gade mbaru lakha mbanua.[9] 18 Törö-törö tödöu, wa no sawuyu ndra'ugö ba danö Miserayi mege, awö wa no i'efa'ö ndra'ugö ba da'ö Lowalangiu, Yehowa, andrö uŵa'ö khöu wolau si manö.
19 Na öbasi mbua nowiu, ba na so zolifu'ö ba danö, fakhe, ba böi fuli'ö wangai; akha ö niha bö'ö ba ö zi lö ama, si lö ina ba ö lakha mbanua, ena'ö ifahowu'ö ndra'ugö Lowalangiu, Yehowa, ba nilau dangau, fefu.[10]
20 Ba na öteteu mbua falo khöu, ba böi alu-alui wo'u-wo'u ba ndraha misa; akha ö niha bö'ö, ba ö zi lö ama, si lö ina ba ö lakha mbanua.
21 Ba na ö'ozaragö mbua nagu ba kabu khöu, ba böi ozaragö na göi wo'u-wo'u dania; akha ö niha bö'ö ba ö zi lö ama, si lö ina ba ö lakha mbanua.
22 Törö-törö tödöu, wa no sawuyu ndra'ugö ba danö Miserayi mege; andrö uŵa'ö khöu wolau si manö.
Famotokhi ba gahe[edit | edit source]
Fabaliŵa lala[edit source]
Olayama Moze V: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö