Wb/nia/Moze III/10

I. Tehuku ndra Nadabi Abihu ba galitö bö'ö andrö

1 Ba lahalö gali mbo galitö khöra iraono Ga'aroni andrö Nadabi ba Abihu, labe'e galitö yaŵa ba lalau nitunu, samohua, ba tobali la'ohe föna Yehowa galitö si tenga, si tenga niŵa'önia khöra.

2 Ba so galitö, si oroi Yehowa, ba i'a ira, tobali mate ira [ba da'ö] föna Yehowa.

3 Ba imane Moze khö Ga'aroni: Ba da'ö itörö niŵa'ö Yehowa, me imane: "Ba zahatö khögu u'oroma'ö, wa ni'amoni'ö ndra'odo, ba ba zi so sato fefu ufa'ele'ö lakhömigu." Ba lö hede-hede Ga'aroni. 4 Ba humede Moze khö ndra Miza'eli Elisafa, ono Uzieli andrö, ama Ga'aroni si akhi, imane khöra: Mi'aini, miheta föna ni'amoni'ö dalifusömi andrö, mi'ohe baero golombaseŵa.

5 Ba möi ira, la'ohe baero golombaseŵa, la'o'ö niŵa'ö Moze; lö muheta gamezara andrö.

6 Ba imane Moze khö Ga'aroni ba khö nononia Eleazari ba Itamari: Lö tola miheta kofiami ba lö tola mitika nukhami, fa böi mate ami ba fa böi mofönu Yehowa ba zato fefu! Ba talifusömi andrö ba ma'uwu Gizeraeli fefu, ba hana na la'e'esi nitunu Yehowa andrö. 7 Ba lö'ö göi tola miröi nose wama'ele'ö, we'amöi baero, fa böi mate ami, me no tohare khömi wanikha wamayoini andrö khö Yehowa! Ba la'o'ö niŵa'ö Moze.

II. Lö tola tebadu nagu ba halöŵö ni'amoni'ö andrö

8 Ba humede Yehowa khö Ga'aroni, imane:

9 Agu ba hadia ia nibadu, si mabu niha, ba lö tola mibadu — he ya'ugö ba he iraonou — na möi ami bakha ba nose wama'ele'ö, fa böi mate ami. Amakhoita si lö tebulö da'ö, götö-götö wa'ara. 10 Ba mifaehusi ira ni'amoni'ö zi tenga ni'amoni'ö ba salakha ba si lö alakha, 11 ba mifahaö Ndraono Gizeraeli ba gamakhoita andrö fefu, nifa'ema Yehowa khöra khö Moze.

III. Hadia dana ba gere ba zumange andrö nifatörö ba galitö

12 Ba ibe'e lala Moze khö Ga'aroni ba khö ndra Eleazari Itamari, si tosai ononia na, imane: Mihalö zumange ni'a andrö, si tosai na sumange nibe'e khö Yehowa, nifatörö ba galitö, ba mi'a lö mu'aisöni, ba ngai naha wame'e sumange, me no ni'amoni'ö sibai ia. 13 Andrö wa ba naha ni'amoni'ö mi'a; noa sa tana khöu, si möi khöu ba ba ndraonou, föfö zumange Yehowa andrö, nifatörö ba galitö — si manö niŵa'ö khögu. 14 Ba osu andrö, nihahae ba faha fegero, ba mi'a onou matua ba onou alawe, ba naha si sökhi, noa sa mutehe khömi, tana khömi, si möi khömi iraonou, föfö zumange fangorifi andrö, nibe'e Ndraono Gizeraeli. 15 Ba faha andrö, fegero, ba osu nihahae, ba nifao ba ngawua dawö andrö, nihonogöi sumange nifatörö ba galitö, ena'ö tehahae, nihahae föna Yehowa; ba khömi iraonou dania, tana khömi si lö tebulöbulö, ha wa'ara, si mane niŵa'ö Yehowa.

16 Ba i'alu-alui nambi si matua andrö, sumange fameta horö, Moze, ba hiza, no mutunu. Ba mofönu sibai ia khö ndra Eleazari Itamari, ono Ga'aroni andrö, si tosai na khönia, ba imane: 17 Hana sa wa lö mi'a zumange fameta horö andrö, ba naha ni'amoni'ö? noa sa ni'amoni'ö sibai ia, ba no ibe'e khömi, ba wameta horö mbanua, ba ba wangatulö'ö ya'ira khö Yehowa. 18 Hiza, no lö mu'ohe si bakha ba ni'amoni'ö ndronia andrö, ba mi'a mena'ö, ba ni'amoni'ö, si mane niŵa'ögu.

19 Ba imane A'aroni khö Moze: Hiza, no labe'e zumange fameta horö, awö zumange nitunu khöra, khö Yehowa ma'ökhö, ba no göna ndra'o si manö, ba na u'a ena'ö zumange fameta horö ma'ökhö, hadia, omasi maö Yehowa?

20 Ba me irongo da'ö Moze, ba ibato wanegu ya'ira.

Famotokhi ba gahe

Fabaliŵa lala

Olayama Moze III: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö