Wb/nia/Moze V/13

Fanguhuku sama'ele'ö sofaya

1 Fefu goroisa andrö, nibe'egu khömi, ba mitöngöni, ba wolo'ö ya'ia; böi minönö, ba böi miwuwu.

2 Na so zi maoso ba khömi sama'ele'ö, ba ma sangifi, sangombakha khöu tandra ba ma ila-ila, 3 ba na itörö tandra andrö ba ma ila-ila andrö, ni'ombakha'önia khöu, wanguma'ö: Data'o'ö Lowalangi bö'ö — [Lowalangi] si lö örai mila — ba tafosumange! 4 ba böi fondrondrongo li zama'ele'ö andrö, ba he na sangifi, me no fanandraigö Lowalangimi, Yehowa, ya'ami, ba wamaigi, na moroi si'aikö ba dödömi mi'omasi'ö Lowalangimi, Yehowa, ba na moroi si'aikö ba gera-erami.

5 Khö Lowalangimi, Yehowa, mi'o'ö, mi'ata'ufi ia, mi'o'ö goroisania ba mifondrondrongo linia, ya'ia nifosumangemi, ba khönia molemba ami.

6 Ba sama'ele'ö andrö ba ma zui sangifi andrö, ba nibunu, me no ifarou niha ba wolaŵa Lowalangimi, Yehowa, si no mangeheta ya'ami ba danö Miserayi, si no mangefa'ö ya'ugö ba zi no möi'ö sawuyu, ba wamaelungu ya'ugö, ena'ö öröi lala andrö, niŵa'ö Lowalangiu, Yehowa, khöu fanörö; tobali öhori zi lö sökhi ba khömi.

Fanguhuku samaelungu ba wame'e adu

7 Na so zamowöhö ya'ugö, nibini'ö, he na talifusöu, ono ninau, ba he na onou matua, ba he na onou alawe, ba he na fo'omou, nitalaguimö bagi, ba he na si fahuwu khöu, somasi'ö, timba nosou, na imane khöu: Talabu, tafosumange Lowalangi niha bö'ö! — [Lowalangi] si lö mirai mi'ila, he ira tuau mege, 8 Lowalangi soi andrö, si tefasui ya'ami, he ba zahatö, ba he ba zaröu, i'otarai wondrege danö, numalö ba wondrege tanö sa — 9 ba böi o'ö, böi fondrondrongo linia; ba böi ahakhö dödöu, wamaigi ya'ia, böi alimagö ia khöu ba böi bini'ö horönia, 10 öbunu ia; tangau zi oföna tohare khönia, ba wamunu ya'ia, ba awena dania danga zato fefu. 11 Ötebu kara ia, wamunu ya'ia, me no i'alui wamabali ya'ugö khö Lowalangiu, Yehowa, si no mangeheta ya'ugö ba danö Miserayi, ba zi no möi'ö sawuyu.

12 Ba yalarongo Iraono Gizeraeli fefu, ena'ö ata'u ira, fa böi sa'ae falukha ba khömi zama-zökhi horö si mane da'ö.

Fanguhuku banua si no mangerogö Lowalangi

13 Na örongo, ba mbanua andrö, heza, nibe'e Lowalangiu, Yehowa nahiau, 14 no maoso niha si lö ngaroro, banuami, ba no lafowöhö mbanuara, wanguma'ö: Talabu, tafosumange Lowalangi bö'ö! — [Lowalangi] si lö mirai mila — 15 ba haogö wanekhegö, alu-alui sibai, ba na oroma dania, wa tenga faya, wa no telau ba khömi zogoro ita andrö, 16 ba öbunu mbanua andrö si'öli, ölakha'ö mbanua andrö, awö nösinia fefu, awö guriföra, si'öli.

17 Fefu hadia ia zi möi ba dangami ba mbanua andrö, ba ö'owuloi baewali sebolo khöra, ba ötunu mbanua, fabaya nihalömi andrö, fefu, sumange Lowalangiu, Yehowa, sa'oi so, ba ya hili-hili adudula ia, si lö tebulö, böi yatetaru'ö sa'ae.

18 Böi falemba ba dangau hadia ia nilakha'ö andrö, ena'ö alö wönu Yehowa andrö, si no abölö-bölö, ba ena'ö ahakhö dödönia ndra'ugö, ba ena'ö ato ami, ibe'e, ba wa'ahakhö dödönia andrö, si mane nifabu'unia khö ndra tuau, si no möi ba hölu ia, 19 na öfondrondrongo li Lowalangiu, Yehowa, wolo'ö oroisania andrö fefu, nifa'emagu khöu ma'ökhö, awö wolau satulö, wamaigi Lowalangiu, Yehowa.

Famotokhi ba gahe

Fabaliŵa lala

Olayama Moze V: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö