Wb/nia/Moze III/4

I. Sumange fameta horö gere si lö la'ila watahögö mege

1 Ba humede Yehowa khö Moze, imane:

2 Hede ba Ndraono Gizeraeli, ba ŵa'ö khöra: Na so zanawö oroisa Yehowa andrö zambalö, hadia ia, si lö mu'odödögö, na ilau hadia nilakha'ö [ba mimane:]

3 Na ere nibayoini andrö zosala, si möi sala zato, ba ibe'e khö Yehowa sumange fameta horö nono zaŵi si matua, si lö sala, sulö lalö andrö, horönia andrö. 4 I'ohe ba zinga mbawandruhö nose wama'ele'ö, föna Yehowa, nono zaŵi andrö, ba itufa tangania högö nono zaŵi ba itaba nono zaŵi, föna Yehowa.

5 Ba yamuhalö ösa ndro zaŵi andrö ere nibayoini andrö ba yamu'ohe bakha ba nose wema'ele'ö. 6 Ba yamu'ungugö durunia ba ndro ere, ba mewitu yamutefe tou zalo do andrö ösa, föna mba'a-ba'a andrö, ba ni'amoni'ö, föna Yehowa. 7 Ba yamugule'ö ba dandru naha wame'e sumange, föna Yehowa, ba nose wama'ele'ö ndro andrö ma'ifu ere, ifabaya zamohua andrö, nitunu-tunu; ba do nono zaŵi, soya andrö, ba iduwagö tou ba zinga naha wame'e sumange nitunu andrö, ba zinga mbawandruhö nose wama'ele'ö.

8 Ba ahori yamuhalö dawö nono zaŵi sumange fameta horö andrö, tawö wali'a andrö ba murumuru mbetu'a 9 ba bua si dombua, fabaya tawönia, ba ba rami lafoyo, awö zi faböbö ba gate; ba mbua i'etu'ö — 10 si mane fangai ba zaŵi si matua, sumange fangorifi; ba itunu ere ba naha wame'e sumange nitunu.

11 Ba ba guli nono zaŵi andrö ba ba nösinia, numalö högönia ba ahenia ba betu'ania ba tainia, 12 ono zaŵi andrö, ma'asageu, ba ni'ohe baero golombaseŵa, ba naha si sökhi — ba naha niduwagö awu andrö — ba nitunu ba mbaho geu; ba naha niduwagö awu andrö latunu ia.

II. Fameta horö mbanua

13 Ba na samba banua Iraono Gizeraeli zosala, si lö mu'odödögö, si lö aboto ba dödö zato, na lasawö goroisa Yehowa andrö zambalö, hadia ia, horöra, 14 ba sato zame'e ono saŵi, sumange fameta horö, na no murongo lalö andrö, horöra.

15 La'ohe föna nose wama'ele'ö, ba latufa tangara högö nono zaŵi andrö satua mbanua, föna Yehowa ba lataba ia, föna Yehowa. 16 Ba i'ohe bakha ba nose wama'ele'ö ndro nono zaŵi andrö ösa ere nibayoini andrö. 17 Ba i'ungugö ba ndro andrö durunia ere ba mewitu itefe tou zalo do andrö ma'ifu föna Yehowa — föna mba'a-ba'a andrö. 18 Ba ma'ifu göi igule'ö ba dandru naha wame'e sumange, föna Yehowa, ba nose wama'ele'ö do andrö; ba do soya andrö, ba iduwagö tou ba zinga naha wame'e sumange nitunu, ba zinga mbawandruhö nose wama'ele'ö. 19 Ba tawönia fefu, ba ihalö, ba itunu ba naha wame'e sumange.

20 Ba ono zaŵi andrö, ba ifatörö ba nifatörönia saŵi si matua andrö sumange fameta horö — ba da'ö göi ifatörö. Na no imanö ere, wamaigi khöra fameta horö, ba tebe'e aefa khöra. 21 Ba ono zaŵi andrö, ba ni'ohe baero golombaseŵa ba nitunu, si mane fanunu saŵi si matua no mege. Sumange fameta horö mbanua da'ö.

III. Fameta horö zalaŵa

22 Ba na salaŵa zanawö oroisa Lowalanginia Yehowa, zambalö, horönia, si lö mu'odödögö, 23 ba na no mu'ombakha'ö khönia lalönia, horönia andrö, ba yamube'e sumange nambi si matua, si lö sala, 24 itufa tangania högö nambi andrö, ba itaba ba nitataba sumange nitunu andrö föna Yehowa; sumange fameta horö ia.

25 Ba ihalö ma'ifu ndro zumange fameta horö andrö ere, turunia, ba igule'ö ba dandru naha wame'e sumange nitunu, ba do soya, ba iduwagö tou, ba zinga naha wame'e sumange nitunu. 26 Ba tawö, ba ahori itunu ba naha wame'e sumange, si mane tawö zumange fangorifi andrö. Na no ifaigi khönia ere wameta lalönia andrö, ba tebe'e aefa khönia.

IV. Fameta horö zi ha samösa

27 Ba na ono mbanua zolalö wanawö oroisa Yehowa zambalö, horönia, si lö mu'odödögö, 28 ba na no mu'ombakha'ö khönia, lalönia andrö, horönia, ba yamube'e nambi si alawe, si lö sala, sumange fameta zala andrö horönia andrö, 29 itufa tangania högö zumange fameta horö andrö, ba itaba, ba nitataba sumange nitunu andrö.

30 Ba ihalö ma'ifu ndro andrö ere, turunia, ba igule'ö ba dandru naha wame'e sumange nitunu. Ba do soya, ba iduwagö tou, ba zinga naha wame'e sumange. 31 Ba tawö, ba ahori ihalö, si mane fangai ya'ia ba zumange fangorifi andrö, ba itunu ere ba naha wame'e sumange, samohua khö Yehowa. Na no imanö ere, wamaigi khönia fameta horö, ba tebe'e aefa khönia.

32 Ba na ono mbiri-biri zumange andrö, nibe'enia sumange fameta horö, ba si alawe, si lö sala, ibe'e. 33 Ba itufa tangania högö zumange fameta horö, ba itaba sumange fameta hörö, ba nitataba sumange nitunu andrö. 34 Ba ihalö ma'ifu ndro zumange fameta horö andrö ere, turunia, ba igule'ö ba dandru naha wame'e sumange. Ba do soya, ba iduwagö tou ba zinga naha wame'e sumange. 35 Ba tawö, ba ahori ihalö, si mane fangai-ngai tawö nono mbiri-biri andrö, sumange fangorifi, ba itunu ere, ba naha wame'e sumange, ba zumange Yehowa nifatörö ba galitö. Na no imanö ere, wamaigi khönia fameta sala andrö, horönia andrö, ba tebe'e aefa khönia.

Famotokhi ba gahe

Fabaliŵa lala

Olayama Moze III: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö