Wb/nia/Moze III/1

I. Amakhoita ba zumange nitunu, saŵi

1 Ba humede Yehowa khö Moze, fahuhuo ia khönia, moroi ba nose wama'ele'ö, imane:

2 Hede ba Ndraono Gizeraeli ba ŵa'ö khöra: na so ba khömi zame'e sumange Yehowa, ba urifönia ibe'e sumange, saŵi, ba ma urifö side-ide. 3 Na saŵi ibe'e sumange nitunu, ba si matua, si lö sala ibe'e. Yamu'ohe ba zinga mbawandruhö nose wama'ele'ö, ena'ö somasi Yehowa ia, ibe'e. 4 Ba yamutufa tangania högö zumange andrö, ba ni'omasi'ö ia ba aefa horönia ibe'e. 5 Awena dania itaba nono zaŵi andrö, föna Yehowa; ba iraono Ga'aroni, ere andrö, zame'e do andrö. Latefe naha wame'e sumange do andrö fasui, naha wame'e sumange andrö ba zinga mbawandruhö nose. 6 Ba ibo'a guli zumange ba itatawi nösi.

7 Ba iraono Ga'aroni, ere andrö, zangebua alitö ba dete naha wame'e sumange ba labahogö ba galitö geu nisisila. 8 Ba lahaogö Iraono Ga'aroni, ere andrö, wame'e yaŵa ba mbaho geu andrö ba galitö ba naha wame'e sumange ngawalö andrö, högö ba tawö. 9 Ba alakhaö ba ahe, ba lasasai ba nidanö, ba ifarahugö itunu ba naha wame'e sumange ere sumange nitunu, sumange nibe'e khö Yehowa, nifatörö ba galitö, samohua.

II. Biri-biri ba nambi

10 Ba na urifö side-ide — ono mbiri-biri, ba ma nambi — zumange andrö, nibe'enia sumange nitunu, ba si matua, si lö sala ibe'e.

11 Yamutaba föna Yehowa yöu naha wame'e sumange; ba iraono Ga'aroni, ere andrö, zanefe naha wame'e sumange do andrö, fasui. 12 Ba itatawi, ba ihaogö ere, wame'e ba mbaho geu andrö ba galitö ba naha wame'e sumange ngawalö andrö, awö högö, awö dawö. 13 Ba alakhaö ba ahe, ba lasasai ba nidanö, ba ifarahugö ere, wame'e ya'ia, itunu ba dete naha wame'e sumange; sumange nitunu ia, sumange nibe'e khö Yehowa, nifatörö ba galitö, samohua.

III. Marafadi

14 Ba na sumange fofo zumange andrö, nibe'enia khö Yehowa, ba fune ba ma ono marafadi ibe'e sumange.

15 Ba ere zolohe ba naha wame'e sumange, iboto högö ba itunu ba galitö ba naha wame'e sumange, ba do, ba nifera'ö ba ngai naha wame'e sumange. 16 Ba horokina ba bu, ba iheta ba itibo'ö ba niduwagö awu, tanö ba gatumbukha, i'otarai naha wame'e sumange. 17 Ba ilöwa gafi ba lö ifaefa; ba itunu ere ba naha wame'e sumange, ba mbaho geu andrö ba galitö yaŵa; sumange nitunu ia, sumange nibe'e khö Yehowa, nifatörö ba galitö, samohua.

Famotokhi ba gahe

Fabaliŵa lala

Olayama Moze III: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö