Wb/nia/Moze III/14

I. Sumange fangehao ba hadia nifakhoi tanö bö'ö ba zi göna bou auri

1 Ba humede Yehowa khö Moze, imane:

2 Da'ö gamakhoita ba zi göna bou auri, na baŵa wangehao ya'ia: Ni'ohe khö gere. 3 Ba si möi baero golombaseŵa gere, ba na isöndra ere — na ifaigi ia — no döhö wökhö nahia andrö, si göna bou auri ia, 4 ba yamuŵa'ö ere, ndramu'ohe wofo sauri, dombua, si tenga salakha, ba eu, eresi, ba kirimisi ba sufo, ba zi möi nihaogö andrö. 5 Ba yamuŵa'ö ere, lataba wofo si sambua ba nahia tanö, yaŵa nidanö gumbu. 6 Ba fofo sauri andrö ba eu eresi ba kirimisi ba sufo andrö, ba yamu'ungugö ba ndro wofo andrö, nitaba yaŵa nidanö gumbu no mege, fabaya fofo sauri andrö. 7 Ba mewitu itefe niha andrö, si möi nihaogö, ba mbou auri andrö, wangehao ya'ia; ba fofo sauri andrö, ba yamufoloi ba mbenua. 8 Ba si möi nihaogö andrö, ba ibabago nukhania, ba itöwö mbunia, ihori, ba mondri, ba nihaogö ia. Aefa da'ö ba tola möi ia ba golombaseŵa, ba baero nosenia i'iagö, fitu bongi. 9 Ba na no irugi fitu bongi, ba itöwö mbunia fefu, he ba högö, ba he gambi, ba he röngöröngö, bunia ma'afefu itöwö; ba ibabago nukhania ba mondri, ba abeta wa'ara'iönia.

10 Ba na irugi ŵalu bongi, ba yamuhalö nono mbiri-biri, dua rozi, si lö sala, ba sara nono mbiri-biri si alawe, si lö sala, si döfi fa'ebua, ba tölu ni'ofulu [zu'a-su'a] hamo si sökhi, nifaruka fanikha, sumange ni'a, ba matonga kata wanikha. 11 Ba yamu'angaruwusi khö Yehowa niha andrö si möi nihaogö, awö da'ö no mege, ere andrö, solau fangehao andrö, föna mbawandruhö nose wama'ele'ö. 12 Ba yamuhalö nono mbiri-biri si sara ere, yamube'e sumange ogauta, awö wanikha andrö, si matonga kata; faoma yamuhahae föna Yehowa. 13 Ba nitataba sumange fameta horö ba sumange nitunu, lataba nono mbiri-biri andrö, ba naha ni'amoni'ö; si mane sumange fameta horö sa, si manö göi zumange ogauta andrö: khö gere; ni'amoni'ö sibai ia. 14 Ba ihalö ma'ifu ndro zumange ogauta andrö ere ba igule'ö ba mbörö dalinga zi möi nihaogö andrö, ba gambölö ba ba duru sebua ba danga kambölö ba ba duturu kahe sebua kambölö. 15 Ba ma'ifu ihalö fanikha andrö, si matonga kata, ere, ba ilau ba dangania — ba danga gere — kabera. 16 Ba i'ungugö ba wanikha andrö durunia kambölö ere, ba wanikha ba dangania kabera, ba itefe föna Yehowa wanikha andrö turunia, mewitu. 17 Ba fanikha si tosai ba dangania, ba igule'ö ba mbörö dalinga zi möi nihaogö andrö, kambölö ba ba duru sebua ba dangania kambölö ba ba duturu kahenia sebua kambölö ba dete ndro zumange ogauta andrö. 18 Ba hadia zi tosai na do ba danga gere, ba yamulau ba högö zi möi nihaogö andrö, ena'ö iheta zalania khö Yehowa ere, ba zi manö.

19 Ba i'asiwai zumange fameta horö andrö ere, ba wameta sala zi möi nihaogö andrö ba wa'ara'iönia andrö; ba awena dania itaba zumange nitunu andrö. 20 Ba ibe'e zumange nitunu andrö ere, awö zumange ni'a, ba naha wame'e sumange; ba na no imanö ere, wamaigi fameta zala khönia, ba aheta wa'ara'iönia.

21 Ba na si numana ia, na tebai ibe'e [niŵa'ö andrö], ba ha sara yamuhalö ono mbiri-biri, sumange ogauta, ena'ö tehahae ba ena'ö tefaigi khönia wameta zala, ba sambua ni'ofulu hamo si sökhi, nifaruka fanikha, sumange ni'a, ba matonga kata wanikha, ba dombua wune, 22 ba ma dombua nono marafadi — hadia zi tola ibe'e —, ena'ö sumange fameta horö zi sambua ba sumange nitunu zi sambua. 23 Ba na no alua fitu bongi, i'otarai tehaogö ia, ba yamu'ohe khö gere, ba zinga mbawandruhö nose wama'ele'ö, föna Yehowa. 24 Ba yamuhalö nono mbiri-biri andrö, sumange ogauta, ere, fabaya fanikha andrö, si matonga kata, ba faoma yamuhahae ere, nihahae föna Yehowa. 25 Ba ndramutaba nono mbiri-biri andrö, sumange ogauta, ba yamuhalö ma'ifu ndro zumange ogauta andrö ere, ba yamugule'ö ba mbörö dalinga zi möi nihaogö andrö, ba gambölö ba ba duru sebua ba dangania kambölö, ba ba duturu kahenia sebua kambölö. 26 Ba fanikha andrö, ba yamulau ba dangania ma'ifu ere — ba danga gere — kabera, 27 ba yamutefe ere wanikha andrö ösa, si so ba dangania kabera, turunia kambölö, mewitu, föna Yehowa. 28 Ba igule'ö ba mbörö dalinga zi möi nihaogö andrö ma'ifu wanikha andrö ba dangania, ere, ba ba duru sebua, ba dangania kambölö ba ba duturu kahenia sebua, kambölö, yaŵa ba dete ndro zumange ogauta andrö. 29 Ba si tosai fanikha ba danga gere, ba yamulau ba högö zi möi nihaogö andrö, ena'ö ifaigi khönia wameta zala khö Yehowa. 30 Ba yamu'asiwai wune si sambua andrö, ba ma ono marafadi, si tola ibe'e, 31 hadia zi tola ibe'e — si sambua, ba sumange fameta horö, ba si sambua, ba sumange nitunu, awö zumange ni'a andrö, ifaigi ba zi möi nihaogö andrö wameta zala khö Yehowa ere, ba zi manö. 32 Da'ö nihonogöi, ba zi no göna bou auri, ba si tebai mame'e [niŵa'ö andrö], ba wangehao ya'ia.

II. Bou auri ba nomo

33 Ba humede Yehowa khö ndra Moze A'aroni, imane:

34 Na mirugi dania danö Gana'ana, nibe'egu khömi dania, ba na tumbu zi hulö mbou auri ba nomo heza, ube'e, ba danö andrö, si no tana khömi, 35 ba möi mu'ombakhaö khö gere zokhö omo andrö, imane: No tumbu ba nomogu zi hulö mbou auri! 36 Ba yamuŵa'ö ere, laheta nösi nomo, atö möi yomo gere, ba wamaigi nahia andrö si göna, fa böi laŵa'ö dania, si ra'iö manö nösi nomo ma'afefu. Awena dania möi yomo gere, ba wamaigi omo andrö. 37 Ba na isöndra — na ifaigi nahia si no göna bou auri andrö — ba mbagolö nomo so, mogao ba mowuge'e ba oyoramö, hulö zahöndrö ba mbolo mbagolö, 38 ba möi tou gere ba mbawandruhö, ba ikusi nomo andrö, fitu bongi. 39 Ba na ifuli dania ia ere, na no irugi fitu bongi, ba na i'ila — na ifaigi — no tedou mbou auri andrö ba mbagolö nomo, 40 ba yamuŵa'ö ere, ladeha gara andrö, soroma bou auri andrö, ba latibo'ö baero mbanua, ba naha si ta'unö. 41 Ba omo andrö, ba ni'o'oi tanö bakha, fasui, ba o'oila la'uri andrö, ba niduwagö baero mbanua, ba naha si ta'unö. 42 Ba lahalö gara bö'ö ba labe'e fangali gara no mege; ba si manö la'uri bö'ö, ba wangalösö omo andrö.

43 Ba na ifuli tumbu mbou auri ba nomo andrö, na no muheta gara andrö ba na no mu'o'oi nomo, ba na no mufuli mu'alösöigö, 44 ba yamöi yomo gere, ba na i'ila — na ifaigi — no tedou mbou auri ba nomo andrö, ba no bou auri safaito, ba nomo: si ra'iö ia. 45 Ba nidudugö nomo andrö, ba karania ba eunia ba la'uri fefu, ba nomo, ba ni'ohe baero ba naha si ta'unö, baero mbanua.

46 Ba si möi yomo ba nomo andrö, fatua, no mukusi, ba niŵa'ö si ra'iö, irege bongi. 47 Ba si no mörö yomo, ba ibabago nukhania; ba he si no manga yomo, ba ibabago nukhania. 48 Ba na möi yomo gere, ba na i'ila, ba wamaiginia, lö si tedou mbou auri, ba nomo andrö, me no mufuli mu'alösöigö nomo, ba tenga si ra'iö sa'ae nomo andrö, yamuŵa'ö ere, noa sa döhö wökhö andrö.

49 Ba yamuhalö wofo, dombua ba eu eresi ba kirimisi ba sufo, ba wameta sala nomo andrö. 50 Fofo si sambua, ba itaba ba nahia tanö, yaŵa nidanö gumbu; 51 ba eu eresi andrö ba sufo ba kirimisi ba fofo sauri andrö, ba ihalö ba i'ungugö ba ndro wofo nitaba andrö ba ba nidanö gumbu, ba omo, ba mewitu itefe, 52 ba wameta sala nomo do wofo andrö ba idanö gumbu ba fofo sauri andrö ba eu eresi ba sufo ba kirimisi andrö. 53 Ba fofo sauri andrö, ba yamufoloi baero mbanua, ba mbenua; si manö wametania sala nomo andrö: abeta wa'ara'iönia.

54 Da'ö nihonogöi ba ngawalö mbou auri andrö ba ba gigimö, 55 ba ba mbou auri ba nukha ba ba nomo, 56 ba ba dandra ba guli ba ba zi hulö mböni ba ba dandra safusi andrö, 57 ba wangombakha hadia zi ra'iö ba hadia zi tenga si ra'iö. Da'ö gamakhoita ba ba mbou auri andrö.

Famotokhi ba gahe

Fabaliŵa lala

Olayama Moze III: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö