Wb/nia/Moze III/8
I. Famonukha gere[edit | edit source]
1 Ba humede Yehowa khö Moze, imane:[1]
2 Ohe Ga'aroni, awö ndraononia, awö nukha andrö ba fanikha famayoini, ba ono zaŵi, sumange fameta horö, ba biri-biri si matua andrö, si dua geu, ba kude andrö, si so bakha si lö mu'aisöni andrö, 3 ba falukha'ö zato fefu, föna mbawandruhö nose wama'ele'ö.
4 Ba i'o'ö niŵa'ö Yehowa khönia Moze, ba owulo zato föna mbawandruhö nose wama'ele'ö.
5 Ba imane Moze ba zato: Da'e ia, niŵa'ö Yehowa, nilau.
6 Ba ifa'aso Ga'aroni ba iraononia Moze ba ifemondri ira. 7 Aefa da'ö, ba ifobaru Ga'aroni kameza andrö ba ifamöbö talu böbö talu andrö ba ifobaru baru sebua ba ono mbaru ba doto andrö; ba iböbö khönia mböbö nono mbaru andrö, wangaro'ö khönia.[2]
8 Ba ibe'e ba dotonia mbola andrö, ba ibe'e bakha ba mbola Urimi ba Tumimi andrö. 9 Ba ibe'e ba högönia mbala högö andrö; ba tanö föna ba mbala högö andrö ibe'e detenia andrö, ana'a, diadema ni'amoni'ö andrö, si mane niŵa'ö Yehowa khö Moze.
II. La'amoni'ö nose awö naha wame'e sumange, labe'e zumange[edit | edit source]
10 Ba ihalö wanikha famayoini Moze, ibayoini nose, awö fefu hadia ia zi so bakha, we'amoni'ö ya'ia. 11 Ba itefe göi ba naha wame'e sumange ösa, mewitu, ibayoini naha wame'e sumange andrö, awö wakake khönia, fefu, ba he gala andrö, fabaya ahenia, we'amoni'ö ya'ia.
12 Ba ilau ba högö Ga'aroni ösa wanikha famayoini, ibayoini ia, we'amoni'ö ya'ia. 13 Ba ifa'aso göi ndraono Ga'aroni, ifobaru ira kameza, ba ifamöbö talu böbö talu andrö ba ifokofia, si mane niŵa'ö Yehowa khö Moze.
14 Ba ifa'aso nono zaŵi andrö, sumange fameta horö, ba latufa högö nono zaŵi andrö ira A'aroni iraononia, tangara. 15 Ba itaba Moze, ihalö ndro, igule'ö ba dandru naha wame'e sumange, fasui, turunia, fameta sala ba naha wame'e sumange; ba do soya, ba iduwagö tou ba zinga naha wame'e sumange; i'amoni'ö naha wame'e sumange andrö, wolau khönia fameta sala andrö. 16 Ba ahori ihalö dawö wali'a, ba si faböbö ba gate ba bua si dombua, fabaya tawönia, ba itunu Moze, ba naha wame'e sumange.
17 Ba ono zaŵi andrö, fabaya uli, ba ösinia ba tainia, ba baero golombaseŵa itunu, si mane niŵa'ö Yehowa khö Moze. 18 Ba awena ifa'aso mbiri-biri si matua andrö, sumange nitunu, ba latufa högönia ira A'aroni iraononia, tangara. 19 Ba itaba Moze ba itefe naha wame'e sumange do andrö, fasui.
20 Ba biri-biri andrö, ba itatawi, ba itunu högö, awö ngawua andrö, awö dawö. 21 Ba alakhaö ba ahe, ba isasai ba nidanö; aefa da'ö, ba itunu mbiri-biri andrö, ma'asageu Moze, sumange nitunu, samohua, ö nibe'e khö Yehowa, nifatörö ba galitö, si mane niŵa'ö Yehowa khö Moze.
III. Sumange ba we'amoni'ö A'aroni ba iraononia[edit | edit source]
22 Aefa da'ö ba ifa'aso mbiri-biri si sageu andrö, biri-biri famataro, ba latufa högönia ira A'aroni ononia, tangara.[3] 23 Ba itaba Moze ba ihalö ndro ma'ifu, ba igule'ö ba doyo dalinga Ga'aroni ba gambölö ba ba duru sebua ba dangania kambölö ba ba duturu kahe sebua kambölö.
24 Ba ifa'aso göi Ndraono Ga'aroni Moze ba igule'ö göi ma'ifu ndro ba doyo dalingara kambölö ba ba duru sebua ba dangara kambölö ba ba duturu kahe sebua kambölö, ba do soya, ba ibe'e fanefe naha wame'e sumange, fasui.
25 Ba ihalö dawö: i'o sotawö andrö ba tawö mbetu'a fefu, ba si faböbö ba gate ba bua si dombua, fabaya tawönia, ba faha kambölö. 26 Ba ihalö ba gude, si so si lö mu'aisöni andrö, föna Yehowa, zagörö kue si lö mu'aisöni ba sagörö kue roti nifaruka fanikha ba sagörö kue sanifi, ba i'orudugö ba dawö no mege ba ba waha andrö, faha kambölö; 27 ba ifarahugö wame'e ba danga ndra A'aroni iraononia, ihahae, nihahae föna Yehowa.[4]
28 Awena ifuli ihalö ba dangara Moze ba itunu ba naha wame'e sumange, yaŵa ba zumange nitunu, sumange famataro, samohua, sumange nibe'e khö Yehowa, nifatörö ba galitö.
29 Ba ihalö nosu mbiri-biri famataro andrö Moze ba ihahae, nihahae föna Yehowa; tana khö Moze ia, si mane niŵa'ö Yehowa khö Moze. 30 Ba ihalö ösa Moze fanikha famayoini ba do, si so ba naha wame'e sumange, ba itefe Ga'aroni, awö nukhania, ba iraononia, awö nukhara, i'amoni'ö Ga'aroni, fabaya nukhania ba iraononia, fabaya nukhara.
31 Ba imane Moze khö ndra A'aroni iraononia: Mirino nagole andrö, föna mbawandruhö nose wama'ele'ö, ba mi'a ba da'ö, awö roti andrö, si so ba gude, nifao ba zumange famataro andrö, si mane niŵa'ö khögu ba goroisa andrö; A'aroni ba iraononia zi manga ya'ia.[5] 32 Ba si tosai nagole ba roti, ba mitunu.
33 Ba fitu bongi lö tola miröi mbawandruhö nose wama'ele'ö, irugi luo no ahöwö mbongi andrö, nihonogöi ba wamataro ya'ami; fitu ngaluo sa wa'ara lafo'ösi'ösi dangami.
34 Si mane nilau ma'ökhö, si manö ni'oroi'ö Lowalangi folau-lau, ba wameta salami. 35 Fitu bongi wa'ara, ba bongi ma'ökhö mi'iagö zinga mbawandruhö nose wama'ele'ö, mi'o'ö goroisa Yehowa, fa böi mate ami — si manö niŵa'ö khögu!
36 Ba la'o'ö A'aroni ba iraononia fefu ni'oroi'ö Yehowa khö Moze.
Famotokhi ba gahe[edit | edit source]
Fabaliŵa lala[edit source]
Olayama Moze III: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö