Wb/nia/Moze III/13

I. Oroisa ba mbou auri ba niha

1 Ba humede Yehowa khö ndra Moze A'aroni, imane: 2 Na oroma ba dete guli niha zobu'u, ba ma gigimö, ba ma safusi, na ibörötaigö bou auri, ba ni'ohe khö Ga'aroni ere andrö ia, ba ma khö nononia, ha niha, ere andrö. 3 Ba na ifaigi ere zofökhö andrö ba gulinia, wa no ahuwa mbu ba da'ö, awö wa hulö zahöndrö, moroi ba guli bö'ö, ba no si ndruhu mbou auri; ba ha i'ila si'aikö da'ö ere, ba si ra'iö niha da'ö yamuŵa'ö. 4 Ba na so zafusi ba gulinia, si tenga sahöndrö, moroi ba guli bö'ö ba si lö ahuwa bu, ba i'oniagö zi göna da'ö ere, fitu bongi. 5 Ba na ifaigi dania ia ere, na no irugi fitu bongi, ba na i'ila, si manö-manö zi göna andrö, wamaiginia, ba lö si tedou wökhö andrö, ba guli; ba ifuli i'oniagö ia ere, fitu bongi tö. 6 Ba na ifuli ifaigi ere, na no irugi fitu bongi, ba na i'ila no ahoe nahia andrö, ba lö si tedou wökhö andrö, ba guli, ba tenga si ra'iö ia yamuŵa'ö ere — ha gigimö; ba ibabago sa nukhania, ba tenga si ra'iö ia.

7 Ba na tedou-dou gigimö andrö, ba guli, aefa mbaŵa wangoroma'önia ya'ia khö gere, ba wanguma'ö tenga si ra'iö ia, ba na ifuli i'oroma'ö ia khö gere, ba na isöndra ere, 8 no tedou-dou gigimö andrö, ba guli, ba si ra'iö ia yamuŵa'ö ere: bou auri sa'ae.

9 Na te'ila ba niha zi göna bou auri ia, ba ni'ohe khö gere. 10 Ba na isöndra ere, so ba guli zi hulö waosa, safusi, si no ahuwa bu, ba sotawötawö, 11 ba no bou auri si no ara, ba gulinia, ba iŵa'ö ere, si ra'iö ia, lö'ö sa'ae i'oniagö, si ra'iö sa'ae ia.

12 Ba na bou auri manö, sageu ya'ia, ba gulinia, na no anönö bou auri guli zi göna andrö, ma'asageu i'otarai högö, numalö ba gahe, heza göi ifaigi ere, ba na i'ila ere, 13 no tehawu manö bou auri nösinia ma'afefu, ba tenga si ra'iö zi göna andrö yamuŵa'ö: no fatutu wa'afusi, ba tobali tenga si ra'iö. 14 Ba na si tawötawösö khönia, ba si ra'iö ia; 15 ba na i'ila zi no tawötawösö andrö ere, ba si ra'iö yamuŵa'ö: si tawötawösö andrö sa, ba si ra'iö, no bou auri. 16 Ba na ifuli taya zi tawötawösö andrö ba na afusi, ba yamöi khö gere. 17 Ba ifaigi ia ere ba na i'ila, no afusi nahia andrö si no göna, ba tenga si ra'iö zi göna andrö yamuwa'ö ere; no tenga si ra'iö ia.

18 Na so zi tumbu faosa ba guli ba na ifuli döhö, ba na obu'ubu'u dania, 19 safusi ba ma soyoramö, ba yamu'oroma'ö ia khö gere. 20 Ba na isöndra ere, no ahöndrö, moroi ba guli bö'ö, wamaigida, awö wa no ahuwa mbu khönia, ba si ra'iö ia yamuŵa'ö ere; no si ndruhu bou auri, salua ba waosa andrö. 21 Ba na ifaigi nahia andrö ere ba na i'ila, lö sahuwa bu khönia ba tenga sahöndrö moroi ba guli bö'ö ba no ahoe ma'ifu, ba yamu'oniagö niha da'ö ere, fitu bongi. 22 Ba na itugu tedou-dou dania zafusi andrö, ba guli, ba si ra'iö niha da'ö yamuŵa'ö ere; no göna nahia andrö. 23 Ba na lö si tedou zafusifusi andrö, na lö sanana-nana, ba no laheto waosa no mege, ba tenga si ra'iö ia yamuŵa'ö ere.

24 Na so ba guli niha zakhozi, ba na oyoramö, ba ma na safusi nagole andrö, sanöi ba zakhozi andrö, 25 ba na ifaigi ere ba na i'ila, no ahuwa mbu ba zafusifusi andrö, ba no ahöndrö, moroi ba guli bö'ö, wamaigida, ba no bou auri, salua ba zakhozi andrö, ba si ra'iö niha da'ö yamuŵa'ö ere; no si ndruhu bou auri. 26 Ba na i'ila ere, na ifaigi, lö sahuwa mbu ba nahia safusifusi andrö ba tenga sahöndrö ia, moroi ba guli bö'ö ba no ahoe ma'ifu, ba yamu'oniagö niha da'ö ere, fitu bongi. 27 Ba na ifaigi ia ere, na no irugi fitu bongi, ba si ra'iö ia iŵa'ö ere, na tedou-dou nahia andrö, ba guli — no si ndruhu bou auri. 28 Ba na lö si tedou nahia safusifusi andrö, na lö sanana-nana ia ba na no ahoe ma'ifu, ba no sobu'ubu'u zakhozi andrö ba tenga si ra'iö ia yamuŵa'ö ere; noa sa laheto zakhozi andrö.

29 Na so ndra matua, ba ma ira alawe, si so tandra ba högö, ba ma ba gambi, 30 ba na ifaigi ere dandra andrö, ba na isöndra, no ahöndrö, moroi ba guli bö'ö, wamaiginia ba mobu sise-ise, sa'usö, ba si ra'iö ia yamuŵa'ö ere, no gigimö bou auri ba högö, ba ma ba gambi. 31 Ba na i'ila ere — na ifaigi gigimö andrö — tenga sahöndrö moroi ba guli bö'ö ba lö bu saitö khönia, ba yamu'oniagö zi göna gigimö andrö ere, fitu bongi. 32 Ba na ifaigi nahia si göna andrö ere, na no irugi fitu bongi, ba na i'ila, lö si tedou gigimö andrö, ba lö bu sa'usö, ba tenga sahöndrö moroi ba guli bö'ö gigimö andrö, 33 ba yamutöwö ia — ha gigimö andrö zi lö itöwö —; ba awena dania ifuli i'oniagö ere zi no göna gigimö andrö, fitu bongi zui. 34 Ba na ifaigi gigimö andrö ere, na no irugi fitu bongi, ba na i'ila, lö si tedou gigimö andrö, ba guli, ba na tenga sahöndrö ia, moroi ba guli bö'ö, ba tenga si ra'iö ia yamuŵa'ö ere; ba yamubabagö nukhania, ba tenga si ra'iö ia. 35 Ba na tedou-dou gigimö andrö, ba guli, na no muŵa'ö tenga si ra'iö zi göna andrö, 36 ba na ifaigi ia ere ba na i'ila, no tedou gigimö andrö ba guli, ba alakha lö i'alui mbu sa'usö andrö ere — si ra'iö ia. 37 Ba na si manö-manö gigimö, wamaigida ba na no tumbu khonia mbu saitö, ba no döhö gigimö andrö — tenga si ra'iö ia, ba yamuŵa'ö ere, wa tenga si ra'iö ia.

38 Na oroma ba guli ndra matua, ba ma ba guli ndra alawe dandra, tandra safusifusi, 39 ba na ifaigi ere ba na i'ila ba guli dandra safusifusi, si no ahoe, ba no gigimö si lö ata'u ita, si tumbu ba guli — tenga si ra'iö niha si manö.

40 Ba na batule niha, ba no si batule tanö ba mbörö du'i — tenga si ra'iö niha si manö. 41 Ba na batule ia yaŵa gangango, ba no si batule tanö föna — tenga si ra'iö niha si manö. 42 Ba na tumbu ba zi batule tanö furi, ba ma tanö föna gigimö soyoramö, ba no bou auri, salua ba zi batule andrö tanö furi, ba ma tanö föna. 43 Ba na ifaigi ia ere, ba na i'ila gigimö soyoramö ba zi batule andrö khönia tanö furi, ba ma tanö föna, si mane bou auri ba guli nösi, wamaigida, 44 ba si no göna bou auri zi manö. Si ra'iö ia; yamuŵa'ö manö ere, si ra'iö ia; no ba högönia so wökhö andrö.

45 Ba si no göna bou auri andrö, si so fökhö andrö ba nösi, ba yamu'onukha nukha si no atika ba böi yamufake mbalu-balu högö ba yamubalugö gambinia ba yamu'ao: Si ra'iö! si ra'iö! 46 Götö so khönia wökhö andrö, ba si ra'iö ia. Si ra'iö ia; ni'oniagö nahiania — baero golombaseŵa i'iagö.

II. Ba mbou auri ba nukha

47 Ba na ba mbaru oroma zi hulö mbou auri, sambua nahia — he ba mbaru luo, ba he ba mbaru tarafali, 48 ba ma ba nukha bö'ö, nukha nisoso, he tarafali, ba he baru luo, ba ma ba guli zaŵi, ba ma ba gama-gama uli zaŵi, hadia ia, ba na no mowuge'e, 49 ba ma na no oyoramö nahia andrö, ba mbaru, ba ma ba guli zaŵi, ba ma ba nukha nisoso, ba ma ba gama-gama uli zaŵi, hadia ia, ba no bou auri, ba ni'oroma'ö khö gere. 50 Ba na no ifaigi nahia andrö, si göna, ere, ba yamukusi ba naha zi no göna bou auri andrö, ere, fitu bongi. 51 Ba na i'ila, na no irugi fitu bongi, no tedou zi hulö gigimö andrö, ba mbaru, ba ma ba nukha nisoso, ba ma ba guli zaŵi, ba ma ba gama-gama hadia ia, ni'oguna'ö uli zaŵi, wamazökhi hadia ia, ba no bou auri safaito gigimö andrö; si ra'iö zi manö; 52 ba nitunu mbaru andrö, ba ma nukha nisoso, baru luo ba ma tarafali, ba ma gama-gama uli zaŵi, ba zoroma gigimö andrö; noa sa bou auri safaito; nitunu ia.

53 Ba na ifaigi ere, ba na i'ila, lö si tedou gigimö andrö, ba mbaru, ba ma ba nukha nisoso, ba ma ba gama-gama uli zaŵi, hadia ia, 54 ba yamuŵa'ö ere, nibabago zi göna gigimö andrö, ba yamufuli mukusi ba naha, fitu bongi zui. 55 Ba na ifuli ifaigi ere, na no mubabago mege nahia andrö, si no göna, ba na i'ila, si manö-manö nahia andrö, wamaigida, he ŵa'ae lö si tedou gigimö andrö, ba si ra'iö ia; nitunu — no si no mogao, he tete, ba he arö.

56 Ba na i'ila ere — na ifaigi — no ahoe nahia andrö, si göna, na no aefa lababago, ba nisaka [nahia andrö], ba mbaru, ba ma ba guli zaŵi, ba ma ba nukha nisoso. 57 Ba na ifuli tumbu mbou auri ba mbaru, ba ma ba nukha nisoso, ba ma ba gama-gama uli zaŵi, hadia ia, ba no si bohou alua; nitunu zi göna gigimö andrö. 58 Ba baru andrö, ba he nukha nisoso, ba he gama-gama uli zaŵi, hadia ia ngawalö, ba zi no taya gigimö andrö, na no mubabago, ba nifuli nibabago, awena dania tenga si ra'iö.

59 Da'ö nihonogöi ba mbou auri andrö ba mbaru luo ba ba mbaru tarafali ba he ba gama-gama uli zaŵi, hadia ia, ba wanguma'ö na tenga si ra'iö ba na si ra'iö.

Famotokhi ba gahe

Fabaliŵa lala

Olayama Moze III: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö